1 ኢስራኤሌ ማባራይ ዉሪ ሴሎን ሺቂዳ፤ ጋይቶቴꬃ ዱንካኔ ሄን ቶኪዳ፤ ቢታያካ ጮኡ ጋዳ ኢስታስ ሃሬታዱስ። 2 ጊዶ ኣቲን ኢስራኤሌ ኣሳፔ ጋዴ ጊሻይ ጋኮንታ ኣቲዳ ላፑን ቆሞቲ ዴቴስ።

3 ሄሳ ጊሻስ ኢያሶይ ኢስራኤሌ ኣሳ፥ «ጎዳ ኢንቴ ኣዋታ ጾሳይ ኢንቴስ ኢሚዳ ቢታ ላቶንታ ኣይዴ ጋካናስ ኣዛሌቲ? 4 ኢሲ ኢሲ ቆሞፌ ሄꬑ ሄꬑ ኣሳታ ዶሪቴ። ቢታ ዩዪ ጼሊዲ ኢሲ ኢሲ ቆሞ ጋካናይሳ ታስ ጻፊ ኢማናይታ ታ ኪታና፤ ኢስቲካ ታኮ ሃ ሲሚ ያና። 5 ኢስቲ ሄ ቢታዮ ላፑን ኬሲ ሻካና። ዱጌሃ ባጋራ ዩሁዳይ፥ ፑዴሃ ባጋራ ዮሴፌይ ባስ ጺንጾ ሂስቲ ኦይካና። 6 ሃ ላፑን ኬዚ ሻኬቲዳ ቢታ ሃኖታ ጻፊዳፔ ጉዬ ታኮ ኤኪ ዪኮ ታኒ ጎዳ ኑ ጾሳ ሲንꬃን ኢንቴስ ሳማ ዬጋና። 7 ሌዌ ዛሬቲ ጾሳስ ኦꬂዛ ኦሶይ ኢስታስ ጺንጾ ጊዲዳ ጊሻስ ኢንቴናራ ኢስቲ ቢታ ጊሼቴቴና። ጋዴ ዛሬቲ፥ ኦሮቤሌ ዛሬቲኔ ሚናሴ ዛሬታፔ ባጋይ ዮርዳኖሴ ሻፋፔ ኣርሼይ ሞኪዛሶ ባጋራ ጎዳ ኣይሌ ሙሴይ ኢስታስ ኢሚዳ ቢታ ካሴቲ ላቲዳ» ጊዴስ።

8 ኣሳይ ቢታ ሃኖታ ፒልጊ ጼላናሲኔ ጻፋናስ ቡስ ዶሚሺን ኢያሶይ፥ «ቢዲ ቢታይ ሃኖታ ፒልጊ ጼሊዲ ፓቲ ጻፊዳፔ ጉዬ ሃ ታኮ ሲሚ ዪቴ። ሃይሳን ሴሎን ጎዳ ሲንꬃን ታ ኢንቴስ ሳማ ዬጋና» ጊዴስ። 9 ሄሳ ጊሻስ ኣሳይ ቢታ ዩዪ ጼሊዴስ፤ ካታማታራ ኢሲፌ ላፑን ኬሲ ሻኪዲ ጻꬃ ዋራቃታን ጻፊዳ፤ ሄሳፌ ጌዴ ኢያሶኮ ሴሎ ሲሚ ቢዳ። 10 ኢያሶይ ጎዳ ሲንꬃን ሴሎን ኢስታስ ሳማ ዬጊዴስ፤ ቢታዮ ኢስራኤሌ ኣሳስ ኢስታ ቆሞ ኬና ጊሼቺ ኢሚዴስ።

11 ኮይሮ ጊሻይ ቢኒያሜ ቆሞታ ኢስታ ዛርኬን ዛርኬን ጋኪዴስ። ሳማን ኢስታ ጋኪዳ ቢታይ ዲዛሶይ ዩሁዳ ዛሬታ ቢታፌኔ ዮሴፌ ዛሬታ ቢታፌ ጊዶን ጊዲሺን ሃይሳፌ ካሊዛይሳ፤ 12 ፑዴሃ ባጋራ ኢስታ ዛዋይ ዮርዳኖሴ ሻፋፔ ዶሚዲ፥ ኢያርኮ ፑዱንꬃራ ኣꬊ ቢዲ ኣርሼይ ዉሊዛ ባጋራ ꬎቃ ቢታራ ኦይኪዲ ቤቲ-ኣዌኔራ ካንꬄስ። 13 ሄሳፌ ዱጌሃ ባጋራ ሎዛ ጌቴቲዛ ቤቴሌ ፑዱንꬃራ ካንꬂዲ ዱጌ ባጋራ ዲዛ ቤቲ-ሆሮኔፔ ዱጌሃ ባጋራ ዲዛ ዙማ ኣቻራ ካንꬂ ቢዲ ዱጌ ኣጻሮቴ-ኣዳሬ ጋኬስ።

14 ዱጌሃ ባጋራ ዲዛ ዛዋይ ቤቲ-ሆሮኔስ ሲንꬃ ባጋራ ዲዛ ዙምቡላፌ ዶሚዲ፥ ኣርሼይ ዉሊዛ ባጋራ ዱጌሃ ባጋ ሚርቄቲዲ ዩሁዳ ቆሞታ ካታማ ጊዲዳ ቂሪያቴ-ባኣሌ ዎይኮ ቂሪያቴ-ዪኣሪሜራ ካንꬂ ቤስ፤ ሄሲ ኣርሼይ ዉሊዛ ባጋስ ዛዋ።

15 ዱጌሃ ባጋራ ዛዋይ ቂሪያቴ-ዪኣሪሜፔ ዶሚዲ ኔፍቶ ፑልቶ ሃꬃራ ካንꬄስ። 16 ሄ ዛዋዚ ኤራፋይሜ ሾባፌ ፑዴሃ ባጋራ ዲዛ ሄኖሜ ና ሾባ ጊናራ ዲዛ ዙምቡላ ቶሆሶ ዎꬌስ፤ ሄፔ ያቡሴታ ካታማፔ ዱጌሃ ባጋራ ዲዛ ዱጉንꬃራ ሄኖሜ ዙሌ ዎꬊዲ ኤን-ሮጌሌራ ካንꬄስ። 17 ቃሴ ፑዴሃ ባጋ ሚርቄቲዲ ኤን-ሼሚሼራ ቢዲ ጌሊሎቴራ ካንꬄስ፤ ሄሳፌ ኣዱሚሜ ፑርዴ ጊናራ ዲዛ ኦሮቤሌ ና ቦሃኔ ሹቻኮ ዱጌ ዎꬌስ። 18 ሄሳፌ ቤቲ-ኣራቤ ፑዱንꬃራ ካንꬂዲ ዱጌ ኣራቤ ዎꬌስ። 19 ሄሳፌ ቃሴ ቤቲ-ሆጊሌ ፑዱንꬃፌ ፑዴሃ ባጋራ ካንꬂዲ፥ ዮርዳኖሴ ሻፋይ ጎጊ ጌሊዛሶ ማጺኔ ኣባፌ ጋና ባጋ ጋጻ ጋኬስ። ሄሲ ዱጌሃ ባጋስ ዛዋ። 20 ኣርሼይ ሞኪዛሶ ባጋራ ዮርዳኖሴ ሻፋይ ዛዋ። ቢኒያሜ ዛሬቲ ላቲዳ ቢታ ኡባሲካ ዛዋቲ ሄይታንታ።

21 ቢኒያሜ ዛሬቲ ባ ዛርኬን ዛርኬን ኤኪዳ ካታማቲ ኢያርኮ፥ ቤቲ-ሆጊሌ፥ ኣሜቅ-ኬጺጼ፥ 22 ቤቲ-ኣራቤ፥ ዛማራይሜ፥ ቤቴሌ፥ 23 ኣዊሜ፥ ፓራ፥ ኦፊራ፥ 24 ካፌር-ኣሞናዬ፥ ኦፊናኔ ጌባ። ሃይቲ ባንታ ጉታታራ 12 ካታማታ። 25 ቃሴ ጌባኦኔ፥ ኤራማ፥ ቢኤሮቴ፥ 26 ሚጺጳ፥ ካፊሬ፥ ሞጻ፥ 27 ኤሬቄሜ፥ ዪርጲኤላ፥ ቴራላ፥ 28 ጼላ፥ ሄሌፋ፥ ያቡሴታ ካታማ ዬሩሳላሜ፥ ጊቢኣኔ ቂሪያቴ-ዪኣሪሜ። ሃይቲ ባንታ ጉታታራ 14 ካታማታ። ቢኒያሜ ቆሞቲ ባንታ ዛርኬን ዛርኬን ላቲዳ ቢታይ ሃይታ።