1 ሌዌ ዛርኬታ ካሌꬂዛይቲ ቄሴ ኤልኤዜሬኮ፥ ናዌ ና ኢያሶኮኔ ኢስራኤሌ ዛሬታ ኣዋታኮ ሺቂዳ። 2 ካናኔ ቢታን ዲዛ ሴሎን ኢስታስ፥ «ኑኒ ዴኣና ካታማታኔ ኑ ሜሄ ሄንꬃሶሆታ ኢንቴ ኑስ ኢማና ማላ ጎዳይ ካሴ ሙሴ ባጋራ ኣዛዚ ዎꬂዴስ» ጊዳ። ታይ 35፡1-8 3 ሂስቲን ጎዳይ ኣዛዚዳ ማላ ኢስራኤሌ ኣሳይ ሌዌ ቆሞታስ ባ ላቲዳ ጺንጾታፔ ሃ ካታማታኔ ሜሄ ሄንꬃሶሆታ ቃንጺ ኢሚዳ።

4 ኮይሮ ሳማይ ቃኣቴ ዜሬꬃታስ ኢስታ ዛርኬን ዛርኬን ኬዚዴስ። ቄሴ ኣሮኔ ዛሬ ጊዲዳ ሌዌታስ ዩሁዳፔ፥ ሲሞናፔኔ ቢኒያሜ ቆሞታፔ 13 ካታማቲ ሳማን ጋኪዳ። 5 ሃንኮ ኣቲዳ ቃኣቴ ዜሬꬃታስ ኤፍሬሜፔ፥ ዳኔፔኔ ሚናሴስ ባጋ ቆሞታፔ 10 ካታማቲ ሳማን ጋኪዳ።

6 ጌርሾኔ ዜሬꬃታስ ዪሳኮሬፔ፥ ኣሴሬፔ፥ ኒፍታሌሜፔኔ ባሳኔን ዲዛ ሚናሴስ ባጋ ቆሞታፔ 13 ካታማቲ ሳማን ጋኪዳ።

7 ሜራሬ ዜሬꬃታስ ኢስታ ዛርኬን ዛርኬን ኦሮቤሌፔ፥ ጋዴፔኔ ዛቢሎኔ ቆሞታፔ 10 ካታማቲ ሳማን ጋኪዳ።

8 ጎዳይ ሙሴ ባጋራ ኣዛዚዳ ማላ፥ ኢስራኤሌ ኣሳይ ሃ ካታማታኔ ሜሄ ሄንꬃሶሆታ ሌዌታስ ሳማን ኢሚዳ።

9 ዩሁዳፔኔ ሲሞና ቆሞታፔ ሃይሳፌ ካሊ ዲዛ ካታማታ ሳማን ጋꬂዳ። 10 ኮይሮ ሳማይ ሌዌ ቆሞ ቃኣቴፔ ዬሌቲዳ ኣሮኔ ዛሬታስ ኬዚን ኢስታስ ኢሜቲዳ ካታማቲ ሃይሳፌ ካሊዛይታ። 11 ሄይቲካ ዩሁዳ ቢታን ጌዜቲዛሶን ዲዛ ኬብሮኔ ጌቴቲዛ ቂሪያቴ-ኣርባኤኔ ኢዛ ዩሾን ዲዛ ሜሄ ሄንꬃሶሆታ ኢስታስ ኢሚዳ። (ኣርባኤይ ኤናቄ ኣዋ።) 12 ጊዶ ኣቲን ሄ ካታማ ዩሾን ዲዛ ሜሄ ሄንꬃሶሆታኔ ሞꬃታ ዮፊኔ ና ካሌቤስ ጺንጾ ሂስቲ ኢሚዳ። 13 ቄሴ ኣሮኔ ዛሬታስ ኣስ ዎꬊዳ ኣሲ ባቃቲ ቢዲ ኣቲዛ ኬብሮኔኔ ሊቢና ካታማታ ኢስታ ሜሄ ሄንꬃሶሆራ ኢሲፌ ጋꬂ ኢሚዳ። 14 ዬቲሬኔ ኤሽታሞኣ፥ 15 ሆሎኔኔ ዳቢሬ፥ 16 ኣዪኔ፥ ዩጻ፥ ቤቲ-ሼሚሼኔ ኢስታ ሜሄ ሄንꬃሶሆራ ኢሲፌ ጋꬂ ኢሚዳ። ሃይቲ ኡዱፉን ካታማቲ ዩሁዳ ቆሞታፔኔ ሲሞና ቆሞታ ጺንጾፌ ጊሼቲ ኢሜቲዳይታ።

17 ቢኒያሜ ቆሞታፔ ጌባኦኔ፥ ጌባ፥ 18 ኣናቶቴ፥ ኣልሞኔ ጌቴቲዛ ኦይዱ ካታማታኔ ኢስቲ ሜሄ ሄሚዛሶሆራ ኢሲፌ ጋꬂ ኢሚዳ። 19 ቄሴ ኣሮኔ ዜሬꬃታስ ሜሄ ሄንꬃሶሆራ ኢሲፌ ጋꬂዲ 13 ካታማታ ኢሚዳ።

20 ሃንኮ ኣቲዳ ሌዌ ና ቃኣቴ ዛሬታስ ኤፍሬሜ ቆሞታፔ ሃይሳፌ ካሊ ዲዛይሲ ሳማን ጋኪዴስ። 21 ኤፍሬሜ ጌዜ ዴሬን ዲዛ ኣስ ዎꬊዳ ኣሲ ባቃቲ ቢዲ ኣቲዛሶ ሴኬሜኔ ጌዜሬ፥ 22 ቂቢጻይሜ፥ ቤቲ-ሆሮኔኔ ኢስታ ሜሄ ሄንꬃሶሆራ ኢሲፌ ጋꬂዲ 4 ካታማታ ኢሚዳ። 23 ዳኔ ቆሞታፔ ኤልቴቄ፥ ጋባቶኔ፥ 24 ኣያሎኔ፥ ጌት-ኤርሞኔኔ ኢስታ ሜሄ ሄንꬃሶሆራ ኢሲፌ ጋꬂ 4 ካታማታ ኢሚዳ።

25 ሚናሴ ቆሞታስ ባጋታፔ ታኢናኬ፥ ጌት-ኤርሞኔ ሜሄ ሄንꬃሶሆታራ ኢሲፌ ጋꬂ 2 ካታማታ ኢሚዳ። 26 ሃይቲ 10 ካታማቲ ኡባይ ሜሄ ሄንꬃሶሆታራ ኢሲፌ ሃንኮ ኣቲዳ ቃኣቴ ዛሬታስ ኢሜቲዴስ።

27 ሚናሴ ዛሬታ ባጋታፔ ኣስ ዎꬊዳ ኣሲ ባቃቲ ቢዲ ኣቲዛ፥ ባሳኔን ዲዛ ጎላኔ ካታማ ሜሄ ሄንꬃሶሆራ ባኤሽቲራ ሜሄ ሄንꬃሶሆራ፥ ናምኡ ካታማታ ኡባ ኤኪዲ፥ ጌርሾኔ ዛሬ ጊዲዳ ሃራ ሌዌታስ ኢሚዳ። 28 ዪሳኮሬ ዛሬታፔ ቂሶኔ ሜሄ ሄንꬃሶሆራ፥ ዳቢራቴ ሜሄ ሄንꬃሶሆራ፥ 29 ያርሙቴ ሜሄ ሄንꬃሶሆራ፥ ኤን-ጋኒሜ ሜሄ ሄንꬃሶሆራ፥ ኦይዱ ካታማታ ኡባ ኤኪዲ ኢሚዳ።

30 ኣሴሬ ዛሬታፔ ሚሻሌ ሜሄ ሄንꬃሶሆራ፥ ኣብዶኔ ሜሄ ሄንꬃሶሆራ፥ 31 ሄልቃቴ ሜሄ ሄንꬃሶሆራኔ ኤራሆቤ ሜሄ ሄንꬃሶሆራ፥ ኦይዱ ካታማታ ኡባ ኤኪዲ ኢሚዳ።

32 ሄሳꬆካ ኒፍታሌሜ ዛሬታፔ ኣስ ዎꬊዳ ኣሲ ባቃቲ ቢዲ ኣቲዛ ጋሊላን ዲዛ ቃዴሴ ሜሄ ሄንꬃሶሆራ፥ ሃሞቲ-ዶሬ ሜሄ ሄንꬃሶሆራ፥ ቃርታ ሜሄ ሄንꬃሶሆራ፥ 3 ካታማታ ኡባ ኤኪዲ ኢስታስ ኢሚዳ። 33 ጌርሾኔ ዛሬታ ካታማቲኔ ኢስታ ሜሄታ ሄንꬃሶሆቲ ኡባይ ታማኔ ሄꬓ።

34 ኣቲዳ ሜራሬ ዛሬ ጊዲዳ ሌዌታስ ኢሜቲዳ ቢታቲ ዛቢሎኔ ዛሬታፔ ዮቂናኣሜ ሜሄ ሄንꬃሶሆራ፥ ቃርታ ሜሄ ሄንꬃሶሆራ፥ 35 ዲሚና ሜሄ ሄንꬃሶሆራ፥ ናሂላሌ ሜሄ ሄንꬃሶሆራ፥ ኦይዱ ካታማታ ኡባ ኤኪዲ ኢሚዳ።

36 ኦሮቤሌ ዛሬታፔ ባጺራኔ ሜሄ ሄንꬃሶሆታ፥ ያሃጼኔ ሜሄ ሄንꬃሶሆታ፥ 37 ቂዲሞቴኔ ኢዚ ሜሄ ሄንꬃሶሆታ፥ ሜፋኣቴኔ ሜሄ ሄንꬃሶሆታ፥ ሃይታ ኦይዱ ካታማታ ኡባ ኤኪዲ ኢስታስ ኢሚዳ።

38 ቃሴ ጋዴ ዛሬታፔ ኣስ ዎꬊዳ ኣሲ ባቃቲ ቢዲ ኣቲዛ፥ ጋላኣዴን ዲዛ ኤራሞቴ ሜሄ ሄንꬃሶሆራ፥ ማሃናይሜ ሜሄ ሄንꬃሶሆራ፥ 39 ሃሴቦኔ ሜሄ ሄንꬃሶሆራ፥ ኢያዜሬ ሜሄ ሄንꬃሶሆራ፥ ሃይታ ኦይዱ ካታማታ ኡባ ኤኪዲ ኢስታስ ኢሚዳ። 40 ሜራሬይ ዛሬ ጊዲዳ ሃራ ሌዌታስ ጊሻን ጋኪዳ ካታማቲ ኡባይ ታማኔ ናምኣ።

41 ኢስራኤሌ ኣሳይ ላቲዳ ቢታን ዲዛ ሌዌታስ ኢሜቲዳ ካታማቲ ኢስታ ሜሄ ሄንꬃሶሆራ ኡባይ ኢሲ ቦላ ኦይዱ ታማኔ ኦስፑና። 42 ሄ ካታማታ ኡባ ዩሾን ሜሄ ሄሚዛሶሆቲ ዴቴስ። ሜሄ ሄሚዛሶሆይ ባይንዳ ካታማይ ዴና።

43 ሄሳꬆ ኦꬂዲ ጎዳይ ኢስታ ኣዋታስ ኢማናስ ጫቂዳ ቢታ ኡባ ኢስራኤሌ ኣሳስ ኢሚዴስ፤ ሂስቲን ኢስቲ ላቲዲ ሄን ዴኢዳ። 44 ጎዳይ ኢስታ ኣዋታስ ጫቂዳ ማላ ኢስታ ዩሾን ዲዛ ኡባታፔ ኢስታ ሼምፒሲዴስ። ጎዳይ ኢስታ ሞርኬታ ኡባ ኢስታስ ኣꬂ ኢሚዳ ጊሻስ ኢስታ ሞርኬታፔ ኢሶይካ ኢስታራ ኤቄታናስ ዳንዳይቤና። 45 ጎዳይ ኢስራኤሌ ኣሳስ ኢማና ጊዳ ሎኦ ቃላ ኡባ ፖሊዴስ ኣቲን ኢሶይኔ ሳኣን ዎꬊ ኣቲቤና።