1 ጎዳይ ሙሴስ ሂዝጊዴስ፥ 2 «ኢሳዴይ ኣሳቴꬃ ቦላ ዲዛ ኢታ ጋልባ ሃርጌፌ ፓጺዳፔ ጉዬ ጌሾ ዎጋይ ሃይሳፌ ካሊዛይሳ፤ ኢዚ ጌሽ ጊዲዳይሳ ኢዛዴስ ዮቴቲዛ ጋላስ ሄሳዴይ ቄሴኮ ባና ማላ ኢዛስ ዮቴቶ። ማቶ 8፡4፤ ማር 1፡44፤ ሉቃ 5፡14፤ 17፡14 3 ሄ ኢዛስ ዮቴቲዳ ቄሴዚ ኣሲ ዲዛሶፔ ጌዴ ሃራሶ ኬሲዲ ባኮ ዪዳይሳ ሎኤꬂ ጼሎ፤ ኢዛዴይ ሃርጌዛፔ ፓጺዳ ጊዲኮ፥ 4 ቄሴዚ ፓጻ ዲዛ ናምኡ ጌሻ ካፎታኔ ዚጋ ሚꬅ፥ ዞኦ ጺላታ፥ ሂሶጴ ሚꬃ ሃይꬅ ጉጂ ኤኪ ያና ማላ ኣዛዞ። 5 ሄሳፌ ጉዬ ቄሴዚ ካፎታፔ ኢሳ ፑልቶ ሃꬂ ኢዛን ዲዛ ጉቃ ኬሬ ቦላ ሹኬታና ማላ ኣዛዞ። 6 ሃንኮ ፓጻ ዲዛ ካፎዛ ኤፊዲ ዚጋ ሚꬃራ፥ ዞኦ ጺላታራኔ ሂሶጴ ሚꬃ ቦንጮራ ኢሲፌ ጋꬂ ካሴ ሹኬቲዳ ካፎዛ ሱꬃን ጌልꬂ ኬሶ። 7 ሱꬃካ ኣሳቴꬃ ቦላ ዲዛ ጋልባ ሃርጌፌ ፓጺዛዴ ቦላ ላፑንቶ ዉጾ፤ ሄሳፌ ጉዬ ኢዚ ጌሽ ጊዲዳይሳ ኢዛ ኤሪሶ፤ ሃንኮ ፓጻ ዲዛ ካፎዛካ ጌዴ ሃራሶ ኬሲዲ ዴምባን ፒራꬋና ማላ ዬዶ።

8 «ኢታ ጋልባ ሃርጌፌ ፓጺዳዴይ ባ ማይኦ ሜጮ፤ ባ ቦላ ዲዛ ኢስኬ ኡባ ሜዴቶ፤ ባ ቦላካ ሜጬቶ፤ ዎጋይ ጊዛ ማላ ኢዚ ጌሽ ጊዳና፤ ሄሳፌ ጉዬ ኣሲ ዲዛሶ ጌላናስ ዳንዳዬስ፤ ጊዶ ኣቲን ላፑን ጋላስ ጋካናስ ኢዚ ባ ዱንካናፔ ካሬን ዴኦ። 9 ላፑንꬆ ጋላስ ቃሴካ ባ ሁኤ፥ ባ ቡቺኔ ባ ዴሞ፥ ሃራ ኣዋንካ ባ ኣሳቴꬃ ቦላ ዲዛ ኢስኬ ኡባ ሜዴቶ፤ ባ ማይኦ ሃꬃን ሜጮኔ ባ ቦላካ ሜጬቶ፤ ሄሳፌ ጉዬ ኢዚ ጌሽ ጊዳና።

10 «ኦስፑንꬃ ጋላስ ኢሲ ዎሶይካ ኢስታ ቦላ ባይንዳ ናምኡ ዶርሳ ላቃታኔ ኢሲ ላይꬃ ኡዞ ኤሆ፤ ካꬃ ያርሾ ጊሻስ ዎጋራ ሚꬃ ዛይቴን ሙኑቄቲዳ ሄꬑ ኪሎ ꬊሌኔ ኢሲ ሊቲሮ ዛይቴስ ሄꬓንꬆ ኩሼ ዎጋራ ሚꬃ ዛይቴ ኤሆ። 11 ቄሴዚካ ኣዴዚ ኢዚ ኤሂዳ ኡባራ ኢሲ ቦላ ጋይቶቴꬃ ዱንካኔዛ ፔንጌን ጎዳ ሲንꬅ ሺሾ።

12 «ሄሳፌ ጉዬ ናምኡ ቄሪ ꬋርሾታፔ ኢሳ ኤኪዲ ኢሲ ሊቲሮስ ሄꬓንꬆ ኩሼ ጊዲዛ ዎጋራ ዛይቴራ ኢሲፌ ጋꬂ ኤኪዲ ቆሆ ጊሻስ ሺቂዛ ያርሾ ሂስቲ ሺሾ፤ ቄሴዚ ሄ ያርሾዛካ ያኔ ሃ ቃሴꬂዛ ያርሾ ሂስቲ ጎዳ ሲንꬃን ቃሴꬂ ሺሾ። 13 ላቃዛካ ናጋራ ያርሾሲኔ ጹጌቲዛ ያርሾስ ሹኪዛ ጌሻሶሆን ሹኮ፤ ጋሶይካ ቆሆ ጊሻስ ያርሾይ ናጋራ ዉርሳናስ ሺቂዛ ያርሾ ማላ ቄሴዛስ ጊሻ ጊዳና፤ ኢዚካ ኬሂ ዱማ። 14 ቄሴዚ ቆሆ ያርሾስ ሺቂዛ ሱꬃፌ ጉꬃራ ኤኪዲ ሄ ጌይዛዴስ ኡሻቻ ሃይꬃ ጼራ ኢዛስ ኡሻቻ ኩሼ ማንꬃ ቢራꬌኔ ኡሻቻ ቶሆ ማንꬃ ቢራꬌ ቲዮ። 15 ቄሴዚ ዎጋራ ሚꬃ ዛይቴዛፔ ጉꬃራ ኤኪዲ ባ ሃዲርሳ ኩሼ ቃኣን ቲጎ። 16 ባ ኡሻቻ ኩሼ ጼራን ጉꬃራ ኤኪዲ ጾሳ ሲንꬃን ላፑንቶ ዉጾ። 17 ባ ኩሼ ቃኣን ኣቲዳ ዛይቴዛፔ ጉꬃራ ኤኪዲ ጌይዛዴስ ኡሻቻ ሃይꬃ ጼራ፥ ኡሻቻ ኩሼ ማንꬃ ቢራꬌኔ ኡሻቻ ቶሆ ማንꬃ ቢራꬌ ቲዮ። 18 ባ ኩሼ ቃኣን ኣቲዳ ዛይቴዛካ ጌይዛዴ ሁኤን ጉሶ፤ ቄሴይ ኢዛዴ ናጋራ ጌሾ።

19 «ሄሳፌ ጉዬ ቄሴዚ ባ ቱናቴꬃፌ ጌይዛዴ ናጋራ ዉርሳናስ ሺቂዳ ሜሄ ሹኮ። 20 ቃሴካ ቄሴዚ ሄ ጹጌቲዛ ያርሾዛ ካꬃ ያርሾዛራ ኢሲፌ ያርሾ ያርሺዛሶዛ ቦላ ዎꬂዲ ጹጎ፤ ሄሳ ማላ ኦሶን ኢዛዴ ናጋራፔ ማሪሴስ፤ ኢዛዴይካ ጌሽ ጊዴስ።

21 «ኢዛዴይ ሄሳ ኡባ ኤሃናስ ዳንዳዮንታ ማንቆ ጊዲኮ ጎዳ ሲንꬃን ያኔ ሃ ቃሴꬂዲ ባ ናጋራ ዉርሳናስ ኢሲ ꬋርሾ ላቃ ኤሂዲ ቆሆ ያርሾ ጊሻስ ሺሾ፤ ቃሴ ካꬃ ያርሾዛስካ ዎጋራ ሚꬃ ዛይቴን ሙኑቄቲዳ ኢሲ ኪሎ ሊቆ ꬊሌ ካꬃ ያርሾስ ኤሆ፤ ሄሳꬆካ ኢሲ ሊቲሮስ ሄꬓንꬆ ኩሼ ጊዲዛ ዛይቴ ኤሆ። 22 ቃሴካ ኢዛ ዎልቃይ ዳንዳይዳ ማላ ናምኡ ሃራጴታ ዎይኮ ናምኡ ዋኖሴታፔ ኢሳ ናጋራ ጊሻስ ያርሾስ፥ ናምኣንꬆዛ ቃሴ ጹጌቲዛ ያርሾስ ኤሆ።

23 «ጌሾ ዎጋይ ፖሌቲዛ ኦስፑንꬃ ጋላስ ሄይታ ኡባ ኤሂዲ ጋይቶቴꬃ ዱንካኔ ፔንጌን ጎዳ ሲንꬃን ቄሴስ ኢሞ። 24 ቄሴዚካ ቆሆ ያርሾስ ሺቂዛ ዶርሳ ላቃኔ ዎጋራ ሚꬃ ዛይቴዛ ኤኪዲ ያኔ ሃ ቃሴꬂዛ ያርሾ ኦꬂ ጎዳ ሲንꬃን ያርሾ። 25 ቆሆ ጊሻስ ሺቂዛ ያርሾስ ሺቂዳ ዶርሳ ላቃ ሹኮ፤ ሱꬃፌ ጉꬃራ ኤኪዲ ጌይዛዴስ ኡሻቻ ኩሼ ማንꬃ ቢራꬌ፥ ኡሻቻ ቶሆ ማንꬃ ቢራꬌኔ ኡሻቻ ሃይꬃ ጼራ ቲዮ። 26 ቄሴዚ ዛይቴዛፔ ጉꬃራ ባ ሃዲርሳ ኩሼ ቃኣን ቲጎ። 27 ባ ኡሻቻ ኩሼ ቢራꬌን ጉꬃራ ቦቺዲ ጾሳ ሲንꬃን ላፑንቶ ዉጾ። 28 ባ ኩሼ ቃኣን ቲጊዳ ዛይቴፔ ጉꬃራ ኤኪዲ ቆሆ ያርሾ ሱꬃን ቦቺዳሶን ሄሲካ ጌይዛዴስ ኡሻቻ ሃይꬃ ጼራ፥ ኡሻቻ ኩሼ ማንꬃ ቢራꬌ ጼራ፥ ኡሻቻ ቶሆ ማንꬃ ቢራꬌ ጼራ ቦሺሶ። 29 ቄሴዚ ባ ኩሼን ኣቲዳ ዛይቴዛ ኣዴዛ ሁኤን ጉሶ፤ ሄሳꬆ ኦꬂዲ ጌሾ ዎጋ ጎዳ ሲንꬃን ፖሎ። 30 ሄሳፌ ጉዬ ሃራጴታ ዎይኮ ዋኖሴታ ጌይዛዴ ዎልቃይ ጋꬂዳ ኬና ቄሴዚ ያርሾ። 31 ሄይታንታፌ ኢሳ ናጋራስ ሺቂዛ ያርሾስ ናምኣንꬆዛ ቃሴ ጹጌቲዛ ያርሾስ ካꬃ ያርሾራ ጋꬂ ሺሾ፤ ቄሴዚ ኡባካ ሃይሳ ማላን ጌይዛዴ ናጋራፔ ጌሾ። 32 ኣሳፔ ጌዴ ሃራ ኣሳን ኣꬊዛ ኢታ ጋልባ ሃርጌፌ ጌያናስ ኮሺዛ ዎጋ ፖላናስ ዳንዳዮንታ ማንቆ ኣሳስ ዲዛ ዎጋይ ሃይሳ» ጊዴስ።

33 ጎዳይ ሙሴሲኔ ኣሮኔስ ሂዝጊዴስ፥ 34 «ታኒ ኢንቴስ ኢሚዛ ካናኔ ቢታ ኢንቴ ጌሊዛ ዎዴ ኢሲ ኬꬃን ታኒ ቡቃ ዬጊኮ፥ 35 ሄ ኬꬃዴይ ቢዲ ቄሴዛ፥ ‹ታሶን ኣይ ኢታ ሃርጌይ ዲዛኮ› ጊዲ ዮቶ። 36 ሶን ዲዛ ሚሽ ኡባይ ቱና ጌቴቶንታ ማላ ቄሴዚ ሄ ኢታ ሃርጋ ቤያናስ ጌላናፔ ካሴቲዲ ሶን ዲዛ ሚሽ ኡባ ካሬ ኬሳና ማላ ኣዛዞ፤ ሄሳፌ ጉዬ ቄሴዚ ጼላናስ ኬꬃ ጊዶ ጌሎ። 37 ሃርጌዛ ሎኤꬂ ፓጪ ጼሊዛ ዎዴ ኬꬃ ሉኪ ሉኪ ሚዛ ሃርጌዛስ ሜꬋይ ማታ ማላ ጪሊላ ዎይኮ ዞኦ ዎይኮ ፑንጫርካ ሚሳቲ ቤቲኮ፥ 38 ቄሴዚ ሄ ኬꬃፌ ኬዚዲ ኬꬃይ ላፑን ጋላስ ጋካናስ ጎርዴታና ማላ ኦꬆ። 39 ቄሴዚ ላፑንꬃ ጋላስ ሲሚዲ ቃሴካ ጼሎ፤ ሃርጌዚ ካሴፔ ጌዴ ዳሪ ዳሪ ቢኮ፥ 40 ሃርጌይ ኢስታ ቦላ ቤቲዳ ሹቻቲ ኬꬃፌ ዎጬቲ ኬዚዲ ካታማፔ ጌዴ ካሬን ዲዛ ቱና ሚሽ ዬጌቲዛሶን ዬጌታና ማላ ኣዛዞ። 41 ሄሳፌ ጉዬ ኬꬃስ ሶ ባጋ ጊሪዲ ሄ ጊሬꬃዛ ካታማፔ ካሬ ባጋራ ቱና ሚሽ ዬጊዛሶን ዬጋና ማላ ኣዛዞ። 42 ሄሳፌ ጉዬ ካሴ ሹቻታ ሶሆን ሃራ ኦራꬃ ሹቺ ጌሊን ሄ ኬꬃን ሃራ ኦራꬃ ኡርቃይ ሜሼቶ።

43 «ሹቻቲ ዲጌቲን ቃሴካ ኡርቃካ ቆቆፊዲ ሃራ ኡርቃን ሜሺ ኦራꬂዳፔ ጉዬ ሄ ሃርጌዛ ማላታይ ቃሴካ ሲሚ ቤቲኮ፥ 44 ቄሴዚ ሲሚ ቢዲ ቤዮ፤ ሃርጌዚ ካሴፔ ጌዴ ኣኪ ኣኪ ቢዛ ማላ ጊዲኮ ሄ ሃርጌይ ኢሳፌ ኢሳን ኣꬊዛ ኢታ ሃርጌ ጊዲዳ ጊሻስ ሄ ኬꬃይ ቱና። 45 ሄሳ ጊሻስ ሄ ኬꬃይ ላሌታናስ ቤሴስ፤ ሄ ኬꬃ ሹቻይ፥ ሚꬃይኔ ሚሺ፥ ኡርቃይ ዉሪካ ካታማፔ ጌዴ ካሬ ቱና ሚሺ ዬጌቲዛሶን ዬጌቶ። 46 ጎርዴቲዳፔ ጉዬ ሄ ኬꬃን ጌሊዳ ኣሲ ዉሪካ ኦማርስ ጋካናስ ቱና ጊዴስ። 47 ሄ ኬꬃን ኢቺዳዴይ ዎይኮ ካꬅ ሚዳዴይ ባ ማይኦ ሜጮ።

48 «ኬꬃይ ቃሴካ ኦራጺዲ ሜሼቲዳፔ ጉዬ ቄሴዚ ዪዲ ጼሊሺን ሃርጌዚ ካሴፔ ኣኪ ኣኪ ቦንታ ኣጊኮ፥ ሃርጌዛ ማላታይ ꬋይዳ ጊሻስ፥ ሄ ኬꬃይ ጌሽ ጊዲዳ ጊሻስ ቄሴዚ ኬꬃ ኣዋ ኤሪሶ። 49 ሄ ኬꬃ ጌሻናስ ናምኡ ካፎ፥ ሊባኖሴ ዚጋ፥ ዞኦ ጺላታኔ ሂሶጴ ጌቴቲዛ ሚꬃ ሃይꬅ ኤሆ። 50 ካፎታፔ ኢሳ ፑልቶ ሃꬂ ኢዛን ዲዛ ጉቃ ኬሬን ሹኮ፤ 51 ሄሳፌ ጉዬ ዚጋ ሚꬅ፥ ሂሶጴ ሚꬃ ሃይꬅ፥ ዞኦ ጺላታኔ ፓጻ ዲዛ ካፎዛ ኢሲፌ ጋꬂ ኤኪዲ ጉቃ ኬሬን ዲዛ ፑልቶ ሃꬃኒኔ ሃንኮ ሹኬቲዳ ካፎዛ ሱꬃን ጌልꬂ ኬሲዲ ኬꬃዛ ላፑንቶ ኣራጮ። 52 ቄሴዚ ሄሳꬆ ሂስቲዲ ሄ ኬꬃ ካፎዛ ሱꬃን፥ ፑልቶ ሃꬃን፥ ፓጻ ዲዛ ካፎን፥ ዚጋ ሚꬃን፥ ሂሶጴ ሚꬃ ሃይꬃኒኔ ዞኦ ጺላታን ጌሾ። 53 ሄሳፌ ጉዬ ፓጻ ዲዛ ካፎዛ ኢዚ ፒራꬊ ባና ማላ ጌዴ ዴምባ ኬሲ ዬዶ፤ ሄሳꬆ ኦꬂዲ ኬꬃ ጌሺዛ ዎጋ ፖሊኮ ኬꬃይካ ጌሽ ጊዴስ።» 54 ሃይሲ ሃ ዎጋዚ ኢሳፌ ኢሳን ኣꬊዛ ጋልባ ቦላ ኬዚዛ ኣይ ሃርጌስ፥ ቃቻ ሃርጌስ፥ 55 ማይኦ ቦላኔ ኬꬃ ቦላ ኢሳፌ ኢሳን ኣꬊ ኣꬊ ዪዛ ሃርጌስ፥ 56 ኪጻ ሃርጌስ፥ ባꬊንቴሲኔ ኢሊዋ ሃርጌስ፥ 57 ሃይሲ ኣይ ሚሺካ ቱና ዎይኮ ጌሽ ጊዲዳይሳ ሻኪ ኤሪሳናሲኔ ኢሳፌ ኢሳን ኣꬊዛ ኢታ ሃርጌ ዎይኮ ቡቃ ጌሻናስ ዲዛ ዎጋ።