1 ጎዳይ ሙሴስ ሂዝጊ ዮቲዴስ፤ 2 «ኢስራኤሌ ናይታስ፥ ‹ታኒ ጎዳ ኢንቴ ጾሳ፤ 3 ካሴ ኢንቴ ሄን ዴኢዳ ጊብጼ ቢታ ኣሳይ ዎይኮ ቡሮ ታ ኢንቴና ጌልꬃና ካናኔ ቢታን ዲዛ ዴሬ ኣሳይ ኦꬂዛ ሻቲዛ ኦሶ ኢንቴ ኦꬆፍቴኔ ኢስታ ሃኖ ካሎፍቴ። 4 ታ ዎጋታ ናጊቴ፤ ታ ኣዛዞታካ ፖሊቴ፤ ታኒ ጎዳ ኢንቴ ጾሳ። 5 ታ ኣዛዞታኔ ዎጋታ ናጊቴ፤ ሄሳንታ ናጊዛ ኣሲ ባ ሼምፖ ኣሻና፤ ታኒ ጎዳ› ጋ ዮታ። ናሂ 9፡29፤ ሂዚ 18፡9፤ 20፡11-13፤ ሉቃ 10፡28፤ ኦሮ 10፡5፤ ጋላ 3፡12

6 «ኢንቴፌ ኦኒካ ባስ ኣሾ ዳቦራ ላይማቶፖ፤ ታኒ ጎዳ።

7 «ኔ ኣዬይራ ላይማታዳ ኔ ኣዋ ካዉሾፋ፤ ኔስ ኣዮ ጊዲዳ ጊሻስ ኢዚራ ላይማቶፓ።

8 «ኔ ኣዋስ ሃራ ማቼታራካ ላይማታዳ ኔ ኣዋ ዬላቾፋ። ሌዌ 20፡11፤ ዛሬ 22፡30፤ 27፡20

9 «ኔ ሚቼይራ ላይማቶፓ፤ ሄሳꬆካ ኔናራ ኢሲፌ ዲጪዳሮ ጊዲን ዎይኮ ሃራሶን ዲጪዳሮ ጊዲን ኔ ኣዋይ ዬሊዳ ሃራ ማቺ ና ዎይኮ ኔ ኣያ ሃራ ኣዚናስ ዬሊዳ ማጫ ናይራ ላይማቶፓ። ሌዌ 20፡17፤ ዛሬ 27፡22

10 «ኔስ ዬላ ጊዶንታ ማላ ኔስ ናዛ ናይራ፥ ዎይኮ ኔስ ናይ ናይራ ላይማቶፓ።

11 «ኔ ኣዋስ ሃራ ማቻ ዬሊዳ ኔ ሚቼይራ ዚንኦፋ፤ ጋሶይካ ኢዛ ኔስ ሚቾ።

12 «ኔ ኣዋ ሚቼይራ ዚንኦፋ፤ ጋሶይካ ኢዛ ኔስ ሚቾ። 13 ኔ ኣዬይ ሚቼይራካ ዚንኦፋ፤ ጋሶይካ ኢዛ ኔ ኣዬይስ ኣሾ ዳቦ።

14 «ኔ ኣዋ ኢሻ ማቺራ ዚንኦፋ፤ ጋሶይካ ኢዛ ኔስ ኣዋ ማቺ ማላ። ሌዌ 20፡19-20

15 «ኔ ናዛ ማቼይራ ዚንኦፋ፤ ኢዛ ኔስ ናዛ ማቾ ጊዲዳ ጊሻስ ኢዚራ ዚንኦፋ። ሌዌ 20፡1 16 ኔ ኢሻ ማቼይራ ዚንኦፋ፤ ጋሶይካ ኢዛ ኔስ ኢሻ ማቾ፤ ሄሲ ኔ ኢሻ ካዉሺዛ ሚሻ። ሌዌ 20፡21

17 «ኣዬይራኔ ናይራ ዚንኦፋ፤ ኢዚስ ናይ ናዛ ናይራኔ ናይስ ናይ ናይራ ዚንኦፋ፤ ኢስቲካ ኢዛስ ማታ ዳቦ ጊዲዳ ጊሻስ ሄሳꬆ ሃኖይ ካዉሻቴꬃ።ሌዌ 20፡14፤ ዛሬ 27፡23

18 «ኔ ማቺያ ፓጻ ዲሺን ኢዚ ሚቺዮ ዳዉꬅ ኤኮፋ፤ ኢዚራካ ላይማቶፓ።

19 «ኣጊናን ኣጊናን ቤቲዛ ማጫሳ ዎጋይ ዪዛ ዎዴ ማጫሳራ ዚንኦፋ።

20 «ሃራ ኣሳ ማቺራ ዚንኣዳ ኔርካ ኔና ቱኒሶፓ። ሌዌ 20፡10

21 «ኔ ናይታፔ ኦናካ ሞሎኬ ጌቴቲዛ ኤቃስ ጹጌቲዛ ያርሾ ኦꬃ ኢሞፋ፤ ጋሶይካ ኔ ጾሳ ሱንꬅ ቱኒሶፓ፤ ታኒ ጎዳ። ሌዌ 20፡1-5

22 «ጎዳ ሲንꬃን ኢጼቲዳ ሚሽ ጊዲዳ ጊሻስ ማጫሳራ ዚንኢዛ ማላ ኣዴራ ዚንኦፋ። ሌዌ 20፡13

23 «ኣዴ ጊዲን ዎይኮ ማጫሲ ሜሄራ ፓራቲዲ ባናቴꬃ ቱኒሶፖ፤ ሄሳ ማላ ሃኖይ ካዉሻቴꬃ።ኬሳ 22፡19፤ ሌዌ 20፡15-16፤ ዛሬ 27፡21

24 «ጎዳይ ኔና ኢስታ ዴሬ ጌልꬃናስ ኔ ሲንꬃፌ ዲጋና፤ ሃንኮ ኣሳይ ባርካ ባ ኦሶን ባና ቱኒሲዳይሳ ማላ ኢስቲ ኦꬂዛ ኢታ ኦሶታፔ ኢሲኔይንካ ኢንቴና ቱኒሶፒቴ። 25 ኢስታ ኦሶይ ቢታ ቱኒሲዳ ጊሻስ ታኒ ሄ ቢታዮ ኢዚ ናጋራ ጊሻስ ቃጻያዲስ፤ ቢታያካ ባ ጊዶን ዲዛ ኣሳ ኬሳ ጩታዱስ። 26 ኢንቴ ጊዲኮ ታ ኣዛዞታኔ ታ ዎጋ ናጊቴ፤ ኢስራኤሌ ኣሳፔ ዎይኮ ኢንቴ ጊዶን ዲዛ ሃራ ቢታ ኣሳፔ ኦኒካ ሃይሳ ማላ ኣይ ኦሶካ ኦꬆፍቴ። 27 ኢንቴፌ ካሴ ሄ ቢታይን ዲዛ ኣሳቲ ሄይታ ማላ ሃራሲዛ ሚሽ ኦꬂዳ ጊሻስ ቢታያ ቱናዱስ። 28 ኢንቴ ሄሳꬆ ኦꬂኮ ቢታያ ካሴ ኢንቴፌ ሲንꬃን ዲዛ ካዎቴꬃታ ጩቲዳይሳꬆ ኢንቴናካ ጩታና።

29 «ሃይታ ሃራሲዛ ኢታ ኦሶታፔ ኢሲኔዮካ ኦꬂዛዴይ ባ ዴሬ ኣሳ ጊዶፌ ሻኬቲ ꬋዮ። 30 ሄሳ ጊሻስ ኢንቴፌ ካሴ ሲንꬃን ቢታ ቦላ ዲዛ ኣሳቲ ኦꬂዳ ቱና ኦሶታ ኡባ ኦꬂዲ ኢንቴ ቱኖንታ ማላ ታ ኣዛዞታ ናጊቴ፤ ታኒ ጎዳ ኢንቴ ጾሳ።»