9
ሚሺራቾ ቃላ ዮታና ማላ ዬሱሲ ኪቲዳ ሃዋሬታ
(ማቶ 10፡5-15፤ ማር 6፡7-13)
1 ዬሱሲካ ታማኔ ናምኡ ሃዋሬታ ኢሲፌ ጼይጊዲ ዳይዳንꬃታ ኬሳና ማላኔ ሃርጌፌ ፓꬃና ማላ ኢስታስ ዎልቃኔ ጎዳቴꬅ ኢሚዴስ። 2 ቃሴካ ጾሳ ካዎቴꬅ ዮታናሲኔ ሃርጊዛይታ ፓꬃናስ ኢስታ ኪቲዴስ። 3 ኢስታስ፥ «ኦጌ ቢሼ ጉፌ ዎይኮ፥ ቃራጺቴ ዎይኮ፥ ቁማ ዎይኮ፥ ሚሼ ዎይኮ ናምኡ ማይኦ ኦይኪ ባናስ ኮሼና። ሉቃ 10፡4-11 4 ኢንቴካ ሄ ካታማይፔ ኬዛና ጋካናስ ኮይሮ ጌሊዳ ኦና ኬꬃንካ ጊዲን ሄን ጋምኢቴ። 5 ካታማ ኣሳይ ኢንቴና ሞኪ ኤኮንታ ኢጺኮ ሄ ካታማይፔ ኬዚዲ ኢንቴና ሞኮንታይታስ ማርካ ጊዳና ማላ ኢንቴ ቶሆን ዲዛ ጉዱላ ፒቲዲ ኬዚቴ» ጊዴስ።
6 ኢስቲካ ጎዳይ ጊዳ ማላ ኬዚዲ ሚሺራቾ ቃላ ዮቲሼኔ ሃርጋንቻታ ፓꬂሼ ጉታን ጉታን ዩዪዳ።
ሄርዶሲ ሲዪዳ ዬሱሳ ዎሬ
(ማቶ 14፡1-12፤ ማር 6፡14-29)
7-8 ሄ ዎዴ ኢሲ ኢሲ ኣሳቲ፥ «ዮሃኒሲ ሃይቆፔ ዴንዲዴስ» ባጋይቲ፥ «ኤላሲ ኬዚዲ ቤቲዴስ» ቃሴ ባጋይቲ፥ «ቤኒ ናቤታፔ ኢሶይ ሃይቆፔ ዴንዲዴስ» ጊዲ ሃሳዬቲዛ ጊሻስ ዩሁዳ ቢታ ሃሪዛ ሄርዶሲ ሄሳ ሲዪዲ ሃኒዛ ሚሻን ባ ዎዚናን ሜቶቴቲዴስ። 9 ሄርዶሲካ፥ «ታኒ ኢዛ ቆꬌ ቃንጺዳ ጻማቂዛ ዮሃኒሲ ሃይቂዴስ። ሂስቲን ኢዛ ጊሻስ ሃይሳ ማላ ሃሳዬቲሺን ታ ሲዪዛይሲ ኢዚ ኦኔ?» ጊዲ ኢዛ ባ ኣይፌራ ቤያና ኮዪዴስ።
ዬሱሲ ሚዚዳ ኢቻሹ ሺ ኣሳ
(ማቶ 14፡13-21፤ ማር 6፡30-44፤ ዮሃ 6፡1-14)
10 ሃዋሬቲካ ሲሚዲ ኢስቲ ኦꬂዳይሳ ኡባ ዬሱሳስ ዮቲዳ፤ ኢዚካ ኢስታ ጻላ ባናራ ኤኪዲ ቤቴሳይዳ ጌቴቲዛ ፖሳን ዲዛ ካታማ ቢዴስ። 11 ጊዶ ኣቲን ዳሮ ኣሳይ ሄሳ ኤሪዲ ኢስታ ካሊዴስ፤ ኢዚካ ኢስታ ሞኪ ኤኪዲ ጾሳ ካዎቴꬃ ጊሻስ ዮቲዴስ፤ ቃሴካ ሃርጌፌ ፓꬃናስ ቤሲዛይታ ፓꬂዴስ።
12 ጋዴይ ሌምኢሺን ታማኔ ናምኡ ሃዋሬቲ ኢዛኮ ሺቂዲ፥ «ኑኒ ዲዛይ ባዞ ቢታን ጊዲዳ ጊሻስ ኣሳይ ቢዲ ባስ ኣቃናሶኔ ሚዛ ሚሽ ኮያና ማላ ኣሳ ሞይዛ» ጊዳ።
13 ጊዶ ኣቲን ኢዚ ኢስታስ ዛሪዲ፥ «ኢንቴ ኢስታስ ሚዛዝ ኢሚቴ» ጊዴስ። ኢስቲካ፥ «ኑስ ኢቻሹ ኡኬꬃፌኔ ናምኡ ሞሌፔ ሃራይ ባ፤ ሃ ኣሳስ ጊዲዛ ካꬅ ኮሺኮ ሻማናስ ቤሴስ» ጊዳ። 14 ዬሱሲካ ባና ካሊዛይታ፥ «ኣሳ ኢቻሹ ታሙ፥ ኢቻሹ ታሙ ሂስቲ ሻኪ ሻኪ ኡቲሲቴ» ጊዴስ። ሄንካ ኢቻሹ ሺ ጊዲዛ ኣቱማሳይ ዴስ። 15 ዬሱሳ ካሊዛይቲካ ዬሱሲ ኣዛዚዳ ማላ ኣሳ ኡባ ኡቲሲዳ። 16 ዬሱሲካ ኢቻሹ ኡኬꬃኔ ናምኡ ሞሌታ ኦይኪ ፑዴ ሳሎ ጼሊዲ ጾሳ ጋላቲዴስ፤ ኢዚካ ኡኬꬃ ሜንꬂዲ ኣሳ ጋꬃና ማላ ባና ካሊዛይታስ ኢሚዴስ። 17 ኣሳይ ዉሪካ ሚዲ ካሊዴስ። ዬሱሳ ካሊዛይቲካ ኣሳፔ ኣቲዳ ታማኔ ናምኡ ሌማቴ ኩሜꬅ ማዳፌ ዴንꬂዳ።
ጴጽሮሳ ኣማኖኔ ኢዛ ማርካቴꬅ
(ማቶ 16፡13-19፤ ማር 8፡27-29)
18 ኢሲ ጋላስ ዬሱሲ ባርካ ዎሲሺን ኢዛ ካሊዛይቲ ኢዛኮ ዪዳ። ኢዚካ ኢስታ፥ «ኣሳይ ታና ኦና ጊዜ?» ጊዲ ኦይቺዴስ።
19 ኢስቲካ ኢዛስ፥ «ኢሲ ኢሲ ኣሳይ ጻማቂዛ ዮሃኒሳ፤ ባጋይቲ ኤላሳ፤ ሃራቲ ቃሴ ቤኒ ናቤታፔ ኢሶይ ሃይቆፔ ዴንዲዴስ ጌቴስ» ጊዳ።
20 ኢዚካ ኢስታ፥ «ኢንቴች ታና ኦና ጌቲ?» ጊዲ ኦይቺዴስ። ጴጽሮሲካ፥ «ኔኒ ጾሳፌ ኪቴቲዳ ኪርስቶሳ» ጊዲ ዛሪዴስ። ዮሃ 6፡68-69
ዬሱሳ ካሎይ ቃንጺሲዛ ዋጋ
(ማቶ 10፡38-39፤ 16፡24-28፤ ማር 8፡34-38፤ ሉቃ 14፡25-27)
21 ዬሱሲካ ኢስታ፥ «ሃይሳ ኦናስካ ዮቶፒቴ» ጊዲ ሚንꬂ ዮቲዲ 22 ቃሴካ፥ «ኣሳ ናይ ዳሮ ዋዬ ኤካናስ ቤሴስ፤ ዴሬ ጪማታን፥ ቄሴ ሃላቃታኒኔ ሙሴ ዎጋ ጻፊዛይታን ኢጼታና፥ ኢስታ ኩሼን ሃይቃናኔ ሄꬓንꬆ ጋላሳን ሃይቆፔ ዴንዳና» ጊዴስ።
23-24 ቃሴካ ኡባስ፥ «ባ ሼምፖ ኣሻና ጊዛ ኣሲ ዉሪ ꬋይሳና ሺን ባ ሼምፖ ታ ጊሻስ ጊዲ ꬋይሲዛ ኣሲ ኣሻና። ሄሳ ጊሻስ ታና ካላና ኮይዛ ኣሲ ዲኮ ባና ካዶ፤ ኡባ ጋላስ ባ ማስቃሌ ቶኪዲ ታና ካሎ። ማቶ 10፡38-39፤ ሉቃ 14፡27፤ 17፡33፤ ዮሃ 12፡25 25 ኣሲ ኣላሜ ጎኣ ሙሌ ዴሚዲ ባ ሼምፖ ꬋይሲኮ ኣዛ ጎኣይ ዲዜ? 26 ኦኒካ ታናኒኔ ታ ቃላን ዬላቲኮ ኣሳ ናይ ባ ቦንቾራ፥ ኣዋ ቦንቾራኔ ጌሻ ኪታንቻታ ቦንቾራ ዪዛ ዎዴ ታኒ ኢዛን ዬላታና። 27 ታ ኢንቴስ ቱሙ ጋይስ፤ ሃይሳን ኤቂዳ ኣሳፔ ሃይቃናፔ ሲንꬃን ጾሳ ካዎቴꬅ ቤያና ኢሲ ኢሲ ኣሳቲ ዴቴስ» ጊዴስ።
ዬሱሳ ሜꬎ ላሜቴꬅ
(ማቶ 17፡1-8፤ ማር 9፡2-8)
28 ዬሱሲ ሄሳ ጊዳ ኦስፑን ጋላሳ ማላፔ ጉዬ ዎሳናስ ዙማ ቦላ ኬዚዴስ፤ ቢሼ ባናራ ጴጽሮሳ፥ ዮሃኒሳኔ ያቆቤ ኤኪ ቢዴስ። 29 ኢዚ ዎሲሺን ኢዛ ኣይፌሶይ ላሜቲዴስ። ኢዛ ሜꬋይካ ዎልቃንꬃ ማላ ጾልቂዲ ቦቲዴስ። 30 ናምኡ ኣሳቲ ሙሴይኔ ኤላሲ ኢዛራ ሃሳዬቲዳ 31 ኢስቲካ ቦንቾራ ቆንጪዲ ዬሩሳላሜን ፖሌታና ዲዛ ዬሱሳ ሃይቆ ጊሻስ ሃሳዬቲዳ። 32 ጴጽሮሳኔ ኢዛራ ዲዛይታ ዴጾ ꬊስኮይ ኦይኪዴስ፤ ኢስቲካ ꬊስኮፌ ቤጊዲ ዬሱሳ ቦንቾኔ ናምኡ ኣሲ ኢዛራ ኤቂዳይታ ቤኢዳ። 33 ሄ ናምኡ ኣሳቲ ዬሱሳፔ ሻኬቲ ቢሺን ጴጽሮሲ ዬሱሳ፥ «ጎዶ! ኢሲ ዳሴ ኔስ፥ ኢሲ ዳሴ ሙሴስ፥ ኢሲ ዳሴ ኤላሳስ ኦꬂዲ ሃን ዲዛኮ ኑስ ሎኦኮሺን» ጊዴስ፤ ጊዶ ኣቲን ጴጽሮሲ ባ ጊዛይሳ ኤሮንታ ጊዴስ።
34 ኢዚ ሄሳ ሃሳይሺን ሻራይ ዪዲ ኢስታ ጌንꬂዴስ። ሻራ ጊዶ ጌሊዲ ባቢዳ። 35 ሻራ ጊዶፌካ፥ «ታኒ ዶሪዳ ታ ናይ ሃይሳ፤ ኢዛ ሲዪቴ» ጊዛ ቃላይ ሴቴቲዴስ። ኢሳ 42፡1፤ ማቶ 3፡17፤ 12፡18፤ ማር 1፡11፤ ሉቃ 3፡22
36 ቃላይ ሴቴቲዳ ዎዴ ዬሱሲ ጻላ ቤቲዴስ። ዬሱሳ ካሊዛይቲካ ሃኒዳ ሚሽ ኡባ ባ ዎዚናን ኦይኪዳ ኣቲን ኦናስካ ዮቲቤቴና።
ዬሱሲ ኢታ ኣያናፔ ፓꬂዳ ናዛ
(ማቶ 17፡14-18፤ ማር 9፡14-27)
37 ዎንቴꬃ ጋላስ ኢስቲ ዙማ ቦላፌ ዎꬊን ዳሮ ኣሳይ ዪዲ ዬሱሳራ ጋጊዴስ። 38 ሄ ዎዴ ኣሳ ጊዶፌ ኢሳዴይ ቃላ ꬎቁ ሂስቲዲ «ታማርሲዛይሶ! ታስ ኢሲ ናይ ጻላ ዲዛ ጊሻስ ኢዛ ኔ ጼላና ማላ ታ ኔና ዎሳይስ። 39 ኢዛ ኢታ ኣያናይ ኦይኪሺን ሃሳኣይ ባይንዳ ዋሴስ፤ ቃኬቲሼ ዶናራ ጎፖንቶ ኬሴስ፤ ቆሆ ጋꬂዳፔ ጉዬ ዳሮ ዋዪሲዲ ኣጌስ። 40 ኔና ካሊዛይቲ ናዛፔ ኬሳና ማላ ኢስታ ታ ዎሳዲስ፤ ጊዶ ኣቲን ኬሳና ዳንዳይቤቴና» ጊዴስ።
41 ዬሱሲካ ኢስታስ ዛሪዲ፥ «ኣማኖንታ ሃ ዎዴ ዎቤ ኣሳቶ! ታኒ ኢንቴናራ ኣይዴ ጋካናስ ዳኔ? ኢንቴናካ ኣይዴ ጋካናስ ዳንዳያኔ? ናዛ ኣኔ ሃ ኤሃ!» ጊዴስ።
42 ናዚ ዪሺን ኢታ ኣያናይ ኢዛ ቦላፌ ዬጊን ቃኬቲዴስ። ዬሱሲካ ኢታ ኣያናዛ ሴሪዲ ናዛ ፓꬂዲ ናዛ ኣዋስ ኢሚዴስ። 43 ኣሳይካ ዉሪ ጾሳ ጊታቴꬃን ማላሌቲዴስ።
ዬሱሲ ባ ሃይቆ ጊሻስ ናምኣንꬆ ዮቲዴስ
(ማቶ 17፡22-23፤ ማር 9፡30-32)
ኢዚ ኦꬂዳይሳን ኣሳይ ዉሪ ማላሌቲሺን ዬሱሲ ባና ካሊዛይታ፥ 44 «ኣሳ ናይ ኣሳ ኩሼን ኣꬊ ኢሜታና፤ ኢንቴካ ሃ ዮኦዛ ባሎፒቴ» ጊዴስ።
45 ጊዶ ኣቲን ኢዚ ጊዛይሲ ኢስታስ ጌሊቤና። ጋሶይካ ኢስቲ ኣኬኮንታ ማላ ዮኦዚ ኢስታፌ ጌሜቲዴስ፤ ዛሪዲካ ኦይቾንታ ማላ ባቢዳ።
ኡባፌ ኣꬊዛይ ኦኔ?
(ማቶ 18፡1-5፤ ማር 9፡33-37)
46 ኢዛ ካሊዛይቲ፥ «ኦኒ ኦናፔ ኣꬊዜ?» ጊዲ ባ ጊዶን ፓላሜቲዳ። ሉቃ 22፡24 47 ዬሱሲካ ኢስታ ዎዚና ቆፋ ኤሪዲ ጉꬃ ና ኤኪ ዪዲ ባ ማታን ኤሲዲ፥ 48 «ሃ ጉꬃ ናዛ ታ ሱንꬃን ኤኪዛዴይ ኦኒካ ዲኮ ታና ኤኬስ፤ ታና ኤኪዛዴይካ ታና ኪቲዳይሳ ኤኬስ፤ ኢንቴፌ ኡባታፔ ጉጺዛዴይ ኢዚ ኡባፌ ኣꬌስ» ጊዴስ። ማቶ 10፡40፤ ሉቃ 10፡16፤ ዮሃ 13፡20
ኢንቴ ጊዛይሳ ኢጾንታይ ኢንቴ ባጋ
(ማር 9፡38-40)
49 ዮሃኒሲካ፥ «ጎዶ! ኢሲ ኣሲ ኔ ሱንꬃን ዳይዳንꬅ ኬሲሺን ኑ ቤኢዶስ፤ ጊዶ ኣቲን ኢዚ ኑናራ ካሎንታ ጊሻስ ኑ ኢዛ ዲጋናስ ኮዪዶስ» ጊዴስ።
50 ዬሱሲካ፥ «ኢንቴና ኢጾንታ ኣሲ ዉሪ ኢንቴ ባጋ ጊዲዳ ጊሻስ ዲጎፍቴ» ጊዴስ።
ሳማሪያ ኣሳይ ዬሱሳ ሞካናስ ኮዪቤና
51 ዬሱሲ ሳሎ ቢዛ ዎዴይ ማቲዳ ጊሻስ ዬሩሳላሜ ባናስ ዴንዲዴስ። 52 ኢዚካ ሲንꬃሲዲ ኣሴ ኪቲዴስ፤ ኢስቲካ ኮሺዛ ሚሽ ጊጊሳናፔ ካሴቲዲ ሳማሪያ ቢታን ዲዛ ኢሲ ጉታ ቢዳ። 53 ጊዶ ኣቲን ዴሬይ ኢዚ ዬሩሳላሜ ቢዛይሳ ኤሪዳ ጊሻስ ሞኪ ኤኪቤና። 54 ኢዛ ካሊዛይታፔ ያቆቤይኔ ዮሃኒሲ ሃኒዛይሳ ቤኢዲ፥ «ጎዶ! ኤላሲ ኦꬆይሳꬆ፥ ‹ታማይ ሳሎፔ ዎꬊዲ ኢስታ ዲፒ ሂስቶ!› ጊዲ ኣዛዛና ማላ ኮያይ?» ጊዳ። *ኢሲ ኢሲ ጌሻ ማጻፋቲ፥ «ኤልያሲ ኦꬆይሳ ማላ» ጊዛ ቃላ ጉጄቴስ። 2ካዎ 1፡9-16
55 ጊዶ ኣቲን ዬሱሲ ኢስታኮ ዩዪዲ፥ «ኢንቴስ ኣይ ማላ ኣያናይ ዲዛኮ ኤሬኬቲ? ኣሳ ናይ ዪዳይ ኣሳ ሼምፖ ኣሻናስ ኣቲን ꬋይሳናስ ጊዴና» ጊዲ ኢስታ ሴሪዴስ። 56 ኢስቲ ዉሪካ ሃራ ጉታ ቢዳ።
ዬሱሳ ካሊዛይታ ጋኪዛ ፓጬ
(ማቶ 8፡19-22)
57 ኢስቲካ ቢሺን ኢሲ ኣሲ ኢስታኮ ሺቂዲ፥ «ኔኒ ቢዛ ኡባሶ ታ ኔና ካላና» ጊዴስ።
58 ዬሱሲ፥ «ዎራካናታስ ኣቂዛ ኦላይ፥ ካፎታስ ቃሴ ኣቂዛ ካፎ ኬꬂ ዴስ፤ ጊዶ ኣቲን ኣሳ ናስ ባ ሁኤ ኣይሲዛሶይካ ባ» ጊዴስ።
59 ዬሱሲካ ሂንኮይሳ፥ «ታና ካላ» ጊዴስ። ሄ ኣዴዚካ «ጎዶ! ታ ካሴታ ባዳ ታ ኣዋ ሞጎ?» ጊዴስ።
60 ዬሱሲካ፥ «ኣጋጋ፥ ሃይቂዳይቲ ሃይቂዳይታ ሞጌቶ። ኔኒ ጊዲኮ ባዳ ጾሳ ካዎቴꬃ ኣሳስ ዮታ» ጊዴስ።
61 ቃሴካ ሃራ ኣሲ፥ «ጎዶ! ታ ኔና ካላና ሺን ኮይሮ ሶ ባዳ ታ ኬꬃ ኣሳ ሳሮ ጋዳ ዮ?» ጊዴስ። 1ካዎ 19፡20
62 ጊዶ ኣቲን ዬሱሲ፥ «ቦራ ካሶ ኦይኪዲ ጎዪሼ ጉዬ ዛሪ ጼሊዛዴይ ኦኒካ ጾሳ ካዎቴꬃስ ቤሴና» ጊዴስ።