18
ኣምኤዮኔ ማካላ ዳናዛ
1 ባና ካሊዛይቲ ኣዛሎንታ ኡባ ዎዴ ዎሳናስ ቤሲዛይሳ ኤሪሳናስ ዬሱሲ ሃ ሌሚሶዛ ኢስታስ ዮቲዴስ። 2 «ኢሲ ካታማን ጾሳስ ያዮንታ ኣሲኔ ቦንቾንታ ኢሲ ዳናይ ዴስ። 3 ሄ ካታማንካ ኢሲ ኣምኤያ ዳዉስ። ኢዛካ፥ ‹ታ ባልጋራራ ታስ ሞቶይ ዲዛ ጊሻስ ፒርዳርኪ!› ጋሼ ኢዛኮ ሲሜሬታዱስ።
4 «ዳናዚካ ዳሮ ዎዴ ጋካናስ ኢዚስ ፒርዲቤና፤ ጊዶ ኣቲን ጉዬፔ ባ ዎዚናን፥ ‹ጾሳስ ያዮንታ ኣሴካ ቦንቾንታ ኣጊኮ፥ 5 ሃና ኣምኤያ ታና ዋዪሲዛ ጊሻስ ታ ኢዚስ ፒርዳና› ቆፒዴስ፤ ሄሳ ሂስቶንታ ኣጊኮ ኡባ ዎዴ ሲሜሬታዳ ኢዛ ታና ዳቡርሳና» ጊዴስ።
6 ጎዳይካ፥ «ማካላንቻ ዳናይ ጊዳይሳ ሲዪቴ፤ 7 ጾሲ ቃማ፥ ጋላሲኔ ኦማርስ ኢዛኮ ዋሲዛ ዶሬቲዳይታስ ፒርዴኔዬ? ታና ኣይ ሜቲዴ! ጊዲ ባ ማዶ ጋምኢሳንዴ? 8 ታ ኢንቴስ ጋይስ፤ ኢዚ ኢስታስ ኤሌ ፒርዳና፤ ጊዶ ኣቲን ኣሳ ናይ ዪዛ ዎዴ ቢታ ቦላ ኣማኖ ዴማንዴሻ?» ጊዴስ።
ኦቶራንቻ ፋርሳዌኔ ኣሽኬ ጊዲዳ ቃራጻ ሺሺዛዴ ሌሚሶ
9 ባና ጺሎ ኣሳ ማላ ቆዲዲ ጬቄቲዛይታሲኔ ሃራታ ሌቆ ኣይፌን ጼሊዛይታስ ሌሚሶራ፥ 10 «ናምኡ ኣሳቲ ዎሳናስ ጾሳ ኬꬄ ቢዳ፤ ኢሶይ ፋርሳዌ፥ ሂንኮይሲ ቃራጻ ሺሺዛዴ። 11 ፋርሳዌዚካ ኤቂዲ ባ ጊሻስ፥ ‹ጾሶ! ታኒ ሃራ ኣሳ ማላ ቦንቂዛዴ፥ ማካሊዛዴ፥ ላይማቲዛዴ ሃራፔካ ሃይሳ ቃራጻ ሺሺዛዴ ማላ ጊዶንታ ኣጊዳ ጊሻስ ታ ኔና ጋላታይስ። 12 ሳሚንታን ናምኣ ጾማይስ፤ ታስ ዲዛ ታማፌ ኢሳ ኢማይስ› ጊዲ ዎሲዴስ።
13 «ጊዶ ኣቲን ቃራጻ ሺሺዛ ኣዴዚ ሃሆን ኤቂዲ ፑዴ ሳሎ ꬎቁ ጊ ጼላናስ ኮዪቤና፤ ጊዶ ኣቲን ባ ቲራ ኢጪሼ፥ ‹ጾሶ! ታና ናጋራንቻዛ ማራርኪ!› ጊዴስ።
14 «ታ ኢንቴስ ዮታይስ፤ ጾሳ ሲንꬃን ፋርሳዌዚ ጺሎቴꬅ ዴሚቤና፤ ሃይሲ ቃራጺዛይሲ ጊዲኮ ጺሊዲ ባሶ ሲሚዴስ፤ ባና ꬎቂሲዛይ ዉሪ ዚቂ ጋና፤ ባና ዚቂሲዛይ ጊዲኮ ꬎቁ ጋና» ጊዴስ። ማቶ 23፡12፤ ሉቃ 14፡11
15 ዬሱሲ ቦሼሬꬃና ማላ ኣሳይ ጉꬃ ናይታ ኢዛኮ ኤሂዴስ። ኢዛ ካሊዛይቲካ ሄሳ ቤኢዲ ሃንቄቲዳ። 16 ጊዶ ኣቲን ዬሱሲ ጉꬃ ናይታ ባኮ ጼይጊዲ፥ «ጉꬃ ናይቲ ታኮ ያናይሳ ዲጎፍቴ፤ ጾሳ ካዎቴꬂ ሃይታንታ ማላሳ። 17 ታ ኢንቴስ ቱሙ ጋይስ፤ ጾሳ ካዎቴꬅ ጉꬃ ና ማላ ኤኮንታይ ዉሪ ኢዚን ጌሌና» ጊዴስ።
ሃ ቢታ ሃሮኔ ሳሎ ካዎቴꬅ
(ማቶ 19፡16-30፤ ማር 10፡17-31)
18 ኣይሁዳታ ሃላቃታፔ ኢሶይ፥ «ኪያ ኣስታማሬ! ሜርና ዴኦ ላታናስ ታ ኣይ ኦꬆ?» ጊ ኦይቺዴስ።
19 ዬሱሲካ፥ «ኣዛስ ታና ኪያ ጋይ? ኢሲ ጾሳፌ ኣቲን ኪያይ ሃራይ ዴና። 20 ‹ላይማቶፓ፤ ዎꬎፓ፤ ካይሶቶፓ፤ ዎርዶ ማርካቶፋ፤ ኔ ኣዋ ቦንቻ› ጊዛ ኣዛዞታ ኔ ኤራሳ» ጊ ዛሪዴስ። ኬሳ 20፡12-16፤ ዛሬ 5፡16-20
21 ኣዴዚካ፥ «ሃይታ ጊዲኮ ጉꬅ ናቴቴꬃፌ ዶማዳ ናጋዲስ» ጊዴስ።
22 ዬሱሲካ ሄሳ ሲዪዲ፥ «ሂስቲኮ ኔስ ኢሲ ሚሺ ፓጬስ፤ ኔስ ዲዛዝ ዉርሳ ባይዛዳ ማንቆታስ ኢማ፤ ሳሎ ማዝጋባን ዴማንዳሳ፤ ኢዛፔ ጉዬ ያዳ ታና ካላ» ጊዴስ። 23 ጊዶ ኣቲን ኣዴዚ ሄሳ ሲዪዳ ዎዴ ዳሮ ሃሮይ ኢዛስ ዲዛ ጊሻስ ኬሂ ሚሼቲዴስ።
24 ዬሱሲካ ኣዴዛ ጼሊዲ፥ «ዳሮ ሚሺ ዲዛ ኣሳቲ ጾሳ ካዎቴꬅ ጌላናይሲ ኣይ ማላ ሜቶ! 25 ዱሬይ ጾሳ ካዎቴꬅ ጌላናይሳፌ ጋሜላይ ናርፔ ሉኮራ ኣꬋናይሲ ማታና» ጊዴስ።
26 ሄሳ ሲዪዳ ኣሳይ፥ «ሂስቲን ኦኒ ኣታና ዳንዳይዜ?» ጊዴስ።
27 ዬሱሲካ፥ «ኣሳ ኣቻን ዳንዳዬቶንታይ ጾሳ ኣቻን ዳንዳዬቴስ» ጊዴስ።
28 ጴጽሮሲካ፥ «ሄኮ ኑኒ ኑስ ዲዛዝ ኡባ ኣጊዲ ኔና ካሊዶስ» ጊዴስ።
29 ዬሱሲካ ኢስታስ፥ «ታ ኢንቴስ ቱሙ ጋይስ፤ ጾሳ ካዎቴꬃ ጊሻስ ጊዲ ባ ኬꬄ፥ ባ ማቾ፥ ባ ኢሻንታ ዎይኮ ባና ዬሊዳይታ ዎይኮ ባ ናይታ ኣጊዳዴይ፥ 30 ሃኢ ዎዴ ዳሮ ዳኮ ኩሼ ኤኮንታይኔ ዪዛ ዎዴ ቃሴ ሜርና ዴኦ ኤኮንታይ ኦኒካ ዴና» ጊዴስ።
ዬሱሲ ባ ሃይቆ ጊሻሲኔ ዴንꬃ ጊሻስ ሄꬓንꬆ ዮቲዴስ
(ማቶ 20፡17-19፤ ማር 10፡32-34)
31 ዬሱሲካ ባና ካሊዛ ታማኔ ናምኣታ ዱማ ኤፊዲ፥ «ሃኢ ኑኒ ዬሩሳላሜ ኬዛና ጎስ፤ ናቤቲ ኣሳ ና ጊሻስ ጻፊዳይሲ ዉሪ ፖሌታና። 32 ኣይዛቤታስ ኣꬂ ኢማና፤ ኢስቲካ ኢዛ ቂꬊ ካኣናኔ ዋዪሳና፤ ኢዛ ቦላ ጩታና። 33 ጋራፋና፤ ሄሳፌካ ዛሪዲ ዎꬋና፤ ኢዚካ ሄꬓንꬆ ጋላስ ሃይቆፔ ዴንዳና» ጊዴስ።
34 ኢዛ ካሊዛይቲ ጊዲኮ ሄሳ ኡባፌ ኢሲኖካ ኤሪቤቴና፤ ኢዚ ጊዛይሲካ ኢስታስ ጌሊቤና። ኢዚ ኣዛ ጊሻስ ሃሳይዳኮ ኤሪቤቴና።
35 ዬሱሲ ኢያርኮ ጌቴቲዛሶ ማቲዳ ዎዴ ኢሲ ቆቄ ኣዴይ ኦጌ ዶናን ኡቲዲ ዎሴስ። 36 ሄ ቆቄ ኣዴዚካ ዳሮ ኣሳይ ኦጌራ ኣꬊዛይሳ ሲዪዲ፥ «ሄሲ ኣዜ?» ጊ ኦይቺዴስ። 37 ኢስቲካ ኢዛስ፥ «ናዚሬቴ ዬሱሲ ሃይሳራ ኣꬌስ» ጊ ዮቲዳ።
38 ኢዚካ፥ «ዳዊቴ ና ዬሱሳ ታስ ቃꬌታ!» ጊ ዋሲዴስ።
39 ዬሱሳፔ ሲንꬃቲ ቢዛይቲ፥ «ጮኡ ጋ!» ጊዲ ሃንቄቲዳ። ጊዶ ኣቲን ኢዚ፥ «ዳዊቴ ናዉ! ታስ ቃꬌታ!» ጊዲ ዳርሲ ዋሲዴስ። 40 ዬሱሲካ ኤቂዲ ኣዴዛ ኢዛኮ ኤሃና ማላ ኣዛዚዴስ፤ ኢዚካ ኢዛኮ ሺቂዳ ማላ፥ 41 «ታ ኔስ ኣይ ኦꬃና ማላ ኮያይ?» ጊዲ ኦይቺዴስ። ቆቄዚካ፥ «ጎዶ ጼላናስ ኮያይስ» ጊዴስ።
42 ዬሱሲካ፥ «ኔና ኔ ኣማኖይ ፓꬂዴስ ጼላ» ጊዴስ። 43 ኣዴዚ ሄራካ ጼሊዴስ፤ ጾሳካ ቦንቺሼ ዬሱሳ ካሊዴስ፤ ሄሳ ቤኢዳ ዴሬይ ዉሪ ጾሳ ጋላቲዴስ።