ማቶሲ ጻፊዳ
ኑ ጎዳ ዬሱስ ኪርስቶሳ ሚሺራቾ ቃላ
ጊዶ ቆፋ
ማቶሳ ሚሺራቾ ቃላይ፥ ዬሱስ ኪርስቶሲ ቡሮፔ ያናይሳ ሲንꬃሲዲ ኢዛ ጊሻስ ዮቴቲዳ ዴሬ ኣሻናዴይ ኢዛ ጊዲዳይሳኔ ጾሲ ካሴ ጋልኣ ጫቆ ማጻፋን ባ ዴሬዛስ ኢሚዳ ሂዶታ ቃላ ኩንꬂዳይ ኢዛ ባጋራ ጊዲዳይሳ ዮቲዛ ሚሺራቾ ቃላራ ዴስ። ሄሲካ ሄ ሚሺራቾ ቃላይ፥ ዬሱስ ኪርስቶሲ ኢስታ ጊዶን ዬሌቲ ዲጪዳ ኣይሁዳ ኣሳስ ጻላላ ጊዶንታ ኣላሜ ኣሳስ ኩሜꬃሳ።
ማቶሳ ሚሺራቾ ቃላይ፥ ዳሮፔ ናጌቴꬃን ጊጌቲዳ ማጻፋ። ማጻፋዚ ኮይሮፔ ዬሱሳስ ዬሌታ ጊሻስ ዮቶ ዶሚዲ ኢዛ ጺንቃታ ጊሻሲኔ ኢዚ ፓጬቲዳ ፓጬዛ ሎኤꬂ ዮቲዳፔ ጉዬ ኢዚ ጋሊላ ዴሬን ሳባኪዳይሳ፥ ታማርሲዳይሳኔ ኣሳ ሃርጌፌ ፓꬂዳይሳ ቆንጪሴስ። ቃሴካ ዬሱሲ ጋሊላ ዴሬፔ ዬሩሳላሜ ቢዳይሳ፥ ኢዚ ሃይሳ ሃ ኣላሜዛ ቦላ ዴኢዳ ዴኦ ጊሻሲኔ ሃ ኣላሜዛ ቦላ ጋምኢዳ ዉርሴꬃ ላይꬃን ዉርሴꬃ ሳሚንታን ሃኒዳ ሃኖታ ጊሻስ ዮቴስ። ሄይቲካ ዬሱሲ ካቄቲዳይሳ፥ ሃይቂዳይሳኔ ሃይቆፔ ዴንዲዳይሳ።
ሃ ሚሺራቾ ቃላዚ፥ ዬሱሲ ጾሳ ዎጋ ቢርሻናስ ኢዛስ ጎዳቴꬂ ዲዛዴኔ ጾሳ ካዎቴꬃ ጊሻስ ታማርሲዛ ጊታ ኣስታማሬ ሂስቲ ሺሼስ። ኢዛ ቲሚርቴዛፔ ዳሪዛ ባጋይ ኢቻሹ ዱማ ዱማ ኪፊሌን ሻኬቴስ።
1. ጾሳ ካዎቴꬃን ዲዛይታ ሃኖ፥ ኢስታ ኦሶ፥ ኢስታ ሼኔ፥ ኢስቲ ሃናና ማላ ኢስታስ ቤሲዛዚኔ ኢስታስ ቤሲዛ ዉርሴꬃ ኤጻ ሻኪ ኤሪሲዛ ዙማ ቦላ ሳባኪዳ ቃላ (ሼምፖ 5-7)
2. ታማኔ ናምኡ ኢዛ ኣሽካራቲ ሚሺራቾ ቃላ ዮታናስ ኪቴቲ ቢሺን ኢስታስ ኢሜቲዳ ዎጋታ (ሼምፖ 10)
3. ጾሳ ካዎቴꬃ ጊሻስ ሺቂዳ ዱማ ዱማ ሌሚሶታ (ሼምፖ 13)
4. ዬሱሳ ዎስቲ ካላናኮን ኢስታስ ጌላና ማላ ኢሜቲዳ ቲሚርቴ (ሼምፖ 18)
5. ሃይሳ ሃ ዎዴዛ ዉርሴꬃ ጊሻሲኔ ጾሳ ካዎቴꬃይ ያናይሳ ጊሻስ ኢሜቲዳ ቲሚርቴ (ሼምፖ 24-25)
ሃ ማጻፋይ ኦይኪዳ ኩሜꬃ ቆፋ
ዬሱስ ኪርስቶሳ ዬሌታ ዛርኬኔ ኢዛ ዬሌታ 1፡1—2፡23
ጻማቂዛ ዮሃኒሳ ኦሶ 3፡1-12
ዬሱሳ ጻማቄቴꬂኔ ኢዛ ፓጬቴꬅ 3፡13—4፡11
ዬሱሲ ጋሊላን ኦሶ ዶሜꬅ 4፡12—18፡35
ዬሱሲ ጋሊላፔ ዬሩሳላሜ ቡስ 19፡1—20፡34
ዉርሴꬃ ሳሚንታን ዬሱሳ ጋኪዳ ሜቶታ 21፡1—27፡66
ዬሱሲ ሃይቆፔ ዴንዲ ቤቲዴስ 28፡1-20
1
ዬሱስ ኪርስቶሳ ዬሌታ ዛርኬ
(ሉቃ 3፡23-38)
1 ዳዊቴ ና፥ ኣብራሃሜ ና ጊዲዳ ዬሱስ ኪርስቶሳ ዬሌታ ዛርኬይ ሃይሳፌ ካሊዛይሳ፤
2 ኣብራሃሜይ ዪሳቃ ዬሊዴስ፤ ዪሳቂ ያቆቤ ዬሊዴስ፤ ያቆቤይ ዩሁዳኔ ኢዛ ኢሻታ ዬሊዴስ፤ 3 ዩሁዳይ ቲማሪፔ ፋሬሴኔ ዛራ ዬሊዴስ፤ ፋሬሴይ ኤስሮሜ ዬሊዴስ፤ ኤስሮሜይ ኣራሜ ዬሊዴስ፤ 4 ኣራሜይ ኣሚናዳቤ ዬሊዴስ፤ ኣሚናዳቤይ ኔኣሶኔ ዬሊዴስ፤ ኔኣሶኔይ ሶሎሞኔ ዬሊዴስ፤ 5 ሶሎሞኔይካ ቦኤዜ ኤራቢፔ ዬሊዴስ፤ ቦኤዜይ ኡሩቲፔ ኢዮቤዴ ዬሊዴስ፤ ኢዮቤዴይ ኢሴዬ ዬሊዴስ፤ 6 ኢሴዬይ ካዎ ዳዊቴ ዬሊዴስ፤ ዳዊቲ ኦሪዮ ማቼይፌ ሶሎሞኔ ዬሊዴስ።
7 ሶሎሞኔይ ኤሮቢኣሜ ዬሊዴስ፤ ኤሮቢኣሜይ ኣቢያ ዬሊዴስ፤ ኣቢያይካ ኣሳፌ ዬሊዴስ፤ 8 ኣሳፌይ ኢዮሳፊጼ ዬሊዴስ፤ ኢዮሳፊጼይ ኢዮራሜ ዬሊዴስ፤ ኢዮራሜይ ኦዚያ ዬሊዴስ፤ 9 ኦዚያይ ኢዮኣታሜ ዬሊዴስ፤ ኢዮኣታሜይ ኣካዜ ዬሊዴስ፤ ኣካዜይ ሂዝቂያሳ ዬሊዴስ፤ 10 ሂዝቂያሲ ሚናሴ ዬሊዴስ፤ ሚናሴይ ኣሞጼ ዬሊዴስ፤ ኣሞጼይ ኢዮሲያሳ ዬሊዴስ፤ 11 ኢዮሲያሲ ባቢሎኔ ዲኦ ላይꬅ ኢኮኒያኔኔ ኢዛ ኢሻታ ዬሊዴስ።
12 ባቢሎኔ ዲኦፔ ጉዬ ኢኮኒያኔይ ሳላቲያሌ ዬሊዴስ፤ ሳላቲያሌይ ዜሩባቤሌ ዬሊዴስ፤ 13 ዜሩባቤሌይ ኣቢዮዴ ዬሊዴስ፤ ኣቢዮዴይ ኤልያቄሜ ዬሊዴስ፤ ኤልያቄሜይ ኣዛሬ ዬሊዴስ፤ 14 ኣዛሬይ ሳዶቄ ዬሊዴስ፤ ሳዶቄይ ኣኪሜ ዬሊዴስ፤ ኣኪሜይ ኤሊዮዴ ዬሊዴስ፤ 15 ኤሊዮዴይ ኣላዛሬ ዬሊዴስ፤ ኣላዛሬይ ማታኔ ዬሊዴስ፤ ማታኔይ ያቆቤ ዬሊዴስ፤ 16 ያቆቤይካ ኪርስቶሳ ጌቴቲዳይሳ ዬሱሳ ዬሊዳ ማራሞ ኤካና ጊግሲዳ ዮሴፌ ዬሊዴስ። *ኪርስቶሳ ኪርስቶሳ ጉሲ፥ «ማሲሄ» ዎይኮ «ቲዬቲዳይሳ» ጉሳ።
17 ሄሳ ጊሻስ ኣብራሃሜፔ ዪዲ ዳዊቴ ጋካናስ ታማኔ ኦይዱ ዬሌቴꬅ፤ ቃሴ ዳዊቴፔ ባቢሎኔ ዲኦ ዎዴ ጋካናስ ታማኔ ኦይዱ ዬሌቴꬅ፤ ባቢሎኔ ዲኦፔ ኪርስቶሳ ዬሌታ ጋካናስ ታማኔ ኦይዱ ዬሌታ ጊዴስ።
ዬሱስ ኪርስቶሳ ዬሌታ
18 ዬሱስ ኪርስቶሳ ዬሌታ ታሪኬይ ሃይሳፌ ካሊ ዲዛይሳ፤ ኢዛ ኣዮ ማራማ ዮሴፌስ ጊጌታ ዲሺን ኢዚ ኢዚራ ጋይቶንታ ጺሎ ኣያናን ቃንꬃታዳ ቤታዱስ። ሉቃ 1፡27 19 ኢዞ ጊግሲዳ ዮሴፌይ ጺሎ ኣስ ጊዲዳ ጊሻስ ማራሞ ኣሳ ሲንꬃን ቆንጬ ኬሶንታ ቆታራ ኣጋናስ ባ ዎዚናራ ቃቺዴስ። 20 ሃይሳ ኢዚ ቆፒሺን ጾሳ ኪታንቻይ ኣጉሞራ ኢዛስ ቆንጪዲ፥ «ዳዊቴ ና ዮሴፌ! ኔ ጊግሲዳ ማራማ ቃንꬃቲዳይ ጺሎ ኣያናን ጊዲዳ ጊሻስ ኢዞ ኔሶ ኤፋናስ ባቦፋ። 21 ኢዛ ኣቱማ ና ዬላና፤ ኢዚ ኣስ ናጋራፔ ኣሻናዴ ጊዲዳ ጊሻስ ኢዛ ሱንꬅ ኔ፥ ‹ዬሱሳ› ጋ ሱንꬃና» ጊዴስ። ሉቃ 1፡31
22-23 ጎዳይ ናቤ ኢሳያሳ ዶናን፥ «ሄኮ! ጌላኦይ ቃንꬃታና፤ ኣቱማ ናካ ዬላና፤ ናዛ ሱንꬃይካ ኣማኑኤሌ ጌቴታና፤ ሄሳ ቢርሼꬂካ፥ ‹ጾሲ ኑናራ ዴስ› ጌቴቲዲ ጻፌቲዳይሲ ፖሌታና ማላ ሃይሲ ዉሪካ ሃኒዴስ» ጊዴስ። ኢሳ 7፡14
24 ዮሴፌይካ ꬊስኮፌ ቤጊዲ ጎዳ ኪታንቻይ ኢዛ ኣዛዚዳ ማላ ማራሞ ባሶ ኤፊዴስ።
25 ጊዶ ኣቲን ባዳ ኢዛ ኮይሮ ናዛ ዬላና ጋካናስ ኢዞ ኤኪቤና። ዬሌቲዳ ጉꬃ ናዛ ሱንꬃ፥ «ዬሱሳ» ጊዴስ። ሉቃ 2፡21