6
ማንቆስ ማዶ ኢሞ
1 «ኣሲ ኢንቴና ቤያና ማላ ኣሳ ሲንꬃን ሎኦ ኦꬆንታ ማላ ናጌቲቴ፤ ሄሳꬆ ኦꬂኮ ኢንቴ ሳሎ ኣዋፔ ጎኣ ዴሜኬታ። ማቶ 23፡5 2 ኢንቴ ማንቆታስ ማዶ ኢሚዛ ዎዴ ኣሲ ታና ቤዮ ጊዲ ኣሳ ሲንꬃን ቦንቼታናስ ኦጌኒኔ ኣይሁዳ ዎሳ ኬꬃን ጹሩምባ ፑኒሲዛ ቆꬌፔ ቆሞን ሃኒዛይታꬆ ኦꬆፍቴ። ታ ኢንቴስ ቱሙ ጋይስ፤ ኢስቲ ባ ዋጋ ኡባ ሃን ኤኪዳ። 3 ኢንቴ ማንቆታስ ኢሚሺን ኡሻቻ ኩሼይ ኦꬂዛ ሃዲርሳ ኩሼይ ኤሮፖ። 4 ኢንቴ ኢሞይ ጌማን ጊዶ፤ ቆታን ኦሴቲዳይሳ ቤኢዛ ኢንቴ ኣዋይካ ኢንቴ ዋጋ ኢንቴስ ኢማና።
ዎሳ ጊሻስ
(ሉቃ 11፡2-4)
5 «ኢንቴ ዎሲሼ ቆꬌፔ ቆሞን ሃኒዛይታ ማላ ሃኖፒቴ፤ ኢስቲ ኣሲ ቤያና ማላ ኣይሁዳ ዎሳ ኬꬃታኒኔ ኦይዱ ኦጌ ቦላ ኤቂዲ ዎሳናስ ዶሴቴስ። ታ ኢንቴስ ቱሙ ጋይስ፤ ኢስቲ ኩሜꬃ ዋጋ ኤኪቺዳ። ሉቃ 18፡10-14 6 ኔኒ ዎሳና ጌሊዛ ኔ ኪፊሌ ጌላ፤ ካሬካ ኔ ቦላ ጎርዳዳ ጌማን ዲዛ ኔ ኣዋኮ ዎሳ። ጌማን ኦሴቲዳይሳ ቤኢዛ ኔ ኣዋይ ኔ ኦሶ ማላ ኔስ ኢማና።
7 «ኣማኖንታ ኣሳይ ኢሲ ቃላ ዛሪ ዛሪ ዎሲኮ ኢስታስ ሲዬቲዛ ሚሳቲን ኢስቲ ዛሪ ዛሪ ጊዛይሳꬆ ኢንቴካ ዎሲሼ ኢሲ ቃላ ዛሪ ዛሪ ጎፒቴ። 8 ጊዶ ኣቲን ኢንቴ ኣዋይ ኢንቴ ዎሳናፔ ካሴቲዲ ኢንቴስ ኣዚ ኮሺዛኮ ኤሪዛ ጊሻስ ኢንቴ ኢስታ ሚሳቶፒቴ። 9 ኢንቴ ዎሲሼ፥
« ‹ሳሎን ዲዛ ኑ ኣዋዉ!
ኔ ሱንꬂ ኣንጄቶ።
10 ኔ ካዎቴꬂ ሃ ዮ፤
ኔ ሼኔይ ሳሎን ጊዲዳ ማላ
ሳኣንካ ሃኖ።
11 ሃቺስ ጊዲዛ ካꬅ
ኑስ ሃች ኢማ።
12 ኑ ኑና ቆሂዳይታስ
ኣቶ ጊዛ ማላ
ኔካ ኑ ቆሆ ኑስ ኣቶ ጋ።
13 ኢታፔ ኑና ኣሻ ኣቲን
ኑና ፓጬን ጌልꬆፋ፤
ቦንቾይ ሜሪፔ
ሜርና ጋካናስ ኔይሳ።
ኣሚን› ጊ ዎሲቴ።
14 «ኢንቴ ኢንቴና ቆሂዳይታስ ኣቶ ጊኮ ኢንቴ ሳሎ ኣዋይካ ኢንቴስ ኣቶ ጋና። 15 ቃሴ ኢንቴ ኣሳ ናጋራ ኣቶ ጎንታ ኢጺኮ ኢንቴ ኣዋይካ ኢንቴ ናጋራ ኣቶ ጌና።
ጾማ ጊሻስ
16 «ኢንቴ ጾማ ጾሚሼ ቆꬌፔ ቆሞን ጾሚዛይታꬆ ሹሎፍቴ። ኢስቲ ባ ጾሚዛይሳ ኣሲ ኤራና ማላ ባ ኣይፌሶ ኢሴቴስ። ታ ቱሙ ጋይስ፤ ሄሳꬆ ኦꬂዛይቲ ባ ዋጋ ኩሜꬅ ኤኪቺዳ። 17 ኔኒ ጾማ ጾማሼ ኔ ኣይፌሶ ሜጬታ፥ ኔ ሁኤ ቲዬታ። 18 ሄሳꬆ ኔ ጾሚኮ ጌማን ዲዛ ኔ ኣዋይ ጻላላ ኤሪዛዚኔ ኣሲ ኦኒካ ኤሮንታ ቆታን ጊዳና። ቆታን ኦሴቲዳይሳ ቤኢዛ ኔ ኣዋይካ ኔ ዋጋ ኔስ ኢማና።
ሳሎን ዲዛ ሃሮ
(ሉቃ 12፡33-34)
19 «ቢላይ ሚዛሶን ቡቂዲኔ ሺይዲ ሞሬቲዛሶን፥ ካይሶይ ቦኪዲ ካይሳናስ ዳንዳይዛሶን፥ ሃ ቢታ ቦላ ኢንቴስ ሚሽ ሺሾፍቴ። ያቆ 5፡2-3 20 ጊዶ ኣቲን ቢላይ ማናስ፥ ቡቂዲ ዎይኮ ሺይዲ ሞሬቶንታሶን፥ ካይሶይ ቦኪ ኤካና ዳንዳዮንታሶን ሄን ሳሎን ኢንቴስ ሚሽ ሺሺቴ። 21 ኔ ሚሻይ ዲዛሶን ኔ ዎዚናይ ሄን ዴስ።
22 «ኣይፌይ ኣሳቴꬃስ ፖኦ፤ ሄሳ ጊሻስ ኔ ኣይፌይ ፓጻ ጊዲኮ፥ ኔ ኩሜꬃ ኣሳቴꬃይካ ፖኦ ጊዳና። 23 ኔ ኣይፌይ ሃርጋንቻ ጊዲኮ፥ ኔ ኩሜꬃ ኣሳቴꬃይካ ꬉማ ጻላ ጊዳና። ሂስቲኮ ኔናን ዲዛ ፖኦይ ꬉማ ጊዲኮ፥ ቃሴ ꬉማይ ዋኒዳ ጊርዲ ጊዳ ꬉማ ጊዳንዴ?
24 «ኢሲ ኣሲ ናምኡ ጎዳስ ኦꬃና ዳንዳዬና። ኢሳ ኢጺዲ ናምኣንꬆዛ ዶሳና፤ ዎይኮ ኢሳ ቦንቺዲ ናምኣንꬆዛ ሌቃና፤ ጾሳሲኔ ሚሻስ ናምኣታስ ጋꬂ ኦꬃናስ ዳንዳዬቴና።
ዳሮ ቆፖፍቴ
25 «ሄሳ ጊሻስ ታ ኢንቴና ኢንቴ ዱሳ ጊሻስ፥ ‹ኣይ ሚኖ? ኣይ ኡዪኖ? ኣይ ማይኢኖ?› ጊዲ ሂርጎፍቴ ጋይስ። ሼምፖይ ቁማፔ፥ ኣሾይ ማይኦፌ ኣꬌኔ? 26 ኣኔ ሳሎ ካፎታ ጼሊቴ! ዜሬቴና፤ ማጼቴና፤ ዲኤን ቆሌቴና፤ ጊዶ ኣቲን ኢንቴ ሳሎ ኣዋይ ኢስታ ሚዜስ። ኢንቴ ኢስታፌ ኬሂ ኣꬌኬቲ? 27 ኣኔ ኢንቴፌ ዳሮ ዋዬቲዲ ባስ ኢሜቲዳ ላይꬃ ቦላ ሃራ ኢሲ ጋላስ ጉጃና ዳንዳይዛ ኣሲ ዲዜ?*ባስ ኢሜቲዳ ላይꬃ ቦላ ሃራ ኢሲ ጋላስ ጉጃና ዳንዳይዛ ኣሲ ዲዜ? ጊዛይሳ ኢሲ ኢሲ ጌሻ ማጻፋታ ቢርሼꬃን «ባስ ዲዛ ኣዱሳቴꬃ ቦላ ኢሲ ዋꬋ ፑዴ ጉጃናስ ዳንዳይዛ ኣሲ ዲዜ?» ጊዛዚ ዴስ።
28 «ቃሴ ማይኦ ጊሻስ ኣዛስ ሂርጌቲ? ኣኔ ጮ ዴምባን ዲዛ ጪሻታ ጼሊቴ፤ ዳቡሬቴና ዎይኮ ሱቄቴና። 29 ሄሳ ጊሻስ ታ ኢንቴና ጊዛይ ሃራይ ኣቶሺን ካዎ ሶሎሞኔይካ ባ ቦንቾራ ሃ ጪሻታፔ ኢሲኔይ ማላ ሎኦ ማይኢቤና። 30 ኢንቴኖ ፓጬ ኣማኖይ ዲዛይቶ! ሃች ኣሳ ኣይፌን ቤቲዲ ዎንቶ ታማን ዎꬋና ማታ ሃይሳꬆ ማይዚዛ ጾሲ ኢንቴና ሄሳፌ ሎኤꬂ ኣꬂ ማይዛናስ ዳንዳዬኔ? 31 ሄሳ ጊሻስ ኑ ኣይ ማኔ? ኣይ ኡያኔ? ኣይ ማይኣኔ? ጊዲ ሂርጎፍቴ። 32 ሃንኮ ኣማኖንታ ኣሳይ ሃይሳ ዴማናስ ዳሮ ቆፔስ። ሃይሲ ዉሪ ኢንቴስ ኮሺዛይሳ ኢንቴ ሳሎ ኣዋይ ኤሬስ። 33 ሃራፔ ሲንꬃቲዲ ጾሳ ካዎቴꬃ ጺሎቴꬅ ኮዪቴ፤ ሃይቲ ዉሪ ኢንቴስ ጉጄታና። 34 ሄሳ ጊሻስ ዎንቶስ ኬሂ ቆፖፍቴ፤ ዎንቶ ሜቶይ ዎንቶስ ኣቆ፤ ኢሲ ኢሲ ጋላሳይ ባስ ባስ ጊዲዛ ሜቶራ ዴስ።