1 ዬሱሲ ጾሳ ኬꬃፌ ኬዚ ቢሺን ኢዛ ካሊዛይቲ ጾሳ ኬꬃዚ ሹቻን ኬጼቲዳይሳ ቤሳና ኮዪዲ ዬሱሳኮ ሺቂዳ። 2 ኢዚካ ኢስታስ፥ «ሃይሳ ኡባ ጼሌቲ? ታ ኢንቴስ ቱሙ ጋይስ፤ ሃይሲ ኢንቴ ቤኢዛ ኢሶይ ኢሳ ቦላ ዲዛ ሹቻይ ላሌቶንታ ኢሲ ሹቺካ ሃይሳꬆ ዴና» ጊዴስ።

3 ኢዚ ዳብራዛይቴ ጌቴቲዛ ዙማ ቦላ ኡቲ ዲሺን ኢዛ ካሊዛይቲ ጻላላ ኢዛኮ ሺቂዲ፥ «ኣኔ ኑስ ዮታ፤ ሃይሲ ኔ ጊዛይሲ ኣይዴ ሃናኔ? ኔ ዩሳሲኔ ዎዴ ዉርሴꬃስ ማላታይ ኣዜ?» ጊ ኦይቺዳ።

4 ዬሱሲካ ዛሪዲ፥ «ኦኒካ ኢንቴና ባሌꬆንታ ማላ ናጌቲቴ። 5 ቡሮ ዳሮቲ፥ ‹ታ ኪርስቶሳ› ጊሼ ታ ሱንꬃን ያና፤ ዳሮታካ ባሌꬃና። 6 ኦላኔ ኦላ ጊሻስ ሃሳዬቲዛ ዎሬ ኢንቴ ሲያና። ሃ ዮኦቲ ዉሪካ ዎልቃራ ፖሌታና ሺን ዉርሴꬂ ቡሮ ጊዲዳ ጊሻስ ኢንቴ ሃይሳን ዳጋሞንታ ማላ ናጌቲቴ። 7 ዴሬይ ዴሬ ቦላ፥ ካዎይ ካዎ ቦላ ዴንዳና፤ ዱማ ዱማ ዴሬን ኮሻይኔ ቢታ ቃꬂ ሃናና። 8 ሄሲ ዉሪካ ሚጻስ ሌሶ ማላ። 9 ሄ ዎዴ ኢንቴና ዋዬስ ኣꬂ ኢማና፤ ኢንቴና ዎꬋና፤ ታ ሱንꬃ ጋሶን ዴሬ ኡባን ኢንቴ ኢጼቲዳይታ ጊዳና። ማቶ 10፡22

10 «ሄ ዎዴ ዳሮ ኣሳይ ꬉጴታና፤ ኢሶይ ኢሳ ኣꬂ ኢማናኔ ባ ጊዶን ኢጼታና። 11 ዳሮ ዎርዶ ናቤቲ ዴንዳናኔ ዳሮታ ባሌꬃና። 12 ኢታቴꬂ ዳሪዛ ጊሻስ ዳሮታፔ ሲቆይ ኢርጻና። 13 ዉርሴꬅ ጋካናስ ሚኒዳዴይ ኣታና። ማቶ 10፡22 14 ዴሬ ኡባስ ማርካ ጊዳና ማላ ሃይሲ ካዎቴꬃ ሚሺራቾ ቃላይ ኩሜꬃ ኣላሜን ዮቴታና፤ ሄሳፌ ጉዬ ዉርሴꬂ ያና።

15 «ሄሳ ጊሻስ ናቤ ዳኔላን ዮቴቲዳይሳ ማላ፥ ‹ሃራሲዛ ቱናቴꬂ› ኣንጄቲዳሶን ኤቂዳይሳ ኢንቴ ቤኢዛ ዎዴ ናባቢዛዴይ ዎዚናን ዎꬆ፤ዳኔ 9፡27፤ 11፡31፤ 12፡11 16 ሄ ዎዴ ዩሁዳን ዲዛይቲ ፑዴ ዙማ ቦላ ጋንጌቶ። 17 ኬꬃ ካራ ቦላ ዲዛዴይ ኦኒካ ባ ሚሽ ኬꬃፌ ኬሳና ጊዲ ዱጌ ዎꬎፎ።ሉቃ 17፡31 18 ጋዴ ጊዶን ዲዛዴይ ኦኒካ ባ ማይኦ ኤካና ጊዲ ሶ ሲሞፎ። 19 ሄ ጋላሳታን ቃንꬃራ ዲዛ ማጫሳታሲኔ ና ꬋንꬂዛ ኣዬታስ ኣዬ ኣና! 20 ሄሳ ጊሻስ ኢንቴ ጋንጎይ ባልጎ ዎይኮ ሳምባታ ጋላስ ጊዶንታ ማላ ዎሲቴ። 21 ሄ ዎዴ ኣላሜይ ሜꬌቶሶፔ ሃች ጋካናስ ሃኒ ኤሮንታ ሚሺ ሲንꬃፌካ ኢዛ ሚሳቲዛይ ባይንዳ ዎልቃማ ሜቶይ ሃናና። 22 ሄ ጋላሳቲ ቃሞንታኮ ኣሾ ማይኢዳ ኣሲ ዉሪ ኣቴና ሺን ዶሬቲዳይታ ጊሻስ ሄ ጋላሳቲ ቃማና።

23 «ሄ ዎዴ ኦኒካ፥ ‹ሄኮ ኪርስቶሲ ሃይሳን ዴስ!› ዎይኮ፥ ‹ሄሳን ዴስ› ጊዛዴ ኣማኖፒቴ። 24 ዎርዶ ኪርስቶሲኔ ዎርዶ ናቤቲ ቡሮ ዴንዲዲ ኢስታስ ዳንዳዬቲኮ ዶሬቲዳይታ ባሌꬃናስ ጊዲ ዎልቃማ ማላታታኔ ካሴ ኦሴቲ ኤሮንታ ሚሽ ኦꬃና።

25 «ሄኮ ሃይሳ ታ ኢንቴስ ካሴታ ዮታይስ። 26 ሄሳ ጊሻስ፥ ‹ሄኮ ሂርኪ ባዞን ዴስ› ጊዲ ኢንቴስ ዮቲኮ ሄ ኬዞፒቴ፤ ‹ሄኮ ኢልፒኔን ዴስ› ጊኮ ኣማኖፒቴ። ሉቃ 17፡23-24 27 ዎልቃንꬂ ኣርሼይ ሞኪዛሶራ ዎልቃሚዲ ኣርሼይ ዉሊዛሶ ጋካናስ ፖኢዛይሳ ማላ ኣሳ ና ዩሳይካ ሄሳꬆ ሃናና። 28 ኣሃይ ዲዛሶ ኣንኮይ ሺቄስ። ሉቃ 17፡37

29 «ሄራካ ሄ ኢታ ሜቶ ጋላሳታፔ ጉዬ

30 «ሄ ዎዴ ኣሳ ና ማላታይ ሳሎ ቦላ ቤታና። ቢታ ቦላ ዲዛ ዴሬይ ዉሪ ዬካና፤ ኣሳ ናይካ ሳሎ ሻራ ቦላ ዳሮ ዎልቃራኔ ጊታ ቦንቾራ ዪሺን ኣሳይ ቤያና። 31 ኪታንቻታካ ዳሮ ዎልቃማ ጹሩምባ ጊሪሳራ ዬዳና። ኢስቲካ ዶሬቲዳይታ ኦይዱ ጉላፔ ሳሎስ ሃ ጋጻፔ ሄ ጋጻ ጋካናስ ኡባ ኢሲሶ ሺሻና።

32 «ባላሴ ጌቴቲዛ ሚꬃፌ ሃይሳ ታማርቴ፤ ባላሴ ሚꬃይስ ኡንቁሎይ ጪሊሊዛ ዎዴ ኢዛ ሃይꬅ ኬሲሺን ቦኔይ ማቲዳይሳ ኢንቴ ኤሬታ። 33 ሄሳꬆካ ሃይታ ኢንቴ ቤኢዛ ዎዴ ኢዚ ፔንጌ ማቲዳይሳ ኢንቴ ኤራና። 34 ታ ቱሙ ጋይስ፤ ሃይሲ ዉሪ ፖሌታና ጋካናስ ሃ ዬሌታይ ኣꬌና። 35 ሳሎይኔ ሳኣይ ኣꬋና ሺን ታ ቃላይ ጊዲኮ ሙሌካ ኣꬌና።

36 «ሄ ጋላሳዮኔ ሄ ሳቴዮ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና። 37 ኖሄ ዎዴ ሃኒዳይሳ ማላ ኣሳ ና ዩሲ ሄሳ ማላ ጊዳና። ሜꬌ 6፡5-8 38 ꬋይሲዛ ሃꬃፌ ካሴ ኖሄይ ማርካቤን ጌሊዛ ጋላስ ጋካናስ ኣሳይ ሚሼኔ ኡዪሼ፥ ኤኪሼኔ ጌልሼ ጋምኢዴስ። 39 ሄ ዎዴይ ጋካናስ ኣዚ ሃናናኮ ኣሳይ ኤሮንታኔ ቆፖንታ ባሻ ሃꬂ ዪዲ ሚቲዳይሳ ማላ ታ ኣሳ ናይ ዪዛ ዎዴይካ ሄሳꬆ ሃናና። ሜꬌ 7፡6-24

40 «ሄ ዎዴ ናምኡ ኣሳቲ ኢሲፌ ጎሻን ፔኣና ሺን ኢስታፌ ኢሳዴይ ኤኬታና፤ ኢሳዴይ ኣታና። 41 ናምኡ ማጫሳቲ ዎጻን ኢሲፌ ጋጫና ሺን ኢስታፌ ኢሲኔያ ኤኬታና፤ ኢሲኔያ ኣታና።

42 «ሂስቲኮ ኢንቴ ጎዳይ ያና ጋላሳ ኢንቴ ኤሮንታ ጊሻስ ቤጊዲ ናጊቴ። 43 ሃይሳ ዎዚናን ዎꬂቴ፤ ካይሶይ ቃማፌ ኣፉንꬃ ሳቴ ቦላ ያናኮን ኤሪዛኮ ኢዛ ሚሽ ካይሶይ ኤኮንታ ማላ ኬꬃ ኣዋይ ቤጊዲ ናጋና። 44 ኣሳ ናይካ ኢንቴ ቆፖንታ ሳቴ ቦላ ያና፤ ኢንቴካ ሄሳꬆ ጊጌቲዳይታ ጊዲቴ።

45 «ዎዴራ ሶ ኣሳ ቁማ ሚዛና ማላ ጎዳይ ባ ኬꬃ ኣሳ ቦላ ሹሚዳ ኣማኔቲዛ ጪንጫ ኦሳንቻይ ኦኔ? 46 ኬꬃ ኣዋይ ሲሚዲ ዪዛ ዎዴ ኢዛስ ኢሚዳ ሃዳራ ኦꬂ ፖሊሼ ቤቲዳ ኦሳንቻይ ኣንጄቲዳይሳ። 47 ታ ኢንቴስ ቱሙ ጋይስ፤ ጎዳይ ኢዛ ባ ሃሪዳ ኡባ ቦላ ሹማና። 48 ጊዶ ኣቲን ሄ ኦሳንቻይ ኢታ ጊዲዲ፥ ‹ታ ጎዳይ ጋምኢዲ ያና› ጊ ቆፒዲ፥ 49 ዴንዲ ሃንኮ ኦሳንቻታ ዋꬋ ኦይኪኮ ማꬆቲዛይታራ ሚኮኔ ኡዪኮ፥ 50 ኢዚ ቆፖንታ ጋላሳኒኔ ኤሮንታ ሳቴን ኢዛ ጎዳይ ዪዲ፥ 51 ኢዛ ቃንጼꬂ ካኣና፤ ኢዛ ኤጻ ቆꬌፔ ቆሞን ሃኒዛይታራ ኦꬃና። ሄንካ ዬሆይኔ ኣቻ ጋርጬቺ ሃናና።