26
ኣይሁዳቲ ዬሱሳ ዎꬋናስ ማቄቴꬅ
(ማር 14፡1-2፤ ሉቃ 22፡1-2፤ ዮሃ 11፡45-53)
1-2 ዬሱሲ ሄሳ ሃሳዪ ዉርሲዳፔ ጉዬ ባና ካሊዛይታስ፥ «ናምኡ ጋላሳፌ ጉዬ ፓዚጋ ጊዲዳይሳ ኤሬቲ? ኣሳ ናይ ካቄታናስ ኣꬊ ኢሜታና» ጊዴስ። ኬሳ 12፡1-27
3-4 ሄሳፌ ጉዬ ቄሴታ ሃላቃቲኔ ዴሬ ጪማቲ ቃያፋ ጌቴቲዛ ቄሴታ ሃላቃ ጊቤን ሺቂዲ ሂላራ ዬሱሳ ኦይꬂዲ ዎꬊሳናስ ማቄቲዳ። 5 ጊዶ ኣቲን፥ «ኣሳ ጊዶን ኦሺ ዴንዶንታ ማላ ባኣሌ ጋላስ ጊዶፖ» ጊዲ ቃቺዳ።
ዬሱሳ ሺቶ ቲይዳ ማጫሳዮ
(ማር 14፡3-9፤ ዮሃ 12፡1-8)
6 ዬሱሲ ቢታኒያን ኢንቺራቻ ሃርጌራ ዲዛ ሲሞና ጌቴቲዛዴ ሶን ዲሺን፥ 7 ኢሲ ማጫስ ዲዛራ ጋቴይ ኬሂ ኣልኦ ጊዲዳ ኣልባስጺሮሴ *ኣልባስጺሮሴ፡ ኣልባስጺሮሴ ቦንቾ ሚሽ ኢዛፔ ኦሴቲዛ ቦꬃ ኣልኦ ሹቻ። ሺቶ ቢልቃጼ ኩሜꬅ ኦይካዳ ዬሱሳኮ ሺቃዳ ኢዚ ማዳን ኡቲ ዲሺን ኢዛ ሁኤ ቦላ ሺቶዛ ጉሳዱስ። ሉቃ 7፡37-38 8 ኢዛ ካሊዛይቲ፥ «ሄሳ ቤኢዲ ሃይሲ ኣዛስ ሜላ ሞሬቲዜ? 9 ሺቶዚ ዳሮ ጋቴስ ባይዜቲዲ ሚሻይ ማንቆታስ ኢሜቲዛኮቺ?» ጊዳ።
10 ዬሱሲ ሄሳ ኤሪዲ፥ «ሃኖ ማጫሳዮ ኣዛስ ዋዪሴቲ? ኢዛ ታስ ሎኦ ኦꬃዱስ። 11 ማንቆቲ ኡባ ዎዴ ኢንቴናራ ዴቴስ፤ ታ ጊዲኮ ኡባ ዎዴ ኢንቴናራ ዲኬ። ዛሬ 15፡11 12 ኢዛ ሺቶዛ ታ ቦላ ጉሲዳይሲ ታና ሞጎስ ጊጊሳናሳ። 13 ታ ኢንቴስ ቱሙ ጋይስ፤ ሃይሲ ሚሺራቾ ቃላይ ሳባኬቲዛ ኣላሜ ዩሾን ኣዋንካ ኢዛ ኦꬂዳይሲ ኢዞ ቆፍሲዛዝ ጊዲዲ ሃሳዬታና» ጊዴስ።
ዬሱሳ ኣꬂ ኢማናስ ዩሁዳ ጊጌቴꬅ
(ማር 14፡10-11፤ ሉቃ 22፡3-6)
14 ሄሳፌ ጉዬ ታማኔ ናምኣታፔ ኢሶይ ኣስቆሮንቶ ዩሁዳ ጌቴቲዛይሲ ቄሴታ ሃላቃታኮ ቢዲ፥ 15 «ታ ኢንቴስ ኢዛ ኣꬃ ኢሚኮ ኢንቴ ታስ ኣይ ኢማኔ?» ጊዴስ። ኢስቲካ ኢዛስ ሄꬑ ታሙ ቢራ ኢዛ ኩሼን ታይቢ ኢሚዳ። ዛካ 11፡12 16 ሄ ጋላሳፌ ሲሚዲ ዩሁዳይ ዬሱሳ ኢስታስ ኣꬂ ኢማናስ ኢንጄ ዎዴ ናጊሼ ጋምኢዴስ።
ጎዳ ካዎ
(ማር 14፡12-21፤ ሉቃ 22፡7-13፤ ዮሃ 13፡21-30)
17 ኡኬꬃ ባኣሌ ጌቴቲዛ ባኣሌ ጋላስ ኢዛ ካሊዛይቲ ዬሱሳኮ ሺቂዲ፥ «ኔ ፓዚጋ ማናሶ ኣዋን ጊጊሳና ማላ ኮያይ?» ጊዳ።
18 ኢዚካ ኢስታስ ዛሪዲ ጌዴ ካታማ ቢዲ ኤቤሎ ጌቴቲዛ ኣስ፥ «ኣስታማሬይ፥ ‹ታ ዎዴይ ማቲዳ ጊሻስ ታና ካሊዛይታራ ፓዚጋ ታ ኔ ኬꬃን ቦንቻና ጊዴስ› ጊ ዮቲቴ» ጊዴስ። 19 ኢዛ ካሊዛይቲካ ዬሱሲ ኢስታ ኣዛዚዳ ማላ ፓዚጋ ካዎ ጊግሲዳ።
20 ጋዴይ ኦማርሲሺን ዬሱሲ ታማኔ ናምኣታራ ማዳን ኡቲዴስ። 21 ኢስቲ ሙሳን ዲሺን ኢዚ ኢስታስ፥ «ታ ቱሙ ጋይስ፤ ኢንቴፌ ኢሶይ ታና ኣꬂ ኢማና» ጊዴስ።
22 ኢስቲካ ኬሂ ሙዞቲዲ ታራን ታራን፥ «ጎዶ ታኔሻ?» ጊዳ። 23 ኢዚካ ዛሪዲ፥ «ታና ኣꬂ ኢማናዴይ ኬሬን ታናራ ኩሼ ዬዲዛዴ። ማዛ 41፡9 24 ኢዛ ጊሻስ ካሴ ጻፌቲዳይሳ ማላ ኣሳ ናይ ባና፤ ጊዶ ኣቲን ኣሳ ና ኣꬂ ኢሚዛዴስ ኣዬ ኣና! ሄሳዴይ ዬሌቶንታ ኣቲዳኮ ኢዛስ ሎኦኮሺን» ጊዴስ። 25 ኢዛ ኣꬂ ኢማና ዩሁዳይ፥ «ኣስታማሬ! ታኔሻ?» ጊዴስ። ኢዚካ፥ «ኤ፥ ኔ ጊዳ ማላ» ጊዴስ።
26 ኢስቲ ሙሳን ዲሺን ዬሱሲ ሚዛ ቁማፔ ኤኪዲ ኣንጂዴስ። ሜንꬂዲኔ ባና ካሊዛይታስ ኢሚዲ፥ «ሄኢቴ ሚቴ፤ ሃይሲ ታ ኣሾኮ» ጊዴስ። 27 ቃሴካ ኡሻ ዴንꬂዲ ጋላቲዲኔ ባና ካሊዛይታስ ኢሚዲ፥ «ዉሪካ ሃይሳፌ ኡዪቴ፤ 28 ዳሮ ኣሳ ናጋራፔ ማራና ጉኪዛ ታ ኦራꬃ ጫቆ ሱꬃይ ሃይሳ። ኬሳ 24፡8፤ ኤር 31፡31-34 29 ታ ኢንቴስ ጊዛይ ታ ኣዋ ካዎቴꬃን ታ ኢንቴናራ ኦራꬃ ዎይኔ ኡሻ ኡያና ጋካናስ ሃይሳፌ ጉዬ ሃይሳ ዎይኔ ኡሻ ኢንቴናራ ኡዪኬ» ጊዴስ።
30 ዬꬃ ዬጺዳፔ ጉዬ ፑዴ ዳብራዛይቴ ጌቴቲዛ ዙማ ቦላ ኬዚዳ።
ጴጽሮሲ ኢዛ ካዳናይሳ ዬሱሲ ካሴቲ ዮቲዴስ
(ማር 14፡27-31፤ ሉቃ 22፡31-34፤ ዮሃ 13፡36-38)
31 ዬሱሲ ኢስታስ፥ «ኢንቴ ዉሪ ሃች ኦማርሲ ታናን ꬉጴቲዲ ታና ዬጊ ባና፤ ‹ሄሚዛይሳ ታ ሾጫና፤ ሜሄቲ ላሌታና› ጌቴቲዲ ካሴ ጻፌቲዴስ። ዛካ 13፡7 32 ጊዶ ኣቲን ታኒ ዴንዲዳፔ ጉዬ ኢንቴፌ ሲንꬃታዳ ጋሊላ ባና» ጊዴስ። ማቶ 28፡16
33 ጴጽሮሲ ዛሪዲ፥ «ሃንኮይቲ ዉሪ ኔ ጋሶን ꬉጴቲኮካ ታኒ ሙሌካ ꬉጴቲኬ!» ጊዴስ። 34 ዬሱሲካ ኢዛስ ዛሪዲ፥ «ቱሙ ጋይስ፤ ሃች ኦማርስ ኩቶይ ዋሶንታ ካሴታዳ ሄꬑቶ ኔ ታና ካዳና» ጊዴስ። 35 ጴጽሮሲ ቃሴ፥ «ኔናራ ታ ሃይቃና ኮሺኮካ ሙሌካ ታ ኔና ካዲኬ!» ጊዴስ። ዬሱሳ ካሊዛ ሃንኮይቲካ ኩሜꬅ ኢዛይሳꬆካ ጊዳ።
ጌቴሴማኔን ዬሱሳ ዎሳ
(ማር 14፡32-42፤ ሉቃ 22፡39-46)
36 ሄሳፌ ጉዬ ዬሱሲ ባና ካሊዛይታራ ጌቴሴማኔ ጌቴቲዛሶ ቢዴስ። ኢስታካ፥ «ሄ ባዳ ታ ዎሲሺን ኢንቴ ሃይሳን ኡቲሺቴ» ጊዴስ። 37 ጴጽሮሳራ ዛብዶሳ ናይታ ናምኣታ ባናራ ኤኪ ቢዲ ሙዞቴꬂኔ ዳሮ ቆፌቴꬅ ኦይኪዴስ። 38 ሄሳፌካ፥ «ታ ሼምፖያ ሃይቃና ጋካናስ ዳሮ ሙዞታዱስ፤ ታናራ ሚኒዲ ሃኒን ታኪቴ» ጊዴስ።
39 ኢስታፌ ጉꬅ ጌዴ ሃኪ ቢ ጉፋኒዲ፥ «ታ ኣዋዉ! ኔስ ዳንዳዬቲኮ ሃይሲ ሜቶይ ታፔ ኣꬎ፤ ጊዶ ኣቲን ታኒ ኮዪዳ ማላ ጊዶንታ ኔኒ ኮዪዳ ማላ ሃኖ» ጊ ዎሲዴስ። 40 ሄሳፌ ሲሚዲ ባና ካሊዛይታኮ ዪዲ ኢስቲ ꬊስኪሺን ዴሚዴስ። ጴጽሮሳካ፥ «ሃይቶ ኣሳቶ! ኢንቴ ታናራ ኢሲ ሳቴካ ሚናናስ ጾኒዴ? 41 ፓጬን ኢንቴ ጌሎንታ ማላ ሚኒዲ ዎሲቴ፤ ኣያናይ ጊጌቲዴስ ሺን ኣሾይ ጊዲኮ ዳቡራንቻ» ጊዴስ።
42 ቃሴካ ናምኣንꬆ ቢዲ፥ «ታ ኣዋዉ! ታ ሃይሳ ኡያናይሲ ታስ ኣቶንታ ሚሽ ጊዲኮ ኔ ሼኔይ ፖሌቶ» ጊዲ ዎሲዴስ። 43 ቃሴካ ኢዚ ዪሺን ኢስታ ኣይፌን ꬊስኮይ ዴጺዳ ጊሻስ ኢቺዳይታ ቤዪዴስ። 44 ኢስታ ኣጊዲ ቃሴካ ቢዲ ሄꬓንꬆ ካሴ ዎሲዳ ቃላ ዛሪ ዎሲዴስ።
45 ሄሳፌ ባና ካሊዛይታኮ ሲሚዲ፥ «ሃኢካ ሼምፒ ꬊስኪዴቲ? ሄኮ ሃኢ ሳቴይ ማቲዴስ፤ ኣሳ ናይ ናጋራንቻታ ኩሼን ኣꬊ ኢሜታና። 46 ዴንዲቴ ኣኔ ቦስ! ታና ኣꬂ ኢሚዛዴይ ዩሳ ቦላ ዴስ» ጊዴስ።
ዬሱሳ ኦይኬቴꬅ
(ማር 14፡43-50፤ ሉቃ 22፡47-53፤ ዮሃ 18፡3-12)
47 ኢዚ ሃሳይሺን ታማኔ ናምኣታፔ ኢሶይ ዩሁዳይ ዪዴስ። ቄሴታ ሃላቃቲኔ ዴሬ ጪማቲ ዬዲዳ ዳሮ ኣሳይ ቶራኔ ዱርቃ ኦይኪዲ ዩሁዳራ ኢሲፌ ዴስ። 48 ዩሁዳይካ፥ «ታ ዬሪዛዴይ ኢዛ ጊዲዳ ጊሻስ ኦይኪቴ» ጊዲ ካሴ ዮቲ ዎꬂዴስ።
49 ሲቲ ጊ ዬሱሳኮ ቢዲ፥ «ኣስታማሬ! ሳሮ» ጊሼ ዬሱሳ ዬሪዴስ። 50 ዬሱሲካ፥ «ታ ላጌ! ኔ ዪዳ ቆፋ ፖላ» ጊዴስ። ሄራካ ኣሳይ ሺቂዲ ዬሱሳ ኦይኪ ቃቺዴስ። 51 ዬሱሳራ ዲዛይታፔ ኢሶይ ጊꬃ ማሻ ሾዲዲ ቄሴታ ሃላቃዛ ኣሽካራ ሃይꬅ ቃንጺዴስ።
52 ዬሱሲካ፥ «ኣኔ ኔ ማሻ ኮሆን ዛራ ጌልꬃ፤ ማሻ ሾዲዛይቲ ማሻን ꬋያና። 53 ኮሺኮ ታኒ ታ ኣዋ ኦይቺዛኮ ዳሮ ሺያን ቆዴቲዛ ኦሊዛ ኪታንቻ ታስ ዬዶንታ ኣጋና ኔስ ሚሳቲዜ? 54 ሄሳꬆ ኦꬂኮ ቃሴ ጌሻ ማጻፋታን ሃናና ጌቴቲዳይሲ ዋኒ ፖሌታኔ?» ጊዴስ።
55 ሄ ዎዴ ዬሱሲ ኣሳ፥ «ፓንጋ ኦይኪዛ ኣሳꬆ ማሻኔ ዱርቃ ኤኪዲ ታና ኦይካና ዪዴቲ? ዎንቲን ዎንቲን ጾሳ ኬꬃን ኡታዳ ታ ታማርሲሺን ካሴ ኦይኪቤኬታ ሺን። ሉቃ 19፡47፤ 21፡37 56 ጊዶ ኣቲን ሃይሲ ዉሪካ ሃኒዳይሲ ካሴ ናቤቲ ጌሻ ማጻፋታን ዮቲዳይሲ ፖሌታናሳ» ጊዴስ። ሄ ዎዴ ዬሱሳ ካሊዛይቲ ኢዛ ዬጊዲ ꬋይዳ።
ፒርዳ ዱላታ ሲንꬅ ዬሱሳ ኣꬌꬅ
(ማር 14፡53-65፤ ሉቃ 22፡54-55፥63-71፤ ዮሃ 18፡13-14፥19-24)
57 ሄ ዎዴ ዬሱሳ ኦይኪዲ ኣሳቲ ሙሴ ዎጋ ኣስታማሬቲኔ ዴሬ ጪማቲ ኢሲፌ ሺቂዳሶን ቄሴታ ሃላቃ ቃያፋኮ ኤፊዳ። 58 ጊዶ ኣቲን ጴጽሮሲ ቄሴታ ሃላቃ ጊቤ ጋካናስ ሃሆራ ዬሱሳ ካሊዴስ። ጊቤ ጊዶ ጌሊዲ ሃኒዛይሳ ዉርሴꬅ ቤያናስ፥ ጊቤ ናጊዛይታራ ኡቲዴስ።
59 ሄ ዎዴ ቄሴታ ሃላቃቲኔ ኣይሁዳታ ዱላታይ ኩሜꬅ ዬሱሳ ዎꬊሳናስ ዎርዶ ማርካ ኮዪዴስ። 60-61 ዳሮ ዎርዶ ማርካቲ ሺቂኮካ ቤሲዛ ማርካቴꬅ ዴሚቤቴና፤ ጊዶ ኣቲን ጉዬፔ ናምኡ ኣስ ዳይቲ ሺቂዲ፥ «ሃይሲ ኣዴዚ፥ ‹ታኒ ጾሳ ኬꬃ ላላዳ ሄꬑ ጋላሳራ ዛራዳ ኬጻና ዳንዳያይስ› ጊዴስ» ጊዲ ማርካቲዳ። ዮሃ 2፡19
62 ሄሳ ሲዪዳ ቄሴታ ሃላቃይ ኡቴꬃፌ ዴንዲ ኤቂዲ፥ «ሃይቲ ኣሳቲ ኔ ቦላ ማርካቲዛይሳስ ኣይኮካ ዛሪኪ?» ጊዴስ። 63 ዬሱሲካ ጮኡ ጊዴስ። ቄሴታ ሃላቃይ፥ «ታ ኔና ዴኦ ጾሳ ሱንꬃን ኦይቻይስ! ኔኒ ጾሳ ና ኪርስቶሳ ጊዲኮ ታስ ዮታ!» ጊዴስ።
64 ዬሱሲካ፥ «ኔ ጎይሳካ ማላ፤ ጊዶ ኣቲን ኢንቴስ ኡባስ ታ ዮቲዛይ ሲንꬃፌ ኣሳ ናይ ዎልቃማዛ ኡሻቻን ኡቲዲ ሳሎ ሻራራ ዪዛ ዎዴ ኢንቴ ቤያና» ጊዴስ። ዳኔ 7፡13
65 ሄ ዎዴ ቄሴታ ሃላቃይ ባ ማይኦ ዳኪዲ፥ «ጾሳ ቦላ ጫሻ ቃላ ሃሳይዴስ፤ ኑስ ሃይሳፌ ኣꬊዛ ሃራ ኣዛ ማርካ ኮሺዜ! ጾሳ ቦላ ጫሻ ቃላ ኢዚ ሃሳይሺን ኢንቴ ኢንቴ ሃይꬃራ ሲዪዴታ። 66 ኢንቴስ ኣይ ሚሳቲዜ?» ጊዴስ። ኢስቲካ ዛሪዲ ኢዛስ፥ «ሃይቆይ ኢዛስ ቤሴስ» ጊዳ።
67 ሄ ዎዴ ዬሱሳ ኣይፌሶን ጩቲሼ ኢዛ ኢጪዳ፤ ባጋይቲ ኢዛ ባቂሼ፥ 68 «ኪርስቶሳ! ኔ ኔና ናቤ ጋሳ ሺን ኔና ባቂዳይ ኦናኮን ኣኔ ኑስ ዮታ» ጊዳ።
ጴጽሮሲ ዬሱሳ ካዲዴስ
(ማር 14፡66-72፤ ሉቃ 22፡56-62፤ ዮሃ 18፡15-18፥25-27)
69 ሄሳፌ ጉዬ ጴጽሮሲ ቄሴታ ሃላቃዛ ጊቤን ኡቲ ዲሺን ኬꬃ ጊዶን ኦꬂዛ ኢሲ ማጫስ ዲዛራ ኢዛኮ ሺቃዳ፥ «ኔኒካ ጋሊላ ዬሱሳራ ዲዛዴ!» ጋዱስ።
70 ኢዚ ቃሴ፥ «ኔ ኣይ ጊዛኮ ታ ኤሪኬ!» ጊዲ ኡባ ኣሳ ሲንꬃን ካዲዴስ። 71 ጊቤዛ ፔንጌ ኢዚ ቢሺን ኢሲ ሃራ ኦሳንቻያ ኢዛ ጼላዳ ሄን ዲዛይታስ፥ «ሃይሲ ኣዴዚ ናዚሬቴ ዬሱሳራ ዲዛዴኮ!» ጋዱስ።
72 ኢዚካ፥ «ታ ኢዛ ኤሪኬ!» ጊዲ ናምኣንꬆ ካዲዴስ። 73 ጉꬅ ጋምኢሺን ሄን ኤቂዳ ኣሳቲ ሺቂዲ ጴጽሮሳ፥ «ኔ ሃሳያይ ኔ ሃይታራ ዲዛይሳ ቆንጪሴስ፤ ቱማፔ ኔ ኢስታ ባጋ ኣሳ» ጊዳ። 74 ኢዚካ ጫቂሼኔ ኣማቲሼ፥ «ሄሳ ኣዴዛ ታ ኤሪኬ!» ጊዴስ። ሄራካ ኩቶይ ዋሲዴስ።
75 ሄ ዎዴ ዬሱሲ ካሴ ጴጽሮሳስ፥ «ኩቶይ ዋሳናስ ኔ ታና ሄꬑቶ ካዳና» ጊዲ ዮቲዳ ቃላይ ቆፌቲን፥ ጴጽሮሲ ካሬ ኬዚዲ ጫሞ ዬሆ ዬኪዴስ።