3
ኢታ ኦጌ ካሌꬂዛይታኔ ዎርዶ ናቤታ ቦላ ጾሳ ሃንቆ
1 ቃሴካ፥ «ኢንቴኖ ያቆቤ ካሌꬂዛይታኔ ኢስራኤሌ ኬꬃ ኣሳ ሃሪዛይቶ ሲዪቴ፤
ኢንቴ ቱሙ ፒርዳ ኤራናስ
ኢንቴስ ቤሴኔ?
2 ኢንቴ ሎኦ ኢጺዴታ፤
ኢታ ቃሴ ዶሲዴታ፤
ታ ኣሳ ጋልባ ሾቂዴታ፤
ኢስታ ኣሾካ
ሜቄꬃፌ ሻኪዴታ።
3 ታ ኣሳ ኣሾ ሚዴታ፤
ጋልባካ ሾቂዴታ፤
ኢስታ ሜቄꬂካ
ሜንꬄሬꬂዴታ፤
ኣሾ ጫጪዛ ባሼን
ጫጪዛ ማላኔ
ዲስቴን ዶይሲዛ ኣሾ ማላ
ቃንጼሬꬂዴታ» ታ ጋዲስ።
4 ኢስቲካ ፑዴ ጾሳኮ
ዋሳና ሺን
ጾሲ ኢስታ ዋሶ ሲዬና፤
ኢታቴꬃ ጊሻስ ሄ ዎዴ
ጾሳይ ባ ኣይፌሶ
ኢስታፌ ሃራሶ ዛራና።
5 ጾሲ፥ «ታ ዴሬ ባሌꬂዛ ናቤቲ
ኣሲ ኢስታ ሚዚኮ፥
‹ሳሮቴꬂ ዴስ› ጌቴስ።
ሙዞንታ ኣጊኮ ቃሴ፥
‹ኦላይ ዬስ›
ጊ ኣዋጃናስ ዴንዴቴቴስ።
6 ሄሳ ጊሻስ ኢስታ ቦላ
ቃማይ ቤቶንታ፥
ꬉማይ ኤሮንታ ጋኪ
ዎꬋና፤
ናቤታ ቦላ ኣርሼይ ጌላናኔ
ጋላሳይ ኢስታስ ቃማና።
7 ቡሮ ማሮቲዛይቲ ካዉያና፤
ቲንቢቴ ዮቲዛይቲ ዬላታና፤
ዉሪካ ባ ኣይፌሶ ካማና፤
ጋሶይካ ኢስታስ ዛሮይ
ጾሳ ኣቻፌ ባይንዳ
ጊሻሳ» ጊዴስ።
8 ታ ቃሴ ያቆቤስ
ኢዛ ቆሆዛ፥
ኢስራኤሌሲካ
ኢዛ ናጋራ ዮታናስ
ዎልቃን፥ ጾሳ ኣያናን፥
ቱማ ፒርዳኒኔ
ሚኖቴꬃን ኩማዲስ።
9 ኢንቴኖ ያቆቤ ሶ ኣሳ
ካሌꬂዛይቶ!
ኢንቴኖ ኢስራኤሌ ዴሬ ሃሪዛይቶ!
ቱሙ ፒርዳ ካꬊዛይቶ!
ቱሙ ጊዲዳዝ
ኡባ ሚርቂዛይቶ!
ኣኔ ሲዪቴ።
10 ጺዮኔ፥ ኣሳ ሱꬅ ጉሶኒኔ
ዬሩሳላሜ ኢታቴꬃን
ኩንꬂዛይቶ!
ኣኔ ሲዪቴ።
11 ካሌꬂዛይቲ ማታኤስ ፒርዴቴስ፤
ቄሴቲ ሚሻ ጊሻስ
ታማርሴቴስ፤
ናቤቲካ ሚሼ
ሚዳ ጊሻስ ዮቴቴስ።
ሄሳ ኡባ ኦꬂዲካ፥
«ጾሲ ኑ ጊዶን ዴስ ጊዴኔ?
ኣይ ኢታይካ ኑ ቦላ ጋኬና» ጊሼ
ጾሳን ጬቄቴቴስ።
12 ሄሳ ጊሻስ ኢንቴ ጌዶን
ጺዮኔይ ጎሻ ቢታ ማላ
ጎዬታና፤
ዬሩሳላሜይካ ቆሌቲዳ
ኬꬃ ዶሬ ጊዳና፤
ጾሳ ኬꬃይ ዲዛ ዙማይካ
ሻራፋ ማታይ ኢዛ ቦላ
ዲጪዳ ዙማ ጊዳና። ኤር 26፡18