1 ጾሲ ጊዛይሳ ሲዪቴ፤ «ዴንዲቴ! ኢንቴ ሜቶ ዙማታስ ዮቲቴ፤ ዙማቲካ ኢንቴ ጊዛይሳ ሲዬቶ። 2 ዙማቶ! ጾሳ ሞቶ ሲዪቴ፤ ኢንቴኖ ቢታ ሚኖ ጻጶቶ ሲዪቴ፤ ጾሳስ ኣሳራ ፓላማይ ዴስ፤ ኢዚ ኢስራኤሌ ናይታራ ፒርዴቴስ። 3 ታ ዴሬዞ! ታ ኔና ዎስታዲና? ታ ኔስ ኣዛን ቶሆ ጊዳዲና? ኣኔ ታስ ዛሮ ኢማ። 4 ታ ኔና ጊብጼፔ ኬሳዲስ፤ ኣይሌቴꬃ ቢታፌካ ዎዛዲስ፤ ኔና ካሌꬃና ማላ ሙሴ፥ ኣሮኔኔ ማራሞ ኔስ ዬዳዲስ። ኬሳ 12፡50-51፤ 15፡20 5 ታ ዴሬዞ! ሞኣቤ ካዎይ ባላቄይ ኢዛ ዞሪን ቢኦሬ ና ባላሜይ ኢዛስ ዛሮይሳ ኣኔ ዩሺ ቆፒቴ፤ ጾሳ ጺሎቴꬃ ኦሶ ኢንቴ ሻኪ ኤራና ማላ፥ ሺጺሜፔ ጌልጌላ ጋካናስ ኢንቴ ሄሜቶይሳ ኣኔ ቆፒቴ» ጊዴስ። 6 ታ ኣይ ኤካዳ ጾሳ ሲንꬄ ሺቆ? ዴኦ ጾሳስ ዎስታ ጎይኖ? ጹጌቲዛ ያርሾ ኢሲ ላይꬃ ማራራ ጋꬃ ኤካ ባዳ ኢዛ ሲንꬅ ሺቆሻ? 7 ኢሲ ሺ ꬋርሾታኔ 10,000 ጎጊዛ ዛይቴይ ጾሳ ኡፋይሳንዴሻ? ታ ኢዛ ቆሆይሳ ጊሻስ ታ ባይራ ናዛ ኢሚዛኮ ታ ሼምፖ ናጋራ ጊሻስ ታ ኡሎፔ ዎꬊዳ ዬሎ ኢዛስ ኢሞሻ? 8 ኣሳ ናዉ! ኢዚ ኔና ሎኦ ሚሽ ቤሲዴስ ጾሲ ኔፔ ኮይዛይ ኣዜ? ሎኦ ኦꬃና ማላ ማሮቴꬅ ኔ ዶሳና ማላኔ ጾሳ ሲንꬃን ኔኒ ኣሽኬቴꬃራ ባና ማላ ጊዴኔ?

9 ጾሳስ ባቦይ ኣꬊዳ ኤራቴꬃ፤ ሲዪቴ! ጾሲ ካታማዮ ሂዝጊ ጼይጌስ፥ «ኢዛ ሃንቆ ጉፌዛ ቆፒቴ፤ ሄሳካ ጊግሲዳይ ኦናኮ ዎዚናን ዎꬂቴ።» 10 ኢታቴꬃ ኬꬃቶ! ኢንቴ ጌኔን ሺሺዳ ኢንቴ ሚሽ ዎርዶ ማካ ሚሻን ማኪ ኢንቴ ሺሺዳ ሹኒዛ ሚሻ ታ ዶጋኔ? 11 ባሌꬂዛ ማካ ሚሽ ኦይኪዳዴ፥ ዎርዶ ማካ ሚሻ ካራጺቴን ጹንቲዳዴ ጺሊሳናስ ታስ ቤሲዜ? 12 ኢዚ ዴሬን ዱሬ ኣሳቲ ኣስ ቆሂዛዴንታ፤ ኢዚን ዲዛ ኣሳይ ዎርዳንቻ ጻላ፤ ኢስታ ኢንጻርሳይ ባሌꬂዛ ኢንጻርሳ። 13 ሄሳ ጊሻስ ታ ኔና ꬋይሳና ዴንዳዲስ፤ ኔ ናጋራ ጌዶን ታ ኔና ላላና። 14 ኔ ማናሺን ካላካ፤ ኔ ቃንꬃይ ጮ ሜላ ዳና፤ ኔ ሺሻናሺን ኣይኮካ ኔስ ሺቄና፤ ኔ ሺሺዳይሳ ታኒ ማሻሲኔ ቶራስ ኣꬃ ኢማና። 15 ኔ ዜራና ሺን ማጻካ፤ ዎጋራ ሚꬃ ዛይቴ ኔ ጉምኣና ሺን ሄ ዛይቴዛ ቲዬታ፤ ዎይኔ ሚꬃ ኣይፌ ጹንቃ ሺሻናሺን ዎይኔ ኡሹ ኔ ኡያካ። 16 ካዎ ኦሚሬ ዎጋኔ ካዎ ኣካቤ ኬꬃ ዎጋ ኔ ኡባ ሺሻ ኦይካዳሳ፤ ኔካ ኢስታ ሃይሲኤ ካላዳሳ። ሄሳ ጊሻስ ኔና ꬋይሳስ፥ ኔ ዴሬዛካ ታኒ ቂꬌስ ኣꬃ ኢማና፤ ዴሬይ ኔ ቦላ ቂꬊ ካኣና። 1ካዎ 16፡23-34፤ 21፡25-26