13
ዬሱሲ ካሴቲ ዮቲዳ ጾሳ ኬꬃ ላሌቴꬅ
(ማቶ 24፡1-2፤ ሉቃ 21፡5-6)
1 ኢዚ ጾሳ ኬꬃፌ ኬዚሺን ኢዛ ካሊዛይታፔ ኢሶይ፥ «ኣስታማሬ! ሃይሲ ኬꬃይኔ ኬꬃይ ኬጼቲዳ ሹቻይ ኣይ ማላ ሎኢዛኮ ሃይሳ ቤያይ?» ጊዴስ። 2 ዬሱሲካ ዛሪዲ፥ «ሃይታ ጊታ ኬꬃታ ጼላይ? ሹቻቲ ኢሶይ ኢሳ ቦላ ዲዛ ማላ ዴቴና፤ ዉሪካ ላሌታና» ጊዴስ።
ዎዴ ዉርሴꬃ ማላታታ
(ማቶ 24፡3-14፤ ሉቃ 21፡7-19)
3 ዬሱሲ ጾሳ ኬꬃ ጊናራ ዳብራዛይቴ ዙማ ቦላ ኡቲ ዲሺን ጴጽሮሲ፥ ያቆቤይ፥ ዮሃኒሲኔ ኢንዲራሲ ጻላ ኢዛኮ ሺቂዲ፥ 4 «ሃይሲ ኣይዴ ሃናናኮ ኑስ ዮታ። ሃይሲ ዉርሴꬃን ፖሌታናስ ማላታይ ኣዜ?» ጊ ኦይቺዳ።
5 ዬሱሲካ ኢስታስ፥ «ኦኒካ ኢንቴና ባሌꬆንታ ማላ ናጌቲቴ። 6 ቡሮ ዳሮቲ፥ ‹ታ ኪርስቶሳ› ጊሼ ታ ሱንꬃን ያና፤ ዳሮታካ ባሌꬃና። 7 ኢንቴ ኦላኔ ኦላ ዎሬ ሲዪዛ ዎዴ ዳጋሞፍቴ፤ ሄሲ ሃናናይሲ ኣቴና፤ ዉርሴꬂ ጊዲኮ ቡሮና። 8 ዴሬይ ዴሬ ቦላ፥ ካዎይ ካዎ ቦላ ዴንዳና፥ ዳሮሶን ቢታ ቃꬂኔ ኮሻይ ሃናና፤ ሄይቲ ዉሪ ሚጻስ ሌሶ ማላ።
9 «ኢንቴ ኢንቴስ ናጌቲቴ። ቡሮ ኢንቴና ዴሬ ዱላታን ኣꬂ ኢማና። ኢስቲ ኢንቴና ኣይሁዳታ ዎሳ ኬꬃን ጋራፋና። ኢንቴ ታ ማርካታ ጊዳና ማላ ታ ጊሻስ ዴሬ ዳናታ ሲንꬃኒኔ ካዎታ ሲንꬃን ኤቃና። 10 ኮይሮቲዲ ሚሺራቾ ቃላይ ዴሬ ኡባስ ሳባኬታና ቤሴስ። 11 ኢንቴ ኦይኬቲዲ ፒርዳስ ሺቂዛ ዎዴ ሂኖ ሄ ሳቴዪን ኢንቴስ ኢሜቲዛሮ ሃሳይቴ ኣቲን ቢዲ፥ ‹ኑ ኣይ ጊኖ?› ጊዲ ካሴቲ ሂርጎፍቴ፤ ሃሳያናይ ጺሎ ኣያናፔ ኣቲን ኢንቴና ጊዴኬታ። ማቶ 10፡17-20
12 «ኢሻይ ኢሻ፥ ኣዋይ ባ ና ሃይቆስ ኣꬂ ኢማና፤ ናይቲ ባና ዬሊዳይታ ቦላ ማካላናኔ ዎꬋና። 13 ታ ጋሶን ኢንቴ ኣሳ ኡባን ኢጼቲዳይታ ጊዳና፤ ዉርሴꬅ ጋካናስ ሚኒ ኤቂዳዴይ ጊዲኮ ኣታና። ማቶ 10፡22
ዬሩሳላሜ ቦላ ጋካና ጊታ ሜቶ
(ማቶ 24፡15-21፤ ሉቃ 21፡20-24)
14 «ኢንቴ ሃራሲዛ ቱናቴꬅ ኢዛስ ቤሶንታሶን ኤቂዳሼ ቤይኮ ናባቢዛዴይ ዎዚናን ዎꬆ፤ ዩሁዳን ዲዛይቲ ፑዴ ዙማ ቦላ ባቃቴቶ። ዳኔ 9፡27፤ 11፡31፤ 12፡11 15 ኬꬃ ካሬን ዲዛዴይ ሶ ጌሎፖ፤ ባ ሚሽ ኬሳና ጊዲ ኬꬄ ጌሎፖ። 16 ጎሻሶን ዲዛዴይ ባ ማይኦ ኤካናስ ጉዬ ሲሞፎ። ሉቃ 17፡31 17 ሄ ጋላሳታን ሻራ ማጫሳታሲኔ ና ꬋንꬂዛይታስ ኣዬ ኣና! 18 ሄሲካ ባልጎን ጊዶንታ ማላ ጾስ ዎሲቴ። 19 ጾሲ ኮይሮ ሜꬌቴꬅ ኡባ ሜꬎሶፌ ሃኢ ጋካናስ ዎይኮ ሃይሳፌ ጉዬ ኢዛ ሚሳቲዛይ ባይንዳ ጊታ ሜቶይ ሃናና። ዳኔ 12፡1፤ ኣጁ 7፡14 20 ጎዳይ ሄ ጋላሳታ ቃንꬆንታኮ ኦኒካ ኣቴና ሺን ባስ ዶሬቲዳይታ ጊሻስ ኢዚ ሄ ጋላሳታ ቃንꬂዴስ።
21 «ሄ ዎዴ ኦኒካ፥ ‹ሄኮ ኪርስቶሲ ሃይሳን ዴስ› ጊኮ ዎይኮ፥ ‹ሄኮ ሄን ዴስ› ጊኮ ኣማኖፒቴ። 22 ዎርዶ ኪርስቶሳቲኔ ዎርዶ ናቤቲ ቡሮ ዴንዲዲ ማላታታኔ ካሴ ሃኒ ኤሮንታ ፓላ ሚሽ ኦꬃና፤ ኢስታስ ዳንዳዬቲኮ ሃራይ ኣቶሺን ዶሬቲዳይታካ ባሌꬃና። 23 ሄሳ ጊሻስ ናጌቲቴ፤ ሄ ዎዴይ ጋኮንታ ዲሺን ሃራ ሃይሳ ዉርሳ ታ ኢንቴስ ዮታዲስ።
ኪርስቶሳስ ናምኣንꬆ ዩስ
(ማቶ 24፡29-31፤ ሉቃ 21፡25-28)
24 «ሄ ዎዴ ሄ ሜቶዛፔ ካሊዲ ኣርሼይ ꬉማና፤
ኣጊናይካ ፖኢሱኩ።
25 ጾሊንቴቲ ሳሎፔ ቆቆፌታና፥
ሳሎን ዲዛ ዎልቃማቲ ቃጻና። ኢሳ 34፡4፤ ኣጁ 6፡13፤ ኢዩ 2፡10
26 «ሄ ዎዴ ኣሳ ናይ ጊታ ዎልቃራኔ ቦንቾራ ሳሎ ሻራራ ዪሺን ኣሳይ ኢዛ ቤያና። ዳኔ 7፡13፤ ኣጁ 1፡7 27 ኢዚካ ኪታንቻታ ዬዲዲ ኦይዱ ባጋፌ ቢታ ጋጻፔ ጋጻ ጋካናስ ዲዛ ባስ ዶሬቲዳይታ ሺሻና።
ባላሴ ሚꬃይ ሌሚሶ
(ማቶ 24፡32-35፤ ሉቃ 21፡29-33)
28 «ሌሚሶዛ ባላሴ ሚꬃፌ ታማርቴ። ኡንቁሎይ ጪሊሊዛ ዎዴ ሃይꬅ ኬሲሺን ቦኔይ ማቲዳይሳ ኢንቴ ኤሬታ። *ሃይሲ ሃ ቆፋይ ቤሲዛይሲ ኢስታ ዴሬን ዲዛ ሚꬃቲ ኣጪዛይኔ ሃይꬃቲ ጪሊሊዛይ ቦኔ ጊዲዳይሳ ቤሳናሳ። 29 ሄሳꬆካ ሃይቲ ታ ጊዳይቲ ፖሌቲሺን ኢንቴ ቤይኮ ዎዴይ ማቲ ዪዲ ፔንጌ ጋኪዳይሳ ኤሪቴ። 30 ታ ኢንቴስ ቱሙ ጋይስ፤ ሃ ዮኦቲ ፖሌታና ጋካናስ ሃይሲ ሃ ዬሌታይ ኣꬌና። 31 ሳሎይኔ ሳኣይ ኣꬋና ሺን ታ ቃላይ ጊዲኮ ኣꬌና።
ጎዳይ ያና ጋላሳዮኔ ሳቴዮ ኦኒካ ኤሬና
(ማቶ 24፡36-44)
32 «ቃሴ ሄ ጋላሳይ ጊሻስ ዎይኮ ሄ ሳቴይ ጊሻስ ታ ኣዋፔ ኣቲን ሳሎ ኪታንቻታ ጊዲንካ ናዛ ጊዲንካ ኦኒካ ኤሬና። 33 ሄሳ ጊሻስ ዎዴይ ኣይዴኮ ኢንቴ ኤሮንታ ጊሻስ ናጌቲቴ፥ ሚኒቴኔ ዎሲቴ። 34 ሄሲካ ባ ኬꬅ ኣሽካራታስ ኣጊዲ ኣሽካራታ ኢሳ ኢሳ ኦሶ ኦይꬂዲ ፔንጌ ናጊዛይሲ ቤጊዲ ናጋና ማላ ኣዛዚዲ ቢዳ ኣሳ ሚሳቴስ። ሉቃ 12፡36-38
35 «ሂስቲኮ ኬꬃ ኣዋይ ኣይዴ ያናኮ ዎይኮ ሌላ ጊዶꬅ ያናኮ ዎይኮ ኮይሮ ኩቶይ ባቂሺን ያናኮ ዎይኮ ዎንታ ቦላ ባዞይ ዞኢሺን ያናኮ ኢንቴ ኤሮንታ ጊሻስ ቤጊዲ ናጊቴ። 36 ኢንቴ ቆፖንታ ዲሺን ኢዚ ዪዲ ኢንቴ ꬊስኪዲሺን ኢንቴና ዴሞፎ።
37 «ታ ኢንቴስ ዮቲዛይሳ ኣስ ኡባስ ዮታይስ፤ ሚኒዲ ናጊቴ! ጋይስ» ጊዴስ።