15
ዬሱሳ ጲላጾሳኮ ኤፊዳ
(ማቶ 27፡1-2፥11-14፤ ሉቃ 23፡1-5፤ ዮሃ 18፡28-38)
1 ማላዶ ዎንታራ ቄሴታ ሃላቃቲ፥ ዴሬ ጪማቲኔ ሙሴ ዎጋ ታማርሲዛይቲ ኩሜꬃ ሻንጎ ኣላፌታራ ኢሲፌ ዞሬቲዲ ዬሱሳ ቃቺ ኤኪ ኤፊዲ ጲላጾሳስ ኣꬂ ኢሚዳ።
2 ጲላጾሲካ ዬሱሳ፥ «ኔ ኣይሁዳታ ካዎ?» ጊ ኦይቺዴስ። ዬሱሲካ፥ «ኤ፥ ኔ ጊዳ ማላ» ጊዲ ኢዛስ ዛሪዴስ።
3 ቄሴታ ሃላቃቲካ ዳሮ ዮኦ ኢዛ ቦላ ሺሺ ሞቲዳ። 4 ጲላጾሲ ቃሴ፥ «ኔ ኣዛስ ኦይሻ ዛሪኪ? ሄኮ ኔና ዳሮ ዮኦን ሞቴቴስ» ጊዲ ቃሴካ ኦይቺዴስ።
5 ጊዶ ኣቲን ዬሱሲ ሃኢካ ኢዛስ ኣይኮካ ዛሮ ኢሞንታ ጊሻስ ጲላጾሲካ ማላሌቲዴስ።
6 ፓዚጋ ባኣሌ ጋላስ ጲላጾሲ ዴሬይ ቢርሻና ማላ ኦይቺዳዴ ቢርሺ ዬዲዛ ዎጋይ ካሴ ዴስ። 7 ኢታ ኦሶን ዴሬ ቦላ ዴንዲዲ ሼምፖ ዎꬊዳ ኣሳታራ ኢሲፌ ቃሼቲዳ ባርባኔ ጌቴቲዛ ኢሳዴይ ዴስ። 8 ዴሬይካ ዪዲ ካሴ ሎሴ ጊዲዳይሳ ኢዚ ኦꬃና ማላ ጲላጾሳ ዎሲዴስ።
9 ጲላጾሲካ ኢስታስ፥ «ታ ኢንቴስ ኣይሁዳ ካዎ ቢርሻና ማላ ኮዬቲ?» ጊ ኦይቺዴስ። 10 ጲላጾሲ ሄሳꬆ ኦይቺዳይ ካሴ ቄሴታ ሃላቃቲ ዬሱሳ ቃናቴን ኣꬂ ኢሚዳይሳ ኤሪዛ ጊሻሳ።
11 ቄሴታ ሃላቃቲ ቃሴ፥ «ኢዛ ኤጻ ባርባኔይ ቢርሼቶ!» ጊ ኦይቻና ማላ ዴሬዛ ዴንꬄꬂዳ። 12 ጲላጾሲ፥ «ሂስቲኮ ኢንቴ ኣይሁዳ ካዎ ጊዛ ኣዴዛ ዎስታና ማላ ኮዬቲ?» ጊዴስ።
13 ኢስቲ ቃሴካ፥ «ካቃ! ካቃ!» ጊ ዋሲዳ።
14 ጲላጾሲካ፥ «ኣይ ኢታ ኦꬂዴ?» ጊ ኢስታ ኦይቺዴስ። ኢስቲ ቃሴ፥ «ካቃ! ካቃ!» ጊዲ ካሴፔ ኣꬂ ዋሲዳ።
15 ጲላጾሲካ ዴሬዛ ኡፋይሳና ጊዲ ባርባኔ ኢስታስ ቢርሺዴስ። ዬሱሳ ጋራፊዲ ካቃናስ ኣꬂ ኢሚዴስ።
ዎታዳራቲ ዬሱሳ ቦላ ቂልጪዳ
(ማቶ 27፡27-30፤ ዮሃ 19፡2-3)
16 ዎታዳራቲ ዬሱሳ ዴሬ ሃሪዛይሳ ጊቤ ኤኪ ቢዲ ኣቲዳ ዎታዳራታ ኡባ ሺሺዳ። 17 ዬሱሳ ዞኦ ማይኦ ማይዚዳ፤ ኣጉንꬃ ኣኪሊሌ ጻጺዲ ኢዛ ሁኤን ዎꬂዳ። 18 ሄሳፌካ፥ «ኣይሁዳ ካዎ ሳሮይ ኔስ ጊዶ!» ጊሼ ኢዛ ሳሮꬂዳ። 19 ኢዛ ሁኤ ጉፌራ ሾጪዳ፤ ኢዛ ቦላካ ጩቲዳ፤ ጉልባቲዲ ኢዛስ ጎይኒዳ። 20 ኢዛ ቦላ ቂꬊ ካኢዳፔ ጉዬ ካሴ ማይዚዳ ዞኦ ማይኦዛ ቃሪ ኤኪዲ ካሴ ኢዛ ማይኦዛ ዛሪ ማይዚዲ ካቃናሶ ኤኪ ቢዳ።
ዬሱሳ ካቄቴꬅ
(ማቶ 27፡31-44፤ ሉቃ 23፡27-43፤ ዮሃ 19፡17-27)
21 ኣላኪሳንድሮሳኔ ኤሩፎሳ ኣዋ ሲሞና ጌቴቲዛ ኢሲ ቃሬና ዴሬ ኣሲ ዴሬፔ ካታማ ዪዛይሳ ዬሱሳ ማስቃሌ ዎልቃራ ኦይኪ ቶሲዳ። ኦሮ 16፡13 22 ሄሳፌ ጉዬ ዬሱሳ ጎልጎታ ጌቴቲዛሶ ኤፊዳ፤ ኢዛስ ቢርሼꬃይ፥ «ኣሳ ሁኤ ጉጌ» ጉሳ። 23 ካርቤ ጌቴቲዛ ጫሞራ ዋላኬቲዳ ዎይኔ ጫጄ ኡያና ማላ ኢዛስ ኢሚን ኢዚ ኤኮንታ ኢጺዴስ። 24 ሄሳፌ ጉዬ ኢዛ ካቂዳ፤ ኢዛ ማይኦ ኢሳዴ ኢሳዴ ኣዋይሲ ጋካናኮ ጊዲ ሳማ ዬጊዲ ጊሼቲዳ።
25 ኢስቲ ኢዛ ካቂሺን ዎንታፌ ሄꬑ ሳቴ ጊዲዴስ። 26 ኢስቲ ማስቃሌ ቦላ ጻፊ ሺሺዳ ሞቶ ቃላይ፥ «ኣይሁዳ ካዎ» ጊዛ ቃላ። 27 ኢዛራ ኢሲፌ ናምኡ ፓንጋታ ኢሳ ኢዛፔ ኡሻቻራ ኢሳ ሃዲርሳራ ካቂዳ። 28 ሄሳንካ ካሴ ማጻፋይ፥ «ኢታታራ ኢሲፌ ታይቤቲዴስ» ጊዳ ቲንቢቴ ቃላይ ፖሌቲዴስ። *ኢሲ ኢሲ ጌሻ ማጻፋቲ ታይቦ 28 ቦላ ዲዛ ቆፋ ጉጄቴስ፤ ቃላዚካ ሉቃሳን 22፡37 ቦላ ዲዛይሳ ሚሳቴስ። ኢሳ 53፡12
29 ኦጌራ ኣꬊ ቢዛይቲካ ባ ሁኤ ቃꬂሼ፥ «ኦይ! ኦይ! ጾሳ ኬꬃ ላላዳ ሄꬑ ጋላሳን ኬጻናይ ኔኔ?» ጊዲ ኢታ ጫሼ ጫዪሼ፥ ማዛ 22፡7፤ 109፡25፤ ማር 14፡58፤ ዮሃ 2፡19 30 «ኣኔ ሃኢ ማስቃሌ ቦላፌ ዎꬋዳ ኔና ኣሻ» ጊዳ።
31 ሄሳꬆካ ቄሴታ ሃላቃቲኔ ሙሴ ዎጋ ታማርሲዛይቲ ባ ጊዶን ኢሶይ ኢሳስ፥ «ሃራታ ኣሺዴስ ሺን ባና ኣሻና ዳንዳይቤና» ጊዲ ኢዛ ቂꬊዳ። 32 «ኑ ኢዛ ቤኢዲ ኣማናና ማላ ኣኔ ሃይሲ ኪርስቶሲ ኢስራኤሌታ ካዎይ ሃኢ ማስቃሌፔ ዎꬎ» ጊዳ። ኢዛራ ካቄቲዳይቲካ ኢዛ ቦላ ጫሼ ኮሪዳ።
ዬሱሳ ሃይቆ
(ማቶ 27፡45-56፤ ሉቃ 23፡44-49፤ ዮሃ 19፡28-30)
33 ኡሱፑን ሳቴፔ ዶሚዲ ኡዱፉን ሳቴ ጋካናስ ቢታይ ዉሪ ꬉሚዴስ። 34 ኡዱፉን ሳቴ ቦላ ዬሱሲ፥ «ኤሎሄ! ኤሎሄ! ላማ ሳባቂታኔ» ጊዲ ቃላ ꬎቁ ሂስቲዲ ዋሲዴስ። ሄሳስ ቢርሼꬃይ፥ «ታ ጾሶ! ታ ጾሶ! ኔ ታና ኣዛስ ኣጋዲ?» ጉሳ። ማዛ 22፡1
35 ሄን ኤቂዳ ኣሳፔ ኢሲ ኢሲ ኣሳቲ ሄሳ ሲዪዲ፥ «ኤላሳ ጼይጌስኮ!» ጊዳ። 36 ሄሳፌ ኢሲ ኣሲ ኤሌሊ ቢዲ ጫሊዳ ዎይኔ ጫጄ †ጫሊዳ ዎይኔ ጫጄ ካቄቲዳ ኣሲ ባ ዋዬ ባላና ማላ ኡሼቴስ። ኢስፖንጄ ማላ ሚሻን ጌልꬂ ኬሲዲ ሚꬃ ጼራን ኦይꬂዲ ኡያና ማላ ዬሱሳስ ሺሺዴስ። ሄሳፌ ቃሴ፥ «ኣኔ ኣጋጊቴ፤ ኤላሲ ዪዲ ኢዛ ካቆፔ ዎꬂሺን ኑ ቤያና» ጊዴስ።
37 ሄሳፌ ዬሱሲ ቃላ ꬎቁ ሂስቲ ዋሲዲ ሼምፖ ኬዚዴስ።
38 ጾሳ ኬꬄ ማጋላሻይ ሁኤራ ዱጌ ናምኡ ኬዚ ዳኬቲዴስ። ኬሳ 26፡31-33 39 ዬሱሳ ጊናራ ኤቂዳ ኢሲ ማቶ ሃላቃይ ዬሱሲ ሄሳꬆ ጊታ ቃላራ ዋሲዲ ሼምፖ ኬዚሺን ቤኢዲ፥ «ሃይሳዴይ ቱሙ ጾሳ ናኮሺን» ጊዴስ። 40 ሄ ዎዴ ማጫሳቲ ሃኒዛይሳ ሃሆን ዲዲ ጼሊዳ። ኢስታ ጊዶፌ ማግዳሌፔ ዪዳ ማራማኔ ካሎቲዛ ያቆቤ ዮሳ ኣዮ ማራሚራ ቃሴካ ሳሎሚራ ኢሲፌ ዴቴስ። 41 ሄይቲ ማጫሳቲ ጋሊላን ዬሱሳ ካሊሼኔ ኢዛስ ኦꬂሼ ጋምኢዳይታ። ኢስታራካ ኢሲፌ ሃራ ዳሮ ማጫሳቲ ዬሩሳላሜ ቢዳ። ሉቃ 8፡2-3
42 ጋዴይ ቃሚ ቃሚ ቢሺን ሳምባታስ ጊጌቲዛ ጋላሲ ጋኪዴስ። 43 ዴሬ ጪማታ ጊዶን ቦንቼቲዳ ኢሲ ኣርማቲያሴ ዴሬ ኣስ ዮሴፌ ጌቴቲዛይሲ ጾሳ ካዎቴꬅ ናጊሼ ዲዛዴይ ባቦንታ ጲላጾሳኮ ቢዲ ዬሱሳ ኣሃ ዎሲዴስ። 44 ጲላጾሲካ ኢዚ ሂኒ ዎዴ ኤሌራ ሃይቂዳይሳ ሲዪዲ ማላሌቲዴስ። ማቶ ሃላቃ ጼይጊሲዲ፥ «ኢዚ ሃይቂ ጋምኢዴ?» ጊዲ ኦይቺዴስ። 45 ኢዚ ሃይቂዳይሳ ማቶ ሃላቃይ ጌሺ ኤሪዳፔ ጉዬ ዬሱሳ ኣሃ ዮሴፌስ ኢሚዴስ። 46 ዮሴፌይካ ሞጎ ማይኦ ሻሚዲ ኣሃ ማስቃሌፔ ዎꬂዲ ሞጎ ማይኦን ጻጺዲ ሹቻፌ ዎጬቲዳ ዱፎን ሞጊዴስ። ዱፋ ዶና ሹቻራ ጎርዲዴስ። 47 ማግዳሌፔ ዪዳ ማራሚራኔ ዮሴፌ ኣዮ ማራሚራ ዬሱሳ ኣሃ ኣዋን ሞጊዳኮ ቤኢዳ።