ጌሻ ማጻፋ ናሆሜ ቲንቢቴ 1

ናሆሜ ቲንቢቴ

ጊዶ ቆፋ

ናሆሜይ ቤኒሶፌ ኢስራኤሌ ኣሳስ ዎልቃማ ሞርኬ ጊዲዳ ኣሶሬ ዋና ካታማ ናናዌ ꬋዮ ጊሻስ ዮቲዛ ጊንጾ። ናናዌይ ኪርስቶሲ ዬሌታናፔ ካሴ ላፑንꬃ ጼቱ ላይꬃስ ዉርሴꬃ ቦላ ኢዛ ꬋያናይሳ፥ ጾሲ ሜንጼ ኢታ ዴሬ ቦላኔ ኦቶራንቻታ ቦላ ፒርዳናይሳ ቤሴስ።

ሃ ማጻፋይ ኦይኪዳ ኩሜꬃ ቆፋ

ዳሮ ያሺዛ ጾሳ ሃንቆ 1፡1-6

ኣሶሬ ቦላ ኣꬊዳ ፒርዳይ ኢስራኤሌ ዴራስ ሂዶታ ጊዴꬅ 1፡7-15

ኣሶሬ ዋና ካታማ ናናዌ ꬋዮ 2፡1—3፡19

1 ኤልቆሼ ዴሬ ኣስ ናሆሜይ ናናዌ ꬋዮ ጊሻስ ዮቲዳ ኣጁታ ማጻፋይ ሃይሳፌ ካሊዛይሳ።

ናናዌ ቦላ ቆንጪዳ ጾሳ ሃንቆ

2 ጎዳይ ዚልኤቲዛኔ

ሃሎ ኬሲዛ ጾሳ፤

ጎዳይ ሃሎ ኬሲዛኔ

ሃንቆን ኩሚዳ ጾሳ።

ጎዳይ ሃሎ ኬሲዛዴኔ

ፓላ ሚሺ ኢዛን ኩሚዳዴ።

ጎዳይ ባ ባልጋራታ ቦላ

ሃሎ ኬሴስ፤

ባ ሞርኬታ ቦላ

ባ ሃንቆ ኤሄስ።

3 ጎዳይ ሃንቄታናስ ኤሶቴና፤

ኢዛ ዎልቃይካ ጊታ።

ጎዳይ ሞራንቻ

ቃጻዮንታ ኣጌና፤

ጎቴ ጫርኮይኔ ኣባ ዳምባላይ

ኢዛስ ኦጌ፤

ሻራይ ኢዛ ቶሆ ጉዱላ።

4 ኣባ ሴሪዲ ሜሊሴስ፤

ሻፋታ ኡባ ሚጪንቼስ።

ባሳኔይኔ

ቃርሜሎሴይ ሹሊዳ።

ሊባኖሴ ጪሻቲካ

ቆቆፌቲዳ።

5 ዙማቲ ኢዛ ሲንꬃን ኮኮሪዳ፤

ዙምቡላቲካ ሴሪዳ።

ኢዛ ሲንꬃን ቢታይ፥ ኣላሜይኔ

ኢዚን ዲዛ ኡባቲ ቃጺዳ።

6 ኢዛ ሃንቆራ ኤቄታና

ዳንዳይዛይ ኦኔ?

ኢዛ ሃንቆ ሚኖዛ

ቶካና ዳንዳይዛይ ኦኔ?

ኢዛ ሃንቆይ ታማ ማላ ኤጺዴስ፤

ዛላቲካ ኢዛ ሲንꬃፌ ዛኢዳ።

7 ጎዳይ ሎኦ፤

ሜቶ ጋላሲካ ቆቴቲ ኣቲዛሶ።

ኢዛን ኣማኔቲዛይታ ናጌስ።

8 ጊዶ ኣቲን ኢዚ ናናዌ

ዎልቃማ ዲኦ ሃꬃን

ꬋይሳና፤

ባ ሞርኬታ ꬉማይ

ዲዛሶ ዬዴꬃና።

9 ኢስቲ ጾሳ ቦላ ኣይ ዱላቲኮካ

ኢዚ ኢስታ ꬋይሳና።

ሜቶይ ናምኣንꬆ ዴንዴና።

10 ኢስቲ ኣጉንꬃን ቃጼታና፤

ባ ዎይኔ ኡሻን

ኢስቲ ማꬆታና፤

ታማይ ኢስታ ቡጻ ማላ ማና።

11 ሃኔ ናናዌ!

ጎዳ ቦላ ኢታ ዱላቲዛይቲኔ

ኢታ ዞሬ ዞሬቲዛይቲ

ኔ ጋርሳፌ ቤቲዳ፤

12 ጎዳይ፥ «ኢስቲ ኣይ ዎልቃማታኔ

ዳሮታ ጊዲኮካ

ኢስቲ ቃንጼቲ ꬋያና።

ሃይሶ ዩሁዳ ኔኒ ሃይሳፌ ካሴ

ታ ኔና ኡንኤꬂዳ ጊዲኮ

ሃይሳፌ ጉዬ

ታ ኔና ኡንኤꬂኬ።

13 ሃኢካ ታ ኢስታ ቃምባራ

ኔ ሞርጌፌ ሜንꬃ ዲጋና፤

ኔ ኢዛን ቃሼቲዳ ሳንሳላታካ

ዱꬃ ዬጋና» ጌስ።

14 ሃኔ ናናዌ ጎዳይ ኔና፥

«ሃይሳፌ ሲንꬃን ኔ ሱንꬅ

ጼይጊዛ ዬሌታይ ዴና።

ኔ ኤቃ ጾሳታ ኬꬃን ዲዛ

ማሴቲ ጊጊዳ ሚስሌታኔ

ሴሪሲ ጊግሲዳ

ኤቃ ጾሳታ ꬋይሳና፤

ኔ ኢታ ጊዲዳ ጊሻስ

ኔ ሞጌታናሶ

ታ ቦካና» ጌስ።

15 ሄኮ ሚሺራቾ ዮቲዛይሲ፥

ሳሮቴꬅ ኣዋጂዛይሲ

ዙማ ቦላራ

ዩሳን ዴስ።

ዩሁዳ ኔ ባኣሌታ ቦንቻ፤

ኔ ኣዲኔቲዳይሳ ጋꬃ፤

ሃይሳፌ ጉዬ ኢታቲ

ኔ ዴሬ ዎራጄቴና፤

ኢስቲ ሙሌራ ꬋያና።

1:1 ኢሳ 10፡5-34፤ 14፡24-27፤ ሶፎ 2፡13-15

1:15 ኢሳ 52፡7