ዎርዶይኔ ቦንቃይ

ኢዚን ኩሚዴስ፤

ኢዚፔ ቆጪሬቲ ሺቂዳይሲ

ኤፊንካ ዉሬና።

ኢሪዞ ጬንጉርሲ፥

ፒላታ ፓራ ኣዳራሶይ፥

ፓራ-ጋሬታ ጊሪሲ ሲዬቲዴስ።

ማሻይ ፖፖልኡ ጌስ፤

ቶራይ ጾልቄቴስ፤

ዳሮይ ሃይቂዴስ፤

ኣሃይ ኣሃ ቦላ ኮሬቲዴስ፤

ኢዛስ ቆዳይካ ዴና፤

ኣꬊ ቢዛሶይካ

ቤቲቤና።

ቡቴ ኣꬃዳ

ኣስ ባሌꬂዛኔ

ሙሬኒዛ ላይማይ ጋሶና።

ኢዛ ባ ላይማቴꬃን

ካዎቴꬃ፥ ማሮቴꬃን

ዴሬዛ ኣይሌሲዳሮ።

«ሃኔ ታኒ ኔ ቦላ

ሞርኬቴꬃን ዴንዳዲስ፤

ታኒ ኔ ቃሚሳ ቃራ

ኔ ኣይፌሶ ካማና፤

ኔ ካሎቴꬃ ዴራስ፥

ዬላቴꬃ ካዎቴꬃታስ

ታ ቤሳና።

ታ ኔና ካꬋና፤

ቂꬌስካ ኣꬃ ኢማና።

‹ናናዌይ ላሌታዱስ፤

ኢዚስ ዬካናይ ኦኔ?› ጋና።

ኔና ሚንꬄꬃናዴ

ታ ኣዋፔ ዴማኔ?» ጊዴስ።

ሃꬃን ዶዴታ ዲዛ

ኖኤ ኣሞኔፔ ጎባይ?

ሻፋዚ ኢዚስ ቴቄ ሃꬃዚካ

ኢዚስ ጊምቤ።

ዛዋይ ባይንዳ ዎልቃ፤

ፑጼይኔ ሊቢያይ

ኢዞ ማዲዛይታ፤

ጎዴታ ባዱስ፤

ኢዚ ናይቲ ኦጌታ ቲጻ ቦላ

ዲንጬቲዳ፤

ኢዚ ዳናታ ቦላ

ሳማይ ዎꬊዴስ፤

ኢዚ ጊታ ኣሳቲ

ኡባይ ሳንሳላታን ቃሼቲዳ።

ማꬆታናኔ ቆቴታና፤

ሞርኬታፔ ኣቲዛሶ ኔ ኮያና።

ባላሴ ሚꬃስ ኮይሮ ኣይፌ ማላ፤

ኢስቲ ቃጺዛ ዎዴ

ኢስታ ኣይፌቲ

ሚዛዴ ዶናን ዎꬌቴስ።

ዉሪካ ማጫ ጻላ!

ኔ ዛዋቲ ኔ ሞርኬታስ

ዋጊ ጊ ዶዬቲዳ፤

ኢስታ ኮላታታካ ታማይ ሚዴስ።

ሃꬅ ዱቃ፤

ኔስ ቴቄ ሚንꬃ ጊጊሳ፤

ማና ኡርቃ ኮያ፤

ኡርቃ ዬꬋዳ

ጹቤ ኦꬃ።

ማሻይካ ኔና ቃንጻና፤

ጉምባሮይ ሚዛ ማላ

ኔና ጋርጫና፤

ጉምባሮ ማላ ዬሌታ፤

ቦሌ ማላ ዳራ።

ሳሎ ጾሊንቴፔካ ዳርሳዳሳ።

ኢስቲ ጊዲኮ ቢታዮ ቦሌ ማላ

ፒቲ ሚዲ ፒራꬊ ቢዳ።

ኔ ጊታ ኣሳቲ ሜጎ ጋላስ

ጊምቤ ጋርሳን

ኡቲዛ ጉምባሮ ማላ።

ኢስቲ ኣርሼይ ኬዚሺን

ፒራꬌቴስ፤

ኢስቲ ፒራꬊ ቢዛሶይ

ኣዋኮ ኤሬቴና።

ኔ ሄንꬃንቻቲ ꬊስኪዳ፤

ኔ ጊታ ኣሳቲ ዎፑ ጊ ኢቺዳ፤

ኔ ዴሬይ ሺሺዛይ ꬋዪን

ዙማ ቦላ ላሌቲዴስ።

ዳንዳይዛይ ዴና፤

ኔኒ ሃይቆስ ጋꬂዛ

ሜቆ ሜቃዳሳ፤

ኔ ጊሻስ ሲዪዳ ኡባይ

ኔ ኩንዴꬃን ኡፋዬቲ

ኩሼ ባቃና፤

ዛዋይ ባይንዳ

ኔ ሜንጼ ኢታቴꬂ

ቦቾንታይ ኦኔ?