1 ካታማዛ ዲርሳይ ጊምቤቲዳይ ሃይሳፌ ካሊ ዲዛይሳ ማላ፤ ቄሴታ ሃላቃ ኤልያሼቤይኔ ኢዛራ ኦꬂዛ ቄሴቲ፥ «ዶርሳታ ፔንጌ» ጌቴቲዛ ጊምቤ ፔንጌዛ ዛሪ ጊምቢዲ ጾሳስ ዱማሲዳ፤ ኢዛስ ፔንጌታካ ጊግሲዳ፤ ጊምቤዛካ «ጼቱ» ጌቴቲ ጼይጌቲዛ ናጌሶ ጊምቤዛኔ «ሃናኒኤሌ ጊምቤ» ጌቴቲ ጼይጌቲዛ ሻኮ ጊምቤዛኮ ጋካናስ ጾሳስ ዱማሲዳ። *ሻኮ ጌቴቲዛይሲ ኢሲ ኢሲ ባጋ ጋሞꬆ ቃላን ሴላ ጌቴቴስ።

2 ኢዛፔ ካሊ ዲዛይሳ ኢያርኮ ኣሳቲ ኦꬂሺን ኢዛፔ ካሊዛይሳ ኢሚሬ ና ዛኩሬይ ዛሪ ኦꬂዴስ።

3 ሃሲናኣ ዜሬꬃቲ ሞሌ ጊምቤ ፔንጌ ጌቴቲዛሶ ዛሪ ኦꬂዳ፤ ቱሳታካ ኤሲዳ፤ ፔንጌታካ ጌልꬂዳ፥ ፔንጌታ ጎርዲዛ ቁልፔታኔ ኮላታታ ጊግሲዳ።

4 ኢዛፔ ካሊ ዲዛይሳ ሃቆጼ ናዛ ና ኡሪያ ና ሜርሞቴይ ዛሪ ኦꬂዴስ፤ ካሊ ዲዛይሳ ሜሼዛቤሌ ናዛ ና ባራካዬ ና ማሹላሜይ ዛሪ ኦꬂዴስ፤ ኢዛፔ ካሊ ዲዛይሳ ባኣና ና ሳዶቄይ ዛሪ ኦꬂዴስ።

5 ኢዛፔ ካሊ ዲዛይሳ ቴቁሄ ካታማ ኣሳቲ ዛሪ ኦꬂዳ፤ ጊዶ ኣቲን ሄ ካታማን ዲዛ ሹሜቲ ኢስታ ኦሲሲዛ ኣሳቲ ኢስታስ ጊሻ ኢሚዳ ኦሶዛ፥ «ኦꬆኮ!» ጊ ኢጺዳ።

6 ፋሳሄ ና ዮያዳኤይኔ ቤሲዲያ ና ማሹላሜይ ዪሻኔ ጋልኣ ጊምቤ ፔንጌ ዛሪ ኦꬂዳ፤ ቃሴ ቱሳታካ ኤሲዳ፤ ፔንጌ ጌልꬂዳ፤ ፔንጌታስ ቁልፔታኔ ኮላታታ †ኮላታታ፡ ኮላታታ ጌቴቲዛይሲ ኢሲ ኢሲ ባጋ ጋሞꬆ ቃላን ኮልጌ ዎይኮ ኮሌ ዎይኮ ጎልጌ ጌቴቴስ። ጌልꬂዳ። 7 ሄሳፌ ካሊ ዲዛይሳ ጌባኦኔ ካታማ ኣስ ማላጺያራኔ ሜሮኖቴ ዴሬ ኣስ ያዶኔራ ዛሪ ኦꬂዳ። ቃሴካ ጌባኦኔኔ ሚጺጳ ካታማ ኣሳቲካ ኢስታራ ኢሲፌ ጊዲዲ ኤፊራጺሴ ሻፋ ፒንꬃን ኣርሼይ ዉሊዛ ባጋራ ዲዛ ዴሬ ኣይሲዛይ ዴኢዛሶ ጋካናስ ዲዛይሳ ዛሪ ጊምቢዳ።

8 ኢዛፔ ካሊ ዲዛይሳ ዎርቃ ቆጺዛ ሃርሃያ ና ኡዚኤሌይ ዛሪ ኦꬂዴስ፤ ካሊ ዲዛይሳ ሺቶ ኬሲዛ ሃናኒያይ ዛሪ ኦꬂዴስ፤ ሃ ኣሳቲ ዬሩሳላሜን፥ «ኣሆ ጊምቤ» ጌቴቲዛሶ ጋካናስ ዲዛይሳ ኡባ ዛሪ ኦꬂዳ።

9 ኢስታፌ ካሊ ዲዛይሳ ኦꬂዳይ ዬሩሳላሜ ዎራዳ ሄካ ባጋ ሻኪ ኣይሲዛ ኡሬ ና ኤራፋያይ ዛሪ ኦꬂዴስ።

10 ሃሩማፌ ና ዬዳያይ ባ ኬꬃ ፔንጌ ጊናን ዲዛይሳ ዛሪ ኦꬂዴስ፤ ካሊ ዲዛይሳ ሃሻቢናዬ ና ሃጹሼይ ዛሪ ኦꬂዴስ። 11 ሃሪሜ ና ማልኪያይኔ ፓሃቴ-ሞኣቤ ና ሃሹቤይ ሄሳፌ ካሊ ዲዛይሳ፥ «ኢቶኔ ጊምቤ» ጌቴቲ ጼይጌቲዛይሳ ዛሪ ኦꬂዳ። 12 ዬሩሳላሜ ዎራዳስ ኣቲዳ ሄካ ባጋ ኣይሲዛ ሃሉሄሼ ና ሻሎሜይ ካሊ ዲዛይሳ ዛሪ ኦꬂሺን ኢዛ ማጫ ናይቲ ኢዛ ማዲዳ።

13 ሃኖኔኒኔ ዛኖሄን ዲዛ ኣሳይ ኢሲፌ ማዴቲዲ ዙሌ ጊምቤ ፔንጌ ዛሪ ኦꬂዳ፤ ቃሴ ኢዛስ ፔንጌታ ጌልꬂዳ፤ ቁልፔታኔ ኮላታታ ጌልꬂዳ፤ ቡራ ዬጌꬃሶ ጋካናስ ኣዱሳቴꬃይ 1,000 ዋꬋ ጊዲዳ ጊምቤ ዛሪ ኦꬂዳ።

14 ቤቲ-ሃካሪሜ ዎራዳ ኣይሲዛ ኤሬካቤ ና ማልኪያይ፥ «ቡራ ዬጊዛ ጊምቤ ፔንጌ» ጌቴቲዛይሳ ዛሪ ኦꬂዴስ፤ ቃሴ ኢዛስ ፔንጌታ ጌልꬂዴስ፤ ፔንጌታስካ ቁልፔኔ ኮላታታ ጌልꬂዴስ።

15 ሚጺጳ ዎራዳ ኣይሲዛ ኮሊ-ሆዜ ና ሻሎሜይ፥ «ፑልቶ ሃꬃ ጊምቤ ፔንጌ» ጌቴቲዛ ጊምቤዛ ዛሪ ኦꬂዴስ፤ ቃሴ ኢዛስ ካማ ኦꬂዳፔ ጉዬ ጎርዲዛ ፔንጌታ ጌልꬂዴስ፤ ፔንጌታስካ ቁልፔታኔ ኮላታታ ጌልꬂዴስ፤ ሼላሄ ኤሌ ሃꬃ ባጋራ ካዎ ኣታኪልቴሶፔ ኦይኪዲ ካዎ ዳዊቴ ካታማ ጋካናስ ዎꬊ ቢዛ ኬላ ዛሪ ኬሊዴስ። 16 ቤቲ-ጹሬ ዎራዳ ሄካ ባጋ ኣይሲዛ ኣዚቡቄ ና ናሂሚያይ ዳዊቴ ዱፎሶ ጋካናስ፥ ኤሌ ሃꬅ ጌቴቲዛሶዛ ጋካናሲኔ ኦላ ቃራቲ ዲዛሶ ጋካናስ ዲዛይሳ ዛሪ ኦꬂዴስ።

17 ጊምቤዛ ኦሶን ዲዛ ሌዌ ዜሬꬃታ ሱንꬂ ሃይሳፌ ካሊ ዲዛይሳ፤ ባኔ ና ኤሬሁሜይ ኢዛፔ ካሊ ዲዛይሳ ዛሪ ኦꬂዴስ፤ ቃሴ ቂኢላ ዎራዳ ሄካ ባጋ ኣይሲዛ ሃሻቢያይ ባ ዎራዳ ሱንꬃን ካሊ ዲዛይሳ ዛሪ ኦꬂዴስ።

18 ሄሳፌ ካሊ ዲዛይሳ ሃንኮ ኣቲዳ ቂኢላ ዎራዳስ ሄካ ባጋ ኣይሲዛ ሄናዳዴ ና ባዌይ ዛሪ ኦꬂዴስ።

19 ሚጺጳ ዎራዳ ኣይሲዛ ኢያሶ ና ኤዜሬይ ኦላ ሚሻታ ዎꬂዛ ኬꬃ ሲንꬃ ባጋን ዲዛይሳፌ ቢዲ ጊምቤዛስ ጉላ ጋካናስ ዲዛይሳ ኡባ ዛሪ ኦꬂዴስ። 20 ዛካዬ ና ባሮኬይ ዋና ቄሴ ኤልያሼቤሶ ፔንጌ ጋካናስ ዲዛይሳ ዛሪ ኦꬂዴስ። 21 ሃቆጼስ ናዛ ና ጊዲዳ ኡሪያ ና ሜርሞቴይ ኤልያሼቤ ፔንጌፌ ቢዲ ኢዛ ኬꬃ ዉርሴꬅ ጋካናስ ዲዛይሳ ዛሪ ኦꬂዴስ።

22 ሄሳፌ ካሊ ዲዛ ጊምቤዛ ዬሩሳላሜ ዩሾን ዲዛ ቄሴቲ ዛሪ ኦꬂዳ። 23 ኢስታፌ ካሊዛይሳ ቢኒያሜይኔ ሃሹቤይ ባንታ ኬꬃ ሲንꬃራ ዲዛ ጊምቤዛ ዛሪ ኦꬂዳ፤ ቃሴ ኣናኒያ ናዛ ና ማኢሳያ ና ኣዛሪያሲ ባ ኬꬃ ሲንꬃ ባጋራ ዲዛ ጊምቤዛ ዛሪ ኦꬂዴስ።

24 ሄናዳዴ ና ቢኑዌይ ኣዛሪያሳ ሶፔ ዶሚዲ ጊምቤዛ ጉላ ጋካናስ ዲዛይሳ ዛሪ ኦꬂዴስ። 25 ኡጻዬ ና ፓላሌይ ጊምቤዛ ጉላፔ ቢዲ ዛቤ ናጌሶ ማታን ፑዴ ባጋራ ዲዛ ካዎ ኬꬃ ጊምቤ ሲንꬅ ጋካናስ ዲዛይሳ ኡባ ዛሪ ኦꬂዴስ። 26 ሄሳፌ ካሊ ዲዛይሳ ፓሮሴ ና ፓዳያይ፥ «ኦፌሌ» ዙምቡላን ዲዛ ጾሳ ኬꬃ ኦሳንቻቲ ሃꬃ ፔንጌ ጌቴቲዛሶፔ ቢዲ ኣርሼይ ኬዚዛ ባጋ ጋካናስ ዲዛ ጊምቤዛ ዛሪ ኦꬂዴስ።

27 ሄሳፌ ካሊ ዲዛይሳ ቴቁሄ ኣሳይ ሃራ ቃሴካ ጾሳ ኬꬃ ናጌስ ኦሴቲዳ ጊታ ጊምቤፌ ዶሚዲ፥ «ኦፌሌ» ማታን ዲዛ ጊምቤ ጋካናስ ዲዛይሳ ዛሪ ኦꬂዳ።

28 ሃንኮ ቄሴቲ ኢሶይ ኢሶይ ባ ኬꬃ ፔንጌን ዲዛይሳ ካሊ ካሊዲ ፓራ ጊምቤ ፔንጌ ጌቴቲዛሶፔ ፑዴ ባጋራ ዲዛይሳ ዛሪ ኦꬂዳ። 29 ኢሜሬ ና ሳዶቄይ ባ ኬꬃ ሲንꬃን ዲዛይሳ ኦꬂሺን ኣርሼይ ሞኪዛ ባጋራ ዲዛ ጊምቤዛ ፔንጌ ናጊዛ ሻካኒያ ና ሻማኤይ ካሊ ዲዛይሳ ዛሪ ኦꬂዴስ። 30 ሼሌሚያ ና ሃናኒያይኔ ጻላፌስ ኡሱፑንꬃ ና ሃኖኔይ ኢስታስ ናምኣንꬆ ዩሾ ኢሜቲዳይሳ ዛሪ ኦꬂዳ። ባራካዬ ና ማሹላሜይ ባ ኬꬃስ ሲንꬃ ባጋራ ዲዛይሳ ዛሪ ኦꬂዴስ። 31 ሄሳፌ ካሊ ዲዛይሳ ዎርቃ ቆጺዛ ማልኪያይ ጊምቤዛ ጉላፔ ዶሚዲ ፑዴ ጼራ ባጋራ ዲዛሶ ጋካናስ ዛሪ ኦꬂዴስ፤ ቃሴካ ሄ ናጊዛሶ ፔንጌ ጌቴቲዛሶ ባጋራ ጾሳ ኬꬃ ኦሳንቻቲኔ ዛልኣንቻቲ ጎኤቲዛሶ ጋካናስ ዲዛይሳ ዛሪ ኦꬂዴስ።

32 ዎርቃ ቆጺዛ ኣሳቲኔ ዛልኣንቻቲ ጊምቤዛ ጉላፔ ዶሚዲ ዶርሳታ ፔንጌ ጌቴቲዛሶ ጋካናስ ዲዛይሳ ዛሪ ኦꬂዳ።