1 ሳላቲያሌ ና ዜሩባቤሌኔ ቄሴታ ሃላቃ ኢያሶራ ዲኤቴꬃፌ ሲሚዳ ቄሴታ ሱንꬂኔ ሌዌታ ሱንꬂ ሃይሳፌ ካሊዛይሳ፤ ቄሴቲ፥ ሳራያ፥ ኤርማሳ፥ ኢዝራ፥ 2 ኣማሪያ፥ ማሉኬ፥ ሃጹሼ፥ 3 ሻካኒያ፥ ኤሬሁሜ፥ ሜርሞቴ፥ 4 ኢዶ፥ ጊንቶዬ፥ ኣቢያ፥ 5 ሚያሚኔ፥ ማኣዲያ፥ ቢልጋ፥ 6 ሻማኤ፥ ዮያሪቤ፥ ያዳያ፥ 7 ሳሉ፥ ኣሞኬ፥ ኪልቂያሳ፥ ያዳያ። ሃይታንቲ ቄሴታ ሃላቃ ኢያሶ ዎዴን ባ ባጋ ቄሴታ ካሌꬂዛ ቄሴታ።

8 ሌዌታ፥ ጋላታ ዬꬃ ዬጺሲዛይታስ ኣላፌ ጊዲዲ ሌዌቲ፥ ኢያሶ፥ ቢኑዌ፥ ቃዲምኤሌ፥ ሼሬቢያ፥ ዩሁዳኔ ማታኒያ። 9 ባቂቡቂያ፥ ኡኔኔ ሃራ ሌዌ ባጋፌ ጊዲዳ ኢስታ ኢሻቲ ኢስታራ ኢሲፌ ሶሬኒኔ ኤዶን ኢሶይ ኢሳፌ ኤኪ ዬጼቴስ።

10 ኢያሶይ ኢዮኣቄሜ ዬሊዴስ፤ ኢዮኣቄሜይ ኤልያሼቤ ዬሊዴስ፤ ኤልያሼቤይ ዮያዳኤ ዬሊዴስ። 11 ዮያዳኤይ ዮናታኔ ዬሊዴስ፤ ዮናታኔይ ያዱኤ ዬሊዴስ።

12 ኢዮኣቄሜይ ቄሴታ ሃላቃቴꬃን ዲዛ ዎዴ ቄሴቲኔ ኢስታ ሃላቃቲ ሃይሳፌ ካሊዛይታ፤ ሳራያ ዜሬꬃፌ ማራዬ፥ ኤርማሳ ዜሬꬃፌ ሃናኒያ፥ 13 ኢዝራ ዜሬꬃፌ ማሹላሜ፥ ኣማሪያ ዜሬꬃፌ ዪሆሃናኔ፥ 14 ማሉኬ ዜሬꬃፌ ዮናታኔ፥ ሼባኒያ ዜሬꬃፌ ዮሴፌ፥ 15 ሃሪሜ ዜሬꬃፌ ኣዳና፥ ማራዮታ ዜሬꬃፌ ሂልቂያ፥ 16 ኢዶ ዜሬꬃፌ ዛካራሳ፥ ጊንቶኔ ዜሬꬃፌ ማሹላሜ፥ 17 ኣቢያ ዜሬꬃፌ ዚኪሬ፥ ሚኒያሚኔፔኔ ሞኣዲያ ዜሬꬃፌ ፒልጻዬ፥ *ኢብራዌታ ማጻፋን ሚኒያሚኔ ጌቴቲዛ ኣዴዛ ሱንꬂ ባዋ። 18 ቢልጋ ዜሬꬃፌ ሻማኤ፥ ሻማኤ ዜሬꬃፌ ዮናታኔ፥ 19 ዮያሪቤ ዜሬꬃፌ ማታኒያ፥ ያዳያ ዜሬꬃፌ ኡዜ፥ 20 ሳላዬ ዜሬꬃፌ ቃላዬ፥ ኣሞኬ ዜሬꬃፌ ኤቦሬ፥ 21 ኪልቂያሳ ዜሬꬃፌ ሃሻቢያ፥ ያዳያ ዜሬꬃፌ ናቲናኤሌ፥

22 ቄሴታሶ ኣሳ ሱንꬂኔ ሌዌ ባጋ ኣሳታስ ሶ ኣሳ ሱንꬂ ሃይሳፌ ካሊ ዲዛይሳ፤ ኤልያሼቤ፥ ዮያዳኤ፥ ዮሃናኔኔ ያዱኤ ጌቴቲዛ ቄሴታ ሃላቃቲ ዲዛ ዎዴ ሌዌ ባጋታ ሶ ኣሳታ ሃላቃቲኔ ቄሴታ ሶ ኣሳታ ሃላቃቲ ሻኬቲ ኤሬቲዛ ማዝጋቤይ ዴስ፤ ሄሲካ ፓሪሴ ዴሬ ካዎ ዳሪዮሲ ካዎቲ ዲዛ ዎዴና። 23 ጊዶ ኣቲን ሌዌ ባጋታ ሶ ኣሳታ ሃላቃታፔ ቆንጬን ማዝጋቤቲዲ ኤሬቲዳይቲ ኤልያሼቤስ ናዛ ና ዮሃናኔይ ሃይቃና ጋካናስ ዲዛ ዎዴን ጻላ።

24 ሃሻቢያይ፥ ሼሬቢያይ፥ ኢያሶይ፥ ቢኑዌይኔ ቃዲምኤሌይ ካሌꬂዛ ሌዌ ባጋቲ ናምኡ ኬዚ ሻኬቲዳ። ሄ ናምኡ ባጋቲካ ጾሳ ኣሲ ካዎ ዳዊቲ ኣዛዚዳ ኣዛዞ ማላ ጾሳስ ጋላታ ዬꬃ ሶሬኒኔ ኤዶን ኢሶይ ኢሳፌ ኤኪ ዬጺሼ ሺሺዳ።

25 ጾሳ ኬꬃ ጊምቤ ፔንጌ ኣቻን ኦሴቲዳ ሚሽ ዎꬂዛ ሚንጃ ኬꬅ ናጊዛ ዛቤቲ ማታኒያ፥ ባቂቡቂያ፥ ኣብዲዩ፥ ማሹላሜ፥ ጻልሞኔኔ ኣቁቤ ጌቴቲዛይታ።

26 ሄይቲ ኢዮሳዶቄ ናዛ ና ኢያሶ ና ኢዮኣቄሜ ዴሬ ኣይሲዛ ናሂሚያ፥ ቄሴኔ ዎጋ ኬሂ ኤሪዛ ቄሴ ኢዝራንቲ ዲዛ ዎዴ ዶሬቲዳ ኦሳንቻቲ ዴቴስ።

27 ዬሩሳላሜ ካታማ ጊምቤይ ኣንጄቲዛ ጋላስ ሌዌ ባጋቲ ዳላን፥ ባጋናኒኔ ማሲንቆን ዬጺዲ ቦንቻና ማላ ኢስቲ ዲዛሶፔ ዲዛሶፔ ኮዬቲዲ ዪዳ። 28 ሄ ባኣሌዛ ቦንቻና ሌዌ ባጋፌ ዬጺዛይቲ ዉሪ ባ ዲዛሶፔ ዬሩሳላሜ ሄራፔኔ ናጾፌ ቢታን ዲዛ ሄራታፔ፥ 29 ዬሩሳላሜ ዩሾን ኢስቲ ባንታስ ዱሳሶ ኦꬂዳ ጊሻስ ዬጺዛይታ ቤቲ-ጋልጋላፔ፥ ጌባፔኔ ኣዚሞቴፔ ሺሺዲ ኤሂዳ። 30 ቄሴቲኔ ሌዌ ባጋቲ ባ ጊሻስ፥ ዴራ ጊሻስ፥ ካታማ ጊምቤዛ ጊሻሲኔ ጊምቤዛ ፔንጌታ ጊሻስ ጌሾ ዎጋ ኦꬂዳ።

31 ታኒ ናሂሚያይ ዩሁዳ ዴሬ ካሌꬂዛይቲ ጊምባ ቦላ ኬዛና ማላ ሂስቲዳፔ ጉዬ ሎኤꬂ ዬꬃ ዬጺዛይቲ ናምኡ ቡቴን ሻኬቲዲ ዬጻና ማላ ኦꬃዲስ፤ ኮይሮ ቡቴዚ ጊምባስ ሁኤ ቦላ ኬዚዲ ኡሻቻ ባጋራ ዲዛ፥ «ቡራ ዬሳሶ» ኣꬊ ቢዳ። 32 ኢስታካ ሆሻኢያይኔ ዩሁዳ ዴሬ ካሌꬂዛይታፔ ባጋቲ ካሊዳ። 33 ሃራቲ ቃሴ ኢስታራ ዲዛ ኣዛሪያሲ፥ ኢዝራይ፥ ማሹላሜይ፥ 34 ዩሁዳይ፥ ቢኒያሜይ፥ ሻማኤይ፥ ኤርማሲ ሳልፊዲ ኣꬊዳ፤ 35 ዛዬ ፑኒዛ ቄሴቲ፥ ቃሴካ ኣሳፌ ና፥ ዛኩሬ ና፥ ሚካያ ና፥ ማታኒያ ና፥ ሻማኤ ና፥ ዮናታኔ ና ዛካራሲ ኢስታራ ኣꬊዳ። 36 ዛካራሳ ዜሬꬂ ሻማኤይ፥ ኣዛሪኤሌይ፥ ሚላላይ፥ ጊላላይ፥ ማኣዳይ፥ ናቲናኤሌይ፥ ዩሁዳይኔ ሃናኒያይ ጾሳ ኣስ ዳዊቲ ኢዛን ዬጺዛ ዬꬃ ሚሽ ኤኪ ካሊዳ፤ ሄ ቡቴዛ ካሌꬂዛይ ዎጋ ሎኤꬂ ኤሪዛ ቄሴ ኢዝራ። 37 ፑልቶ ሃꬃ ፔንጌኮ ጋኪዳፔ ጉዬ ዳዊቴ ካታማ ኤፊዛ ኦጌ ኦይኪዳ፤ ጊምባ ቦላ ዲዛ ኬቻታ ፑዴ ኬዚዲ ካዎ ዳዊቴ ካዎቴꬃ ኬꬃ ኣቻራ ኣꬊዲ ሄ ካታማይስ ኣርሼይ ኬዚዛ ባጋራ ዲዛ ሃꬃ ጊምቤ ፔንጌ ሲሚዳ።

38 ሃንኮ ዬꬃ ዬጺዛ ቡቴዚ ጊምባ ቦላራ ሃዲርሳ ባጋ ኣꬊ ቢዴስ፤ ታኒካ ባጋ ኣሳራ ሃ ቡቴዛ ካላዲስ፤ ኢቶኔ ጊምቤ ጌቴቲዛሶራ ካንꬂዲ ጌዴ ኣሆ ጊምቤዛኮ ጋኪዶስ። 39 ቃሴ ኑ ሄሳፌ ኣꬊ ኤፍሬሜ ጊምቤ ፔንጌ፥ ዪሻና ጊምቤ ፔንጌ፥ ሞሌ ጊምቤ ፔንጌ ጌቴቲዛሶኔ ሃናኒኤሌ ጊምቤ፥ ጼቱ ጊምቤታኔ ዶርሳታ ጊምቤ ፔንጌ ጌቴቲዛሶታ ጋኪዶስ፤ ጾሳ ኬꬃ ማታን ዲዛ ዛቤታ ጊምቤ ፔንጌ ጌቴቲዛሶዛ ጋኪዲ ሳልፌዛ ጊጊዶስ።

40 ሃይሳꬆ ናምኡ ቡቴ ሳልፌዚ ጾሳ ዬꬃን ጋላቲሼ ታናራ ዲዛ ዴራ ካሌꬂዛይታራ ጾሳ ኬꬂ ዲዛሶ ዛዋ ጋኪዶስ፤ 41 ታ ዲዛ ሳልፌዛን ጹሩምባ ፑኒዛ ቄሴቲ ሃይሳፌ ካሊ ዲዛይታ፤ ኤልያቄሜ፥ ማኢሳያ፥ ሚኒያሚኔ፥ ሚካያ፥ ኤልዮኤናዬ፥ ዛካራሳኔ ሃናኒያ፤ 42 ኢስታካ ካሊዛይቲ ማኢሳያ፥ ሻማኤ፥ ኤልኤዜሬ፥ ኡዜ፥ ዪሆሃናኔ፥ ማልኪያ፥ ኤላሜኔ ኤዜሬ፤ ሄይቲ ባ ኤቂዛሶ ኤቂዛሶ ኦይኪዳ፤ ዬጺዛይቲ ዪዚራሄያይ ካሌꬂን ባ ቃላ ꬎቁ ሂስቲዲ ዬጺዳ።

43 ሄ ጋላስ ኣሳይ ዳሮ ያርሾ ሺሺዴስ፤ ጾሳይ ኢዛ ኡፋይሲዳ ጊሻስ ዴሬዚ ኬሂ ኡፋዬቲዴስ፤ ማጫሳይኔ ናይቲካ ኢስታራ ኢሲፌ ኡፋዬቲዳ፤ ዬሩሳላሜን ሃኒዳ ኢሊሊሳ ቃላይ ሃሆን ሲዬቲዴስ።

44 ሄ ዎዴ ጾሳ ኬꬃ ኦሶስ ኢሜቲዛ ኣስራታኔ ላይꬃን ላይꬃን ኮይሮ ጋኪዛ ካꬃ ጼራኔ ሜቴቲዛ ዱማ ዱማ ሚꬃታ ኣይፌ ጼራ ዎꬂዛ ኬꬅ ናጊዛ ዛቤታ ዶሪዳ፤ ሄ ኣሳቲ ዱማ ዱማ ካታማታ ማታን ዲዛ ጎሻ ጋዴፔ ዎጋይ ኣዛዚዛ ማላ ቄሴታሲኔ ሌዌ ባጋታስ ኢሜታና ቤሲዛይሳ ሺሻና ኣላፌቴꬅ ኢስታስ ዴስ፤ ኩሜꬃ ዩሁዳ ኣሳይ ቄሴታ ቦላኔ ሌዌ ባጋታ ቦላ ኬሂ ኡፋዬቲዳ። 45 ኢስቲ ኡፋዬቲዳይካ ጾሳይ ኢስታ ኣዛዚዳ ቄሴቲኔ ሌዌቲ ፖላናስ ቤሲዛ ዎጋኔ ጌሾ ዎጋታ ኦꬂዳ ጊሻሳ፤ ጾሳ ኬꬃን ዬጺዛይቲኔ ጾሳ ኬꬃ ናጊዛ ዛቤቲካ ዳዊቲኔ ኢዛ ና ሶሎሞኔይ ካሴ ዎꬂዳ ዎጋ ማላ ኢስታፌ ናጌቲዛ ኦሶ ኦꬂ ፖሊዳ። 1ታሪ 25፡1-8፤ 26፡12 46 ካሴ ካዎ ዳዊታፔኔ ኣሳፌ ዎዴፔ ዶሚዲ ዬꬃ ዬጺዛይታሲኔ ጋላታ ዬꬃን ጾሳ ቦንቺዛ ኣሳታ ካሌꬂዛይቲ ዴቴስ። 47 ዜሩባቤሌ ዎዴኒኔ ናሂሚያ ዎዴን ኩሜꬃ ኢስራኤሌ ኣሳይ ጾሳ ኬꬃን ዬጺዛይታሲኔ ናጊዛ ዛቤታስ ጋላስ ጋላስ ኢሜታና ቤሲዛይሳ ኢሜቴስ፤ ሃንኮ ሌዌ ባጋታይሳ ዱማ ኢሜቴስ፤ ሌዌ ባጋቲካ ኣሮኔ ዜሬꬃፌ ጊዲዳ ቄሴታስ ቤሲዛይሳ ኢሜቴስ።