1 ሄ ቦሻዚ ኣጊዳፔ ጉዬ ጾሲ ሙሴሲኔ ቄሴ ኣሮኔ ና ኤልኤዜሬስ፥ 2 «ኩሜꬃ ኢስራኤሌ ማባራን ኢሳዴ ኬꬃን ኬꬃን ኢስታስ ላይꬂ 20 ኩሚዳይታኔ ሄሳፌካ ቦላራ ጊዲዲ ዎታዳሬቴꬃን ኦꬃናስ ዳንዳይዛ ኣቱማ ናይታ ኡባ ቆዲቴ» ጊዴስ። 3 ሙሴይኔ ቄሴ ኤልኤዜሬይ ዮርዳኖሴ ሻፋ ማታን ኢያርኮ ጊናራ ዲዛ ሞኣቤ ዴምባን ዴሬዛ ሺሺዲ፥ 4 «ጎዳይ ሙሴስ ኣዛዚዳ ማላ ናምኡ ታሙ ላይꬂኔ ሄሳፌካ ቦላራ ዲዛ ኣሳ ኡባ ቆዲቴ» ጊዳ።

ጊብጼ ዴሬፔ ኬዚዳ ኢስራኤሌ ኣሳይ ሃይሳፌ ካሊዛይታ፤ 5 ያቆቤስ ባይራ ናዛ ኦሮቤሌ ዛርኬፌ ዬሌቲዳይቲ ሄኖኬኔ ኢዛ ዜሬꬃታ፥ ፓሉኔ ኢዛ ዜሬꬃታ፥ታይ 1፡1-46 6 ሄጺሮሜኔ ኢዛ ዜሬꬃታ፥ ካርሜኔ ኢዛ ዜሬꬃታ። 7 ኦሮቤሌ ዛርኬፌ ቆዴቲዳይቲ 43,730። 8 ፓሉ ናይ ኤልያቤ፤ 9 ኤልያቤ ናይቲ ናሙኤሌ፥ ዳታኔኔ ኣብራሜ፤ ዳታኔይኔ ኣብራሜይ ዴሬዛን ዶሬቲዳይታ ጊዲ ኡቲዲ ቆሬራኔ ኢዛ ካሊዛይታራ ዙፔቲዲ ጎዳ ቦላ ማካሊዲ ሙሴኔ ኣሮኔ ፓጪዳ። 10 ኢስታካ ቢታያ ዶዬታዳ ቆሬራ ኢሲ ቦላ ጋꬃ ሚታዱስ፤ ኢስቲካ ሃይቂን ሳሎፔ ዎꬊዳ ታማይ 250 ኣሳ ጹጊዴስ፤ ሂስቲን ኢስታ ቃጻዬቴꬂ ሃራ ኣሳስ ማላታ ጊዲዴስ። 11 ቆሬ ዜሬꬃቲ ጊዲኮ ሃይቂቤቴና።

12 ሲሞና ዛርኬፌ ዬሌቲዳይቲ ናሙኤሌኔ ኢዛ ዜሬꬃታ፥ ያሚኔኔ ኢዛ ዜሬꬃታ፥ ያኪኔኔ ኢዛ ዜሬꬃታ፥ 13 ዛራሄኔ ኢዛ ዜሬꬃታ፥ ሳኦሌኔ ኢዛ ዜሬꬃታ፥ 14 ሲሞና ዛርኬታፔ ቆዴቲዳይቲ 22,200 ኣዴታ።

15 ጋዴ ዛርኬፌ ዬሌቲዳይቲ ጺፎኔኔ ኢዛ ዜሬꬃታ፥ ሃጌኔ ኢዛ ዜሬꬃታ፥ ሹኔኔ ኢዛ ዜሬꬃታ፥ 16 ኦሲናኔ ኢዛ ዜሬꬃታ፥ ኤሬኔ ኢዛ ዜሬꬃታ፥ 17 ኣሮዴኔ ኢዛ ዜሬꬃታ፥ ኣርኤሌኔ ኢዛ ዜሬꬃታ። 18 ጋዴ ዛርኬታፔ ቆዴቲዳይቲ 40,500 ኣዴታ።

19 ዩሁዳ ዛርኬፌ ዬሌቲዳይቲ፥ ኤራኔ ኦናኔ፤ ኢስቲ ካናኔ ቢታን ሃይቂዳ። 20 ሃንኮ ኣቲዳ ዩሁዳ ዛርኬፌ ዬሌቲዳይቲ ሴሎሜኔ ኢዛ ዜሬꬃታ፥ ፓሬሴኔ ኢዛ ዜሬꬃታ፥ ዛራሄኔ ኢዛ ዜሬꬃታ። 21 ፓሬሴ ዜሬꬃቲ ሄጺሮሜኔ ኢዛ ባጋታ፥ ሃሙሌኔ ኢዛ ዜሬꬃታ። 22 ዩሁዳ ዛርኬፌ ቆዴቲዳይቲ 76,500 ኣዴታ።

23 ዪሳኮሬ ዛርኬፌ ዬሌቲዳይቲ ቶላ ኢዛ ዜሬꬃታ፥ ፑዋኔ ኢዛ ዜሬꬃታ፥ 24 ያሹቤኔ ኢዛ ዜሬꬃታ፥ ሺሚሮኔኔ ኢዛ ዜሬꬃታ። 25 ዪሳኮሬ ዛርኬታፔ ቆዴቲዳይቲ 64,300 ኣዴታ።

26 ዛቢሎኔ ዛርኬፌ ዬሌቲዳይቲ፥ ሴሬዴኔ ኢዛ ዜሬꬃታ፥ ኤሎኔኔ ኢዛ ዜሬꬃታ፥ ያሂሌኤሌኔ ኢዛ ዜሬꬃታ። 27 ዛቢሎኔ ዛርኬፌ ቆዴቲዳይቲ 60,500 ኣዴታ።

28 ዮሴፌ ዛርኬፌ ዬሌቲዳይቲ፥ ሚናሴኔ ኢዛ ዜሬꬃታ፥ ኤፍሬሜኔ ኢዛ ዜሬꬃታ፥ 29 ሚናሴ ናይታ ዜሬꬅ ማኪሬይ ጋላኣዴ ዬሊዴስ፤ 30 ጋላኣዴ ናይቲ ኤዜሬኔ ኢዛ ዜሬꬃታ፥ ሄሌቄኔ ኢዛ ዜሬꬃታ፥ 31 ኣሲራኤሌኔ ኢዛ ዜሬꬃታ፥ ሴኬሜኔ ኢዛ ዜሬꬃታ፥ 32 ሻሚዳኔ ኢዛ ዜሬꬃታ፥ ሄፌሬኔ ኢዛ ዜሬꬅ። 33 ሄፌሬ ና ጺሎፋዴይ ማጫ ናይታ ጻላ ዬሊዴስ፤ ሄይቲካ ማሂሎ፥ ኖኦ፥ ሆጊሎ፥ ሚልኮኔ ቲርጾ ጌቴቴቴስ። 34 ሚናሴ ቆሞታፔ ቆዴቲዳይቲ 52,700 ኣዴታ።

35 ኤፍሬሜ ዛርኬፌ ዬሌቲዳይቲ፥ ሹቱላኔ ኢዛ ዜሬꬃታ፥ ቤኬሬኔ ኢዛ ዜሬꬃታ፥ ታሃኔኔ ኢዛ ዜሬꬃታ፥ 36 ሹቱላ ና ኤራኔኔ ኢዛ ዜሬꬃታ። 37 ኤፍሬሜ ዛርኬታፔ ቆዴቲዳይቲ 32,500 ኣዴታ፤ ዮሴፌ ዛርኬፌ ባ ባጋን ባጋን ቆዴቲዳይቲ ሃይታንታ።

38 ቢኒያሜ ዛርኬፌ ዬሌቲዳይቲ፥ ቤላኔ ኢዛ ዜሬꬃታ፥ ኣሺቤሌኔ ኢዛ ዜሬꬃታ፥ ኣሂራሜኔ ኢዛ ዜሬꬃታ፥ 39 ሻፋሜኔ ኢዛ ዜሬꬃታ፥ ሁፉሜኔ ኢዛ ዜሬꬃታ፥ 40 ቤላ ዛርኬፌ ኣራዴኔ ኢዛ ዜሬꬃታ፤ ናኢማኔኔ ኢዛ ዜሬꬃታ፥ 41 ቢኒያሜ ዛርኬፌ ቆዴቲዳይቲ 45,600 ኣዴታ።

42 ዳኔ ዛርኬታፔ ዬሌቲዳይቲ፥ ሹሃሜኔ ኢዛ ዜሬꬃታ፥ 43 ሹሃሜ ዜሬꬃታ ቆዳይ 64,400 ኣዴታ።

44 ኣሴሬ ዛርኬታፔ ዬሌቲዳይቲ ዪሚኔኔ ኢዛ ዜሬꬃታ፥ ዪሺዌኔ ኢዛ ዜሬꬃታ፥ ባሪሄኔ ኢዛ ዜሬꬃታ፥ 45 ባሪሄ ናይታፔ ሄቤሬኔ ኢዛ ዜሬꬃታ፥ ማልኪኤሌኔ ኢዛ ዜሬꬃታ፥ 46 ኣሴሬስ ሴራሆ ጌቴቲዛ ማጫ ናይ ዳዉስ። 47 ኣሴሬ ዛርኬታፔ ቆዴቲዳይቲ 53,400 ኣዴታ።

48 ኒፍታሌሜ ዛርኬፌ ዬሌቲዳይቲ፥ ያሂጼሌኔ ኢዛ ዜሬꬃታ፥ ጉኔኔ ኢዛ ዜሬꬃታ፥ 49 ዬጺሬኔ ኢዛ ዜሬꬃታ፥ ሼሌሜኔ ኢዛ ዜሬꬃታ፥ 50 ኒፍታሌሜ ዛርኬታፔ ቆዴቲዳይቲ፥ 45,400 ኣዴታ።

51 ኩሜꬅ ቆዴቲዳ ኢስራኤሌ ኣቱማሳይ 601,730 ጊዲዴስ።

52 ጎዳይ ሙሴስ ሂዝጊዴስ፥ 53 «ቢታዮ ኢስታ ሱንꬃ ሱንꬃ ቆዳ ማላ ዛርኬታስ ጺንጾ ጊዳና ማላ ሻካ ሻካዳ ኢማ። 54 ቆዳን ዳሪዛ ዛርኬታስ ኣሳ ኢማ፤ ቆዳን ጉጺዛይታስ ጹንꬃ ኢማ፤ ቢታ ጊሾይ ኣሳ ቆዳ ጮራቴꬃ ማላ ጊዶ። 55 ጊዲኮካ ጊሾዚ ሳማን ጊዶ፤ ሳማዚካ ዬጌታናይ ኢዛዴ ዛርኬን ዛርኬና። 56 ሳማዚ ዬጌታናይ ቆዳን ዳሮ ዜሬꬃታ ጊዶኒኔ ቆዳን ጉꬃ ዜሬꬃታ ጊዶን ጊዶ።»ታይ 34፡13

57 ሌዌ ዛርኬፌ ዬሌቲዳይቲ ጌርሾኔኔ ኢዛ ዜሬꬃታ፥ ቃኣቴኔ ኢዛ ዜሬꬃታ፥ ሜራሬኔ ኢዛ ዜሬꬃታ፥ 58 ቃሴካ ሊቢና ዜሬꬃታ፥ ኬብሮኔ ዜሬꬃታ፥ ማሂሌ ዜሬꬃታ፥ ሙሼ ዜሬꬃታ፥ ቆሬ ዜሬꬃታ፥ ቃኣቴይ ኣሚራሜ ማኤ። 59 ኣሚራሜይ ጊብጼን ዬሌቲዳ ሌዌ ናዮ ዮካቤዶ ማቾ ኤኪዴስ፤ ኢዛካ ኣሮኔኔ ሙሴ ጌቴቲዛ ናምኡ ኣቱማ ናይታኔ ማራሞ ጌቴቲዛ ኢሲ ማጫ ና ዬላዱስ። 60 ኣሮኔስ ናዳቤ፥ ኣቢሁ፥ ኤልኤዜሬኔ ኢታማሬ ጌቴቲዛ ኦይዱ ኣቱማ ናይቲ ዴቴስ። ታይ 3፡2 61 ናዳቤይኔ ኣቢሁይ ጾሳ ሲንꬃን ቤሶንታ ታማ ሺሺዳ ጊሻስ ቦሻን ሃይቂዳ። ሌዌ 10፡1-2 62 ኢስታስ ላይꬃይ ኢሲ ኣጊናኔ ኢዛፔ ቦላራ ጊዲዳ ሌዌ ዛርኬፌ ኣዴታ ቆዳይ 23,000 ጊዲዴስ፤ ሄይቲካ ሃንኮ ኢስራኤሌ ኣሳፔ ዱማ ማዝጋባን ጻፌቲ ኡቲዳ፤ ጋሶይካ ኢስታስ ኢስራኤሌ ዴሬን ጺንጾስ ጊዲዛ ኣይኮ ጋዴይ ኢሜቶንታይሳሳ።

63 ሙሴይኔ ኤልኤዜሬይ ኢያርኮ ጊናራ ዮርዳኖሴ ሻፋ ማታን ዲዛ ሞኣቤ ዴምባን ኢስራኤሌ ኣሳ ቆዲዳ ዎዴ ኢስቲ ጻፊ ኦይኪዳ ኢስራኤሌ ኣሳ ቆዳይ ሃይሳፌ ቦላን ዲዛይታ። 64 ሙሴይኔ ኣሮኔይ ኮይሮ ሲና ባዞን ዴራ ቆዲዳ ዎዴ ቆዴቲዳ ኣቱማሳፔ ሼምፖራ ፓጻ ኣቲዳይ ባዋ። 65 ሄሲ ሄሳꬆ ሃኒዳይ ጎዳይ ካሴ ኢስታስ፥ «ኢስቲ ዉሪካ ባዞ ቢታን ሃይቃና!» ጊዳ ጊሻሳ፤ ጊዶ ኣቲን ዮፊኔ ና ካሌቤይኔ ናዌ ና ኢያሶይ ኣታፌ ኡባይካ ሃይቂዳ። ታይ 14፡26-35