1 ኢያርኮ ጊናራ ዮርዳኖሴ ሻፋፔ ሄ ፒንꬃን ዲዛ ሞኣቤ ዴምባ ቦላ ጎዳይ ሙሴስ ሂዝጊዴስ፥ 2 «ኢስራኤሌ ኣሳይ ባ ጊሻፔ ጊሻፔ ሌዌ ዛርኬቲ ዳና ካታማታኔ ሄ ካታማታ ዩሾን ኢስቲ ባ ሜሄ ኢዛን ሄማና ጋዴ ኢማና ማላ ዮታ። 3 ሄ ካታማቲካ ሌዌ ዛርኬታስ ዱሳሶ ጊዳና ጊዴስ፤ ሜሄ ሄሚዛሶሆቲ ኢስታ ሜሄይ ፔኢዛሶ ጊዳና። 4 ካታማታ ዩሾን ኢንቴ ሌዌ ዛርኬታስ ኢማና ሜሄ ሄንꬃ ጋዴዛ ኣኮቴꬃይ ካታማ ጊምቤዛፔ ዶሚዲ ኦይዱ ባጋራካ 1,000 ዋꬋ ዋꬋ ጊዶ። 5 ሄሳ ማላን ካታማዛ ጊዶ ኣꬂዲ ኦይዱ ባጋራካ ጉላፔ ቢዲ ጉላ ጋካናስ 2,000 ዋꬋ ጊዶ፤ ሄሳ ሌዌ ቆሞቲ ባስ ሜሄ ሄንꬃሶሆ ሂስቴቶ። *ጉላ ጌቴቲዛይሲ ኢሲ ኢሲ ባጋ ጋሞꬆ ቃላን ዞዜ ዎይኮ ዴንቄሼ ጌቴቴስ።

6 «ሌዌ ቆሞታስ ኢንቴ ኢሚዛ ካታማታፔ ኡሱፑናቲ ኣስ ዎꬊዳ ኣሲ ባቃቲ ኣቲዛ ካታማታ ጊዴቶ፤ ሄይታፔ ሃራ 42 ካታማታ ጉጂ ኢሚቴ። 7 ኢስቲ ሜሄ ሄሚዛሶሆታራ ጉጂን 48 ካታማቲ ኢሜቴቶ። 8 ኢስራኤሌ ዛርኬቲ ላቲዳ ጋዴፔ ኢስታ ጋዴ ጋዴ ዳልጋቴꬃ ማላ ዳልጋ ጋዴ ኦይኪዳይታፔ ዳልጋ፥ ጹንꬃ ጋዴ ኦይኪዳይታፔ ጹንꬅ ኤኪዲ ሌዌ ዛርኬታስ ኢሚቴ።»ኢያ 21፡1-42

9 ጎዳይ ሙሴስ ሂዝጊ ዮቲዴስ፥ 10 «ኔኒ ኢስራኤሌ ኣሳስ፥ ‹ኢንቴ ካናኔ ዴሬ ጌላናስ ዮርዳኖሴ ሻፋ ፒኒዛ ዎዴ፥ 11 ኢሲ ኣሲ ኤሮንታ ዲሼ ኣስ ዎꬊኮ ሄሳዴይ ባቃቲ ቢዲ ኣታና ካታማታ ኔ ዶራ። 12 ሄ ካታማቲ ሼምፖ ዎꬊዳዴይ ፒርዳስ ሺቆንታ ዲሺን ሃይቂዳዴ ዳቦይ ኢዛ ዎꬎንታ ማላ ኢዚ ባቃቲ ኣቲዛ ካታማታ ጊዴቶ። 13 ሃይቲ ኢንቴ ሌዌታስ ኢሚዳ ኡሱፑን ካታማቲ ኤሮንታ ሼምፖ ዎꬊዳ ኣሲ ባቃቲ ኣቲዛ ካታማታ ጊዳና። 14 ሄ ካታማታፔ ሄꬓቲ ዮርዳኖሴ ሻፋፔ ሄ ፒንꬃን ኣርሼይ ሞኪዛ ባጋራ ሃንኮ ሄꬓቲ ቃሴ ካናኔ ቢታን ጊዴቶ። 15 ሃ ኡሱፑን ካታማቲ ኤሮንታ ዲሼ ኣስ ዎꬊዳ ኢስራኤሌ ኣሲ፥ ኢማꬃቲኔ ኢንቴ ጊዶን ዲዛ ሃራ ዴሬ ኣሳቲ ባቃቲ ኣቲዛሶ ጊዴቶ።

16 « ‹ኢሲ ኣሲ ቢራታፔ ኦሴቲዳዛን ኣስ ዎꬊዳ ጊዲኮ ሄ ሼምፖ ዎꬊዳዴይ ኢዚካ ኣሳ ኩሼን ሃይቆ። 17 ኢሲ ኣሲ ሹቻን ጫዲዲ ኣስ ዎꬊዳ ጊዲኮ ሄ ሼምፖ ዎꬊዳዴይ ኢዚካ ኣሳ ኩሼን ሃይቆ። 18 ኢሲ ኣሲ ሚꬃን ጫዲ ኣስ ዎꬊዳ ጊዲኮ ሄ ሼምፖ ዎꬊዳዴይካ ኣሳ ኩሼን ሃይቆ። 19 ሄ ሃይቂዳይሳስ ማታ ዳቦይ ሱꬅ ኣዛራናስ ዳንዳይዛ ጊሻስ ኣዋንካ ዴሚኮ ዎꬋናስ ዳንዳዬስ።

20 « ‹ኢሲ ኣሲ ኦዲዲ ኣስ ሱጊ ዬጊ ዎꬊኮ ዎይኮ ጌማሶን ኡቲዲ ኢሲ ሚሻን ጫዲ፥ †ኦዲዲ፡ ኦዲዲ ጊዛይሳ ኢሲ ኢሲ ባጋ ጋሞꬆን ኤሪዲ ዎይኮ ኤሪሼ ጌቴቴስ። 21 ዎꬊኮ ሞርኬቴꬃን ዴንዲዲ ኢጪ ዎꬊኮ ኢዚ ሼምፖ ዎꬊዳ ጊሻስ ኢዚካ ኣሳ ኩሼን ሃይቃናስ ቤሴስ፤ ሄ ሃይቂዳይሳስ ማታ ዳቦይ ሱꬅ ኣጫናስ ዳንዳይዛ ጊሻስ ኣዋንካ ዴሚኮ ዎꬋናስ ዳንዳዬስ።

22 « ‹ጊዶ ኣቲን ኢሲ ኣሲ ኤሮንታ ዲሼ ኣስ ሱጊ ዎꬊኮ ዎይኮ ቆፖንታ ዲሼ ኢሲ ሚሻን ጫዲ ዎꬊኮ፥ 23 ዎይኮ ኤሮንታ ዲሼ ሹች ኢዛ ቦላ ዬጊ ዎꬊዛ ጊዲኮ ሄሳዴይ ኢዛ ቆሃናስ ኦዲ ኦꬆንታ ጊሻስ፥ 24 ዴሬዚ ሄ ዎꬊዳይሳ ጊዶኒኔ ሃይቂዳይሳ ዳቦታ ጊዶን ኢሜታና ፒርዳይ ሃይሳፌ ካሊዛይሳ ጊዶ። 25 ኤሮንታ ዲሼ ኣስ ዎꬊዳዴይ ሱꬅ ኣጪዛ ኣሳ ኩሼፔ ዴሬዚ ኣሺዲ ኢዚ ባቃቲ ኣቲዳ ካታማ ዛሮ፤ ዛይቴን ቲዬቲዳ ቄሴታ ሃላቃይ ሃይቃና ጋካናስ ኢዚ ሄን ጋምኦ።

26 « ‹ኣስ ዎꬊዲ ካሳሴቲዳይሲ ባቃቲ ኣቲዛ ካታማፔ ካሬ ኬዚዛ ጊዲኮ፥ 27 ሱꬃ ኣጪዛዴይ ዴሚዲ ኢዛ ዎꬊኮ ሱꬃ ኣጮን ኦይሼቴና። 28 ኣስ ዎꬊዲ ካሳሴቲዳይሲ ቄሴታ ሃላቃይ ሃይቃና ጋካናስ ባቃቲ ኣቲዛ ካታማን ጋምኦ፤ ቄሴታ ሃላቃዚ ሃይቂዳፔ ጉዬ ኢዚ ባሶ ሲማና ዳንዳዬስ።

29 « ‹ሃይሲ ሃ ዎጋዚ ኢንቴ ዲዛ ዴሬ ኡባን ኢንቴሲኔ ኢንቴ ዜሬꬃታስ ኤቂ ዲዛ ዎጋ ጊዶ።

30 « ‹ሼምፖ ዎꬊዳ ኣይ ኣሲካ ሃይቆ ፒርዳ ፒርዴታናስ ዳንዳይዛይ ኢዛ ቦላ ናምኡ ማርካይ ዎይኮ ኢዛፔ ቦላራ ማርካቲኮ ኣቲን ኢሲ ማርካን ጻላ ሃይቆ ቂጻቴ ኤኬና። ዛሬ 17፡6፤ 19፡15፤ ታይ 27፡7 31 ሼምፖ ዎꬊን ሃይቆ ፒርዳይ ኢዛ ቦላ ፒርዴቲዳ ኣሲ ሃይቃና ቤሴስ ኣቲን ባ ዎꬊዳ ሼምፖ ጊሻስ ሚሼ ቃንጺ ኣታናስ ዳንዳዬና። 32 ኢዛን ባቃቲ ኣቲዛ ካታማ ባቃቲዳ ኦናፔካ ቄሴታ ሃላቃይ ሃይቃናፔ ካሴ ኢዚ ጉዬ ሲሚዲ ባ ቢታን ዴኣና ማላ ጊዲ ሱꬃ ቃንጾ ኤኮፍቴ። 33 ኢንቴ ሄሳꬆ ኦꬂዛ ጊዲኮ ኢንቴ ቢታ ቱኒሴታ፤ ጋሶይካ ኣሳ ሱꬅ ጉሲዛይሲ ቢታ ቱኒሴስ፤ ሄ ቢታይ ጌያናይ ኣሳ ሱꬅ ጉሲዳዴ ሱꬃይ ጉኪን ኣቲን ሃራን ጌዬና። 34 ታኒ ኢንቴ ጎዳ ጊዲዳ ጊሻሲኔ ኢንቴናራ ኢስራኤሌ ዴሬዛ ጊዶን ዲዛ ጊሻስ ታኒ ኢዛን ዲዛ ቢታ ቱኒሶፒቴ› ጋ ዮታ።»