ባ ኬꬅ ኬጻዉስ፤

ኤያያ ጊዲኮ ባ ኬꬅ

ባ ኩሼን ላላዉስ።

ጎዳስ ያዬስ፤

ጌላ ኦጌ ሄሜቲዛይ ጊዲኮ

ኢዛ ካꬌስ።

ጋቱማ ኤሄስ፤

ኣꬎ ኤራንቻታ

ኢንጻርሳይ ጊዲኮ

ኢስታ ናጌስ።

ጎታራይ ሜላ ዴስ፤

ጊዶ ኣቲን ኔስ ቦራታ ዎልቃን

ዳሮ ካꬂ ቤቴስ።

ቱማ ማርካቴስ፤

ዎርዶ ማርካይ ጊዲኮ

ዎርዶ ማርካቴስ።

ኮይኮካ ዴሜና፤

ኣኬካይ ዲዛ ኣሲ ዋዬቶንታ

ኤራቴꬅ ዴሜስ።

ኣይስ ጊኮ ኔኒ ኢዛ ሃሳያፔ

ኤራቴꬅ ዴማካ።

ኣꬎ ኤራቴꬂ

ባ ኦጌ ናጎ፤

ኤያታ ኤያቴꬂ ጊዲኮ

ኢስታ ጪሜስ።

ሞꬌታናይሳ ኣጊዲ

ቂልጬቴስ፤

ሱሬ ኣሳታፔ ጊዲኮ

ሎኦ ቆፋይ ቤቴስ።

ባ ዎዚናን ዲዛ

ጬጬ ኤሬስ፤

ኢዛ ኡፋይሳ ኦኒካ ኢዛራ ኮጼና።

ሱሬታ ኬꬃይ ጊዲኮ

ሚኒ ዴኣና።

ዉርሴꬃን ጊዲኮ

ሃይቆስ ጋꬄስ።ሌሚ 16፡25

ሜቂ ኤሬስ፤

ሙዞቴꬃን ኡፋይሲ

ፖሌታና ዳንዳዬስ።

ባ ኦሶ ዋጋ ኤካና፤

ሎኦ ኣሲካ ባ ሎኦ ኦሶ

ዋጋ ኤካና።

ጪንጫይ ጊዲኮ

ኣኬኪዲ ታንጌስ።

ጎዳስ ያዬሲኔ

ሳቲ ታንጌስ፤

ኢታፔካ ሃኬስ፤

ኤያይ ጊዲኮ

ዉዳይ ባይንዳ ቢቻሬስ።

ኤያ ኦሶ ኦꬄስ፤

ዮኦ ቃቺዛ ኣሲ ዶሴቴና።

ኣኬካንቻቲ ጊዲኮ

ኤራቴꬅ ካላቻ ማላ ጎጻና።

ናጋራንቻቲ

ጺሎታ ፔንጌን ሆካና።

ዱሬታስ ጊዲኮ

ዳሮ ላጌቲ ዴቴስ።

ናጋራ ኦꬄስ፤

ጊዶ ኣቲን ማንቆ ማዲዛይ

ኣንጄቲዳይሳ።

ሱሬ ኦጌፔ

ካሬ ኬዜቴስ ዴቴኔ?

ሎኦ ቆፒዛይቲ ጊዲኮ

ሲቆኔ ኣማኔቴꬅ ኤሄቴስ።

ሃዳ ዮኦይ ጊዲኮ ማንቂሴስ።

ኢስታ ዱሬቴꬂ ኢስታስ ካላቻ፤

ኤያታ ኤያቴꬂ ጊዲኮ

ጮ ሃዳ።

ዎርዶ ማርካይ ጊዲኮ ባሌꬄስ።

ሚኖ ሚጻይ ዴስ፤

ኢዛ ናይታስካ

ባቃቲ ኣቲዛ ሶሆይ ዴስ።

ሃይቆ ዎጺማዴፔ ኣስ ኣሼስ።

ዴሬ ጉꬃቴꬂ

ካዎስ ባሽ ጊዴስ።

ጊታ ኣኬካይ ዴስ፤

ኤሌ ሃንቄቲዛ ኣሲ ጊዲኮ

ባ ኤያቴꬅ ቆንጪሴስ።

ቦላስ ፓያቴꬅ ኢሜስ፤

ቃናቴይ ጊዲኮ

ሜቄꬃ ጊዶን ጌሊዳ

ዎይዛዚሬ ማላ።

ኢስታ ሜꬊዳይሳ ጫዬስ፤

ሜቶታንቻታስ

ቃꬌቲዛ ጊዲኮ

ጾሳ ቦንቼስ።

ጊዶ ኣቲን ጺሎቲ

ሃይቆ ዎዴካ

ባቃቲ ኣቲዛሶይ ዴስ።

ኣꬎ ኤራቴꬂ ኩሚዴስ፤

ጊዶ ኣቲን ኤያቲ

ኣꬎ ኤራቴꬃ ጊሻስ

ኣይኮካ ኤሬቴና።

ꬎቁ ꬎቁ ኦꬄስ፤

ጊዶ ኣቲን ናጋራይ

ኣይ ኣሲካ ካዉሼስ።

ካዎ ኡፋይሴስ፤

ጊዶ ኣቲን ዬላቺዛ ኣይሌይ

ባ ቦላ ሃንቆ ኤሄስ።