16
1 ኣሲ ባ ዎዚናን ሃልቼስ፤
ጊዶ ኣቲን ዛሮይ
ጎዳፔ ቤቴስ።
2 ኣሲ ቢዛ ኦጌ ኡባይ
ኢዛስ ሎኦ ሚሳቴስ፤
ጎዳይ ኮይሮ ዴንꬃ ቆፋ
ጫዲ ጼሌስ።
3 ኔ ኦꬂዛ ኡባ ሃዳራ
ጎዳስ ኢማ፤
ሂስቲኮ ኔ ሃልቾይ ፖሌታና።
4 ጎዳይ ኡባ ሚሽ
ሜꬊዳ ጋሶይካ ዴስ፤
ማካላንቻታ ጊዲኮካ
ባሻ ጋላሳስ
ጊግሲ ዎꬂዴስ።
5 ጎዳይ ኦቶሬቲዛ
ኡባ ሻቴቴስ፤
ኢስቲ ቃጻዬቶንታ ኣቴቴና።
6 ሲቆኒኔ ኣማኔቴꬃን
ናጋራይ ኣቶ ጌቴቴስ፤
ጎዳስ ያሻቴꬃን
ኣሲ ኢታፔ ሃኬስ።
7 ኣሳ ሄሜታይ
ጎዳ ኡፋይሲዛዝ ጊዲኮ
ኢዛ ሞርኬቲ
ኢዛራ ሳሮ ዳና ማላ ኦꬄስ።
8 ጺሎቴꬃን ቤቲዛ
ጉꬃ ሚሺ
ዎርዶራ ዴሚዛ
ዳሮ ዎꬌፔ ኣꬌስ።
9 ኣሲ ባ ዎዚናን
ባ ኦꬃና ሚሽ ሃልቼስ፤
ሃልቾዚ ጎዳይ ጊኮ
ፖሌቴስ።
10 ካዎ ሜቴርሻቲ
ጾሳፌ ኤኪዳ ማታን
ሃሳዬቴስ፤
ኢዛ ኢንጻርሲ
ፒርዳ ጌላሳናስ ቤሴና።
11 ሱሬ ጌዳራቲኔ
ማካ ሚሻቲ ጎዳፔ፤
ካራጺቴ ጊዶን ዲዛ ጌዳራቲ
ኡባይ ኢዛ ኦሶታ።
12 ካዎቲ ኢታ ኦሶ ሃራሴቴቴስ፤
ኣይስ ጊኮ ካዎቴꬃ ኣራታይ
ጺሎቴꬃን ኤቄስ።
13 ጺሎ ሃሳያን ካዎቲ ኡፋዬቴቴስ፤
ቱማ ሃሳይዛይታካ ዶሴቴስ።
14 ካዎ ሃንቆይ
ሃይቆ ኪታንቻ ማላ፤
ኣꬎ ኤራንቻይ ጊዲኮ
ሃንቆ ኢርጺሴስ።
15 ካዎይ ፓሽኪ ጊሺን ዴኦይ ዴስ፤
ኢዛስ ኪያቴꬂ
ኢራ ቶኪዳ ባꬌሳ
ሻራ ማላ።
16 ኣꬎ ኤራቴꬃ ዴሞይ
ዎርቃ ዴሚዛይሳፌ ኣꬌስ፤
ኣኬካ ዴሞይ
ቢራ ዴሞፔካ ኣꬌስ።
17 ሱሬታ ኦጌይ ኢታታፔ ሃኮን ዴስ፤
ባ ሄሜታ ናጊዛ ኣሲ
ባ ሼምፖ ናጌስ።
18 ኦቶሮ ጌዶ ባሺ ካሌስ፤
ሃላጫ ጌዶካ
ኩንዴꬂ ካሌስ።
19 ኦቶራንቻታራ ዙፔቲዲ
ዲኢ ኤሂዳ ሚሽ
ሻኬቲ ኤካናፔ
ማንቆታራ ማንቄቴꬃን
ዱሲ ኪያ።
20 ዞሬ ኤኪዛ ኣሲ ዱሬቴስ፤
ጎዳን ኣማኔቲዛ ኣሲ
ኣንጄቲዳዴ።
21 ዎዚናን ኣꬎ ኤራንቻ ጊዲዳ
ኣሳቲ ኣኬካንቻ
ጌቴቴቴስ፤
ሎኦ ቃላይ ኤራቴꬅ ጉጄስ።
22 ባስ ሚሽ ኦꬂዳዴስ
ኣኬካይ ዴኦ ፑልቶ፤
ዶጋታስ ጊዲኮ
ኤያቴꬂ ሃንቆ ኤሄስ።
23 ኣꬎ ኤራንቻ ዎዚናይ
ኢዛ ዶና ካሌꬄስ፤
ኢዛ ሜቴርሻቲካ
ኤራቴꬅ ጉጂ ጉጂ ቤቴስ።
24 ሎኦ ቃላይ
ኤሳ ኢሊሎ ማላ ማልኤስ፤
ቦላካ ማዴሲኔ
ፓꬄስ።
25 ኣሳስ ሱሬ ሚሳቲዛ ኦጌይ ዴስ፤
ጊዶ ኣቲን ዉርሴꬃን
ሃይቆስ ጋꬄስ።ሌሚ 14፡12
26 ካꬃ ኮሺ
ኣሲ ሚኒ ኦꬃና ማላ ዴንꬄꬄስ፤
ጋፋይካ ኦሶስ
ሚንꬄꬄስ።
27 ኢታ ኣሲ ኢታቴꬅ ቆፔስ፤
ኢዛ ሃሳያይካ ጹጊዛ ታማ ማላ።
28 ጌላ ኣሲ ኦሽ ዴንꬄስ፤
ዚጊርሲ ኣማኔቲዛ
ላጌታ ሻኬስ።
29 ጌኔ ኣሲ ባ ሾሮዛ ጪሜስ፤
ሎኦ ጊዶንታ ኦጌ
ኢዛ ካሌꬄስ።
30 ኣይፌራ ቂምኦቲ ቤሲዛ ኣሲ
ጌላቴꬅ ቆፔስ፤
ባ ሜቴርሻ ሳጺዛ ኣሲ
ኢታሶ ቤስ።
31 ፑሉንꬂ ቦንቾ ካላቻ፤
ሄሲ ጺሎቴꬃ
ዱሳን ቤቴስ።
32 ዎልቃማ ኣስ ጊዳናፔ
ዳንዳያ ኣስ ጊዴꬅ ሎኦ፤
ባና ሃሪዛዴይ ካታማ ዎልቃን
ሃሪዛዴፌ ኣꬌስ።
33 ኣሲ ሳማ ዬጌስ፤
ጊዶ ኣቲን ዉርሴꬃ ፖሎ
ኢሚዛይ ጎዳ።