36
ጎዳ ኦሳንቻ ዳዊቲ ዛማሬታ ካቦስ ዬጺዳ ማዛሙሬ
1 ኢታ ኣሲ ባ ዎዚናን
ጌኔ ቆፔስ፤
ኢዛ ጊዶን ጾሳስ
ያሻቴꬂ ዴና። ኦሮ 3፡18
2 ኢዛ ናጋራይ ቆንጪን ኢጾንታ ማላ
ኢዚ ባርካ ባና ባሌꬄስ
3 ኢዛ ዶናፔ ኬኢዛ ሃሳያይ
ጌኔኔ ዎርዶ፤
ኣꬎ ኤራቴꬂኔ ሎኦ ኦሶ
ሙሌካ ኣጊዴስ።
4 ኢዚ ባ ሂጻን ዲሼ
ጌኔ ቆፒሼ ኣቄስ፤
ባና ሎኦ ጊዶንታ
ኦጌ ካሌꬄስ፤
ኢታ ኢዚ ኢጼና።
5 ኣቤት ጎዳዉ!
ኔ ሜርና ሲቆይ ሳሎ ጋኬስ፤
ኔ ቱማቴꬃይካ
ቦላ ሻራ ማላ ꬎቄስ።
6 ኣቤት ጎዳዉ!
ኔ ጺሎቴꬃይ
ኡባፌ ꬎቃ ዙማታ ማላ፤
ኔ ፒርዳይካ ኡባፌ
ዚቃ ጪማ ማላ፤
ኔኒ ኣሳካ ዶኣካ
ኢታፔ ናጋሳ።
7 ኣቤት ጾሳዉ!
ኔ ሜርና ሲቆይ
ኣይ ኬና ኣልኦ!
ኣሳይ ኔ ቄፌ ጊዶን
ጌሚ ኣቴስ።
8 ኢስቲ ኔሶን ኩሚዳ ማዳፌ
ሚዲ ካሌቴስ፤
ኔኒ ኔ ኣንጆ ሻፋፔ
ኢስታ ኡሻሳ።
9 ኣይስ ጊኮ ዴኦ ፑልቶይ
ኔ ኣቻን ዴስ፤
ኔ ፖኦን ኑኒ ፖኦ ቤኦስ።
10 ኔና ኤሪዛይታስ
ኔ ሜርና ሲቆዛ ኣጎፋ፤
ሱሬታስ ኔ ኪያቴꬅ ዲጎፋ።
11 ኦቶራንቻታ ቶሆይ
ታና ዬꬎፎ፤
ናጋራንቻታ ኩሼይ
ታና ዬዴꬆፎ።
12 ኢታ ኣሳቲ ኩንዲዳይሳ ቤኢቴ፤
ኢስቲ ኩንዲዳ፤
ዴንዳናዉካ ዳንዳዬቴና።