ዮሃኒሳ ኣጁታ
ጊዶ ቆፋ
ዮሃኒሳ ኣጁታይ ጻፌቲዳይ ኣማኒዛይቲ ዬሱስ ኪርስቶሲ ኢስታስ ጎዳ ጊዲዳይሳ ኤሪዲ ኣማኒዳ ጊሻስ ጎዴቴꬂኔ ዋዬይ ኢስታ ቦላ ጋኪዳ ዎዴና። ጻፌዚ ማጻፋዛ ናባቢዛይቲ ባ ሂዶታ ቃንጾንታ ማላ ኢስታ ሚንꬄꬃናሲኔ ባና ጋኪዳ ጎዴቴꬃኒኔ ሜቶ ጋርሳን ኢስቲ ባ ኣማኖን ሚኒ ኤቃና ማላ ሚንꬄꬃናሳ።
ሃ ማጻፋን ዳሪዛ ባጋይ ዳሮ ዱማ ዱማ ኦይኬቲ ዲዛ ኣጁታታ ኢሲ ቦላ ጋꬂ ኦይኪዴስ፤ ኣጁታቲካ ሄ ዎዴ ዲዛ ኣማኒዛ ኣሳይ ኤራናስ ዳንዳይዛዝ ጊዲሺን ሃንኮ ኣሳስ ቃሴ ጌሎንታ ጹራ ጊዲዲ ሺቂዳ ሌሚሶ ማላን ሺቂዳ ዮኦኮ። ሺሪ ሺሪ ዬጺዛ ማላ ማጻፋዛስ ዋና ቆፋቲ ዱማ ዱማ ኣጁታታ ባጋራ ዱማ ዱማ ሜꬋን ዛሬቲ ዛሬቲ ሺቂዳ። ሃ ማጻፋዛ ቢርሼꬂ ዱማ ዱማ ጊዲኮካ ኢዛስ ኣይፌ ቆፋይ ቃሴ ቆንጬ። ሄሲካ ጾሲ ጎዳ ዬሱሳ ባጋራ ናምኣንꬆይ ባይንዳ ኦጌራ ጻላኤራ ኢዛ ሞርኬታ ዉርሲ ጾናና፤ ሄ ጾኖዚካ ዉሪዳፔ ጉዬ ባስ ኣማኔቲዳ ባ ላጌታስ ኢዚ ኦራꬃ ሳሎኔ ኦራꬃ ቢታ ኣንጆ ላቲሳና ጊዛይሳ።
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1-8
ኮይሮ ቤቲዳ ኣጁታ 1፡9-20
ላፑን ዎሳ ኬꬃታስ ዬዴቲዳ ኪታታ 2፡1—3፡22
ማጻፋዛኔ ላፑን ማታሜታ 4፡1—8፡1
ላፑን ጹሩምባታ 8፡2—11፡19
ዳዌዛኔ ናምኡ ዶኣታ 12፡1—13፡18
ዱማ ዱማ ኣጁታታ 14፡1—15፡8
ጾሳ ሃንቆ ጹኣ ላፑናታ 16፡1-21
ባቢሎኔ ኩንዴꬅ፥ ዶኣዛ፥ ዎርዶ ናቤታኔ ዳቡሎሳ ጾኔቴꬅ 17፡1—20፡10
ዉርሴꬃ ፒርዳ 20፡11-15
ኦራꬃ ሳሎ፥ ኦራꬃ ቢታኔ ኦራꬃ ዬሩሳላሜ 21፡1—22፡5
ኩሻ ቆፋ 22፡6-21
1
1 ሃይሲ ኣጁታዚ ማታ ዎዴ ቢታ ቦላ ሃናናይሳ ባስ ኦꬂዛይታ ቤሳና ማላ ጾሲ ዬሱስ ኪርስቶሳስ ኢሚዳይሳ። ዬሱስ ኪርስቶሲካ ባ ኪታንቻ ኪቲዲ ባ ኦሳንቻዛ ዮሃኒሳስ ሃይሳ ኣጁታዛ ቆንጪሲዴስ። 2 ዮሃኒሲካ ጾሳ ቃላ ጊሻሲኔ ዬሱስ ኪርስቶሲ ታማርሲዳ ቱማ ጊሻስ ቃሴካ ኢዚ ባ ኣይፌን ቤኢዳይሳካ ኡባ ማርካቲዴስ። 3 ሃይሲ ዉሪካ ሃናናይ ማታ ዎዴን ጊዲዳ ጊሻስ ሃይሳ ቲንቢቴ ቃላ ናባቢዛ ኣሲ ኣንጄቲዳዴ። ሄሳꬆካ ቲንቢቴ ቃላ ሲዪዛይቲኔ ሃ ቲንቢቴ ቃላ ጻፌቲዳይሳ ፖሊ ኦꬂዛይቲ ኢስቲ ኣንጄቲዳይታ።
ኢሲያን ዲዛ ላፑን ዎሳ ኬꬃታስ ኪቴቲዳ ሳሮካ
4-5 ኢሲያን ዲዛ ላፑን ዎሳ ኬꬃታስ ካሴካ ዲዛይሳፌ፥ ሃኢካ ዲዛይሳፌኔ ኬሳ 3፡14፤ ኣጁ 4፡5፤ ኢሳ 55፡4፤ ማዛ 89፡27 ቡሮካ ያና ጾሳፌ ኢዛ ኣልጋ ሲንꬃን ዲዛ ላፑን ኣያናታፔ ሄሳꬆካ ሃይቆፔ ዴንꬃን ባይራ ጊዲዳይሳፌ፥ ሃ ቢታ ካዎታስ ካዎኔ ኣማኔቲዳ ማርካ ጊዲዳይሳፌ፥ ኑና ሲቂዛይሳፌኔ ባ ሱꬃን ኑና ኑ ናጋራፔ ጌሺዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። 6 ኑኒ ዬሱስ ኪርስቶሳ ኣዋ ጾሳስ ኦꬃና ማላ ኑና ኢዚ ካዎታኔ ቄሴታ ኬሲዳ ዬሱስ ኪርስቶሳስ ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ! ኣሚን። ኬሳ 19፡6፤ ኣጁ 5፡10
7 ሄኮ ኢዚ ሳሎፔ ሻራራ ጊታ ቦንቾራ ያና፤ ካሴ ኢዛ ጫዲ ዎꬊዳይቲካ ኢሶይካ ኣቶንታ ዉሪ ኢዛ ቤያና፤ ቢታ ቦላ ዲዛ ዴሬይካ ዉሪ ኢዛ ጊሻስ ዬካና። ሃይሲ ሃ ዮኦዚ ቱሙኮ! ኣሚን። ዳኔ 7፡13፤ ማቶ 24፡30፤ ማር 13፡26፤ ሉቃ 21፡27፤ 1ታሶ 4፡17፤ ዛካ 12፡10፤ ዮሃ 19፡34፥37
8 ካሴካ፥ ሃኢካ ዲዛይሲ ቡሮፔካ ያናይሲ ኡባ ዳንዳይዛ ጎዳ ጾሲ፥ «ኣልፋይኔ ኦሜጋይ፥ ኮይሮይኔ ዉርሴꬂ ታና» ጌስ። ኬሳ 3፡14
ኣጁታን ኪርስቶሳ ቆንጬꬅ
9 ታኒ ዬሱሳ ዋዬዛ ኢዛ ካዎቴꬃ ቃሴካ ኢዛ ዳንዳያን ኢንቴናራ ኢሲፌ ጊዲዳ ታ ኢንቴ ኢሻይ ዮሃኒሲ ጾሳ ቃላኒኔ ዬሱሳስ ማርካቲዳ ጊሻስ ቃሼታዳ ፊጺሞ ጌቴቲዛ ኣባ ጊዶን ዲዛ ዴሬ ዳሪን ዳይስ። 10 ታኒ ጎዳ ጋላስ ጺሎ ኣያናን ꬊስኮ ማላ ጮ ሊጲጲ ጊሺን ዲንኬ ጊሪሳ ማላይ ጊታ ጊሪሲ ታፔ ጉዬራ፥ 11 «ኔኒ ቤኢዛይሳ ዋራቃታን ጻፋዳ ላፑን ዎሳ ኬꬃታስ ሄይቲካ ኤፌሶኔስ፥ ሳሜርኔሴስ፥ ጴርጋሞኔስ፥ ቲያጺሮኔስ፥ ሳርዴሴስ፥ ፊላዴልፊያሲኔ ሎዶቂያስ ዬዳ» ጊሺን ሲያዲስ።
12 ሄሳ ታስ ኦኒ ዮቲዳኮ ኤራና ጋዳ ታ ጉዬ ሲማ ጼሊዛ ዎዴ ጾምፔ ኢስታ ቦላ ዎꬂዛ ዎርቃፌ ኦሴቲዳ ላፑን ባላታ ቤያዲስ። 13 ሄ ኢስታ ቦላ ጾምፔ ዎꬂዛ ላፑን ባላታ ጊዶን ኣሳ ና ሚሳቲዛዴ ዴማዲስ። ኢዚካ ሂርኪ ቶሆ ቂርጴ ጋኪዛ ኣዱሳ ማይኦ ማይኢዴስ፤ ቲራ ቦላካ ዎርቃ ማይኦ ማይኢዴስ። ዳኔ 7፡13፤ 10፡5 14 ኢዛ ሁኤይኔ ኢዛ ሁኤ ቢናናይ ቃሴ ቦꬃ ሻች ሚሳቲዛ ቦꬃ ሱፌ ጌቴቲዛ ካꬃ ማላ፤ ኢዛ ኣይፌቲካ ታማ ላጮ ሚሳቴቴስ። ዳኔ 7፡9፤ 10፡6 15 ኢዛ ቶሆቲ ታማ ቦንቆን ቆጼቲ ኬዚዳ ጻርቂማላ ሚሳቴቴስ፤ ኢዛ ቃላይካ ዎልቃማ ፒሳ ሃꬃ ጊሪሳ ማላ ጊሬስ። ሂዚ 1፡24፤ 43፡2 16 ኢዚ ባ ኡሻቻ ኩሼን ላፑን ጾሊንቴታ ኦይኪ ኡቲዴስ፤ ኢዛ ዶናፔ ናምኡ ባጋራ ቃራ ማሻይ ኬዜስ፤ ኢዛ ኣይፌሶይ ኣርሼ ማላ ጾልቄቴስ።
17 ታኒ ሄሳ ቤያዳ ሃይቂዳ ኣስ ሚሳታዳ ኢዛ ቶሆ ጋርሳን ኩንዳዲስ፤ ኢዚ ቃሴ ታ ቦላ ባ ኡሻቻ ኩሼ ዎꬂዲ፥ «ኔ ባቦፋ! ኮይሮይኔ ዉርሴꬂ ታና። ኢሳ 44፡6፤ 48፡12፤ ኣጁ 2፡8፤ 22፡13 18 ታኒ ፓጻ ዳይስ። ካሴ ሃይቃዲስኮሺን ሄኮ ታኒ ሃይሳፌ ሜርናስ ፓጻ ዳና፤ ሃይቆ ቦላኔ ሲኦሌ ቦላ ታኒ ጎዳ። 19 ሄሳ ጊሻስ ኔኒ ቤኢዳይሳ ሃኢ ዲዛይሳኔ ጉዬፔ ሃናናይሳ ጻፋ። 20 ኔኒ ታ ኡሻቻ ኩሼን ቤኢዳ ላፑን ጾሊንቴታኔ ጾምፔ ኢስታ ቦላ ዎꬂዛ ዎርቃፌ ኦሴቲዳ ላፑን ባላታ ጹራይ ሄኮ ሃይሳ፤ ላፑን ጾሊንቴቲ ላፑን ዎሳ ኬꬃ ኪታንቻታ፤ ጾምፔ ኢስታ ቦላ ዎꬂዛ ላፑን ዎርቃ ባላቲ ላፑን ዎሳ ኬꬃታ» ጊዴስ።