1 ሄሳፌ ጉዬ ሄ ዶርሳይ ላፑን ማታሜታፔ ኮይሮ ማታሜዛ ዶይሺን ታ ቤያዲስ፤ ሄ ኦይዱ ዶኣታፔ ኢሶይ ዳዳ ጉጉንꬃ ማላ ቃላራ፥ «ሃ ያ!» ጊሺን ሲያዲስ። 2 ቃሴካ ቦꬃ ፓራ ቤያዲስ፤ ሄ ፓራዛ ቦላ ባ ኩሼን ዎንዳፌ ኦይኪዳዴይ ዴስ፤ ኢዛስ ኣኪሊሌይካ ኢሜቲዴስ፤ ኢዚካ ጾኒዛዴ ጊዲዲ ጾኒ ጾኒ ባናስ ኬዚዴስ። ዛካ 1፡7-8፤ 6፡3፥6

3 ሄ ዶርሳይ ናምኣንꬆ ማታሜዛ ዶይዳ ማላ ናምኣንꬆ ዶኣዚ፥ «ሃ ያ!» ጊሺን ታ ሲያዲስ። 4 ቃሴካ ሃራ ጼቃ ዞኦ ፓራይ ኬዚዴስ፤ ሄ ፓራ ቶጊዳዴይ ቢታ ቦላፌ ሳሮቴꬅ ꬋይሳና ማላኔ ኣሳይ ባ ጋርሳን ኢሶይ ኢሳ ዉርሳና ማላ ኦሲሳናስ ኢዛስ ጎዳቴꬂኔ ጊታ ማሻይ ኢሜቲዴስ። ዛካ 1፡7-8፤ 6፡2

5 ዶርሳዚ ሄꬓንꬆ ማታሜዛ ዶዪን ሄꬓንꬆ ዶኣዚ፥ «ሃ ያ!» ጊሺን ታ ሲያዲስ፤ ቃሴ ካሬꬃ ፓራ ቤያዲስ፤ ሄ ፓራ ቦላ ኡቲዳይሲ ባ ኩሼን ማካ ሚሽ ኦይኪዴስ። ዛካ 6፡2፥6 6 ኦይዱ ዶኣታ ጊዶፌ ዪዳ ሚሳቲዛ ቃላ ሲያዲስ፤ ሄ ጊሪሳይካ፥ «ባጋ ኪሎ ጊዲዛ ጊስቴ ኢሳዴስ ኢሲ ጋላሳ ዳሞዛ፥ ቃሴ ኢሲ ኪሎ ኩማናስ ሳይሶ ፓጬ ጊዲዛ ባንጋይ ኢሲ ጋላሳ ዳሞዛ ጊዶ፤ ጊዶ ኣቲን ዛይቴኔ ዎይኔ ሚꬅ ቆሆፓ» ጊሺን ታ ሲያዲስ።

7 ሄ ዶርሳይ ኦይዳንꬆ ማታሜዛ ዶዪን ኦይዳንꬆ ዶኣዛ ቃላይ፥ «ሃ ያ!» ጊሺን ታ ሲያዲስ። 8 ቃሴካ ጮሎሎ ፓራ ቤያዲስ፤ ፓራ ቶጊዳይሳ ሱንꬂ ሃይቆ ጌቴቴስ፤ ኢዛ ቃሴ ዱፎይ ካሌስ፤ ሃይቆይኔ ዱፎይ ቢታፌ ሳይሶ ኦላን፥ ጋፋን፥ ቦሻኒኔ ባዞ ዶኣን ዎꬋና ማላ ጎዳቴꬂ ኢስታስ ኢሜቲዴስ። ሂዚ 14፡21

9 ኢቻሻንꬆ ማታሜዛ ኢዚ ዶዪን ጾሳ ቃላ ጊሻሲኔ ባ ማርካቲዳ ማርካቴꬃ ጊሻስ ሃይቂዳይታ ሼምፖታ ያርሾ ያርሺዛሶዛ ጋርሳን ቤያዲስ። 10 ኢስቲ ꬎቃ ቃላን፥ «ጌሻኔ ቱማንቻ ጎዳዉ! ኔኒ ቢታ ቦላ ዲዛ ኣሳ ቦላ ፒርዶንታይኔ ኑ ሱꬃ ጊሻስ ኔ ሃሎ ኬሶንታይ ኣዪዴ ጋካናሴ?» ጊ ዋሲዳ። 11 ኢስታስ ኢሳስ ኢሳስ ቦꬃ ማይኦይ ኢሜቲዴስ፤ ኢስታ ማላቲካ ቡሮ ሃይቃና፤ ኢስታ ማላ ኦሳንቻ ጊዲዳ ኢስታ ላጌቲኔ ኢስታ ኢሻታ ቆዳይ ኩማና ጋካናስ ኢስቲ ጉꬃ ዎዴስ ሼምፒ ታካና ማላ ኢስታስ ዮቴቲዴስ።

12 ሄሳፌ ጉዬ ሄ ዶርሳይ ኡሱፑንꬆ ማታሜዛ ዶዪን ታኒ ኢዛኮ ጼላዲስ፤ ሄኮ ቢታይ ዎልቃማ ቃꬅ ቃጺዴስ፤ ኣርሼይ ኣሲ ካዮስ ማይኢዛ ካሬꬃ ማይኦ ማላ ካሬጺዴስ፤ ኣጊናይካ ኩሜꬃራ ሱꬃ ማላ ዞኣዱስ። ኣጁ 11፡13፤ 16፡18፤ ኢሳ 13፡10፤ ኢዩ 2፡10፥31፤ 3፡15፤ ማቶ 24፡29፤ ማር 13፡24-25፤ ሉቃ 21፡25 13 ዎልቃማ ኣሱራ ጫርኮይ ጫርኪዲ ሚꬃ ኣይፌ ቆቆፊዛ ማላ ሳሎፔ ጾሊንቴይ ቆቆፌቲዴስ። ኢሳ 34፡4 14 ሳሎይካ ዋራቃታ ማላ ጻጼቲ ኪቺዴስ፤ ዙማቲኔ ኣባ ጊዶን ዲዛ ጋዴቲ ዉሪካ ባ ዲዛሶፔ ꬋይዳ።ኣጁ 16፡20 15 ቢታ ቦላ ዲዛ ካዎቲ ቢታ ሃሪዛይቲ፥ ኦላ ሃላቃቲ፥ ዱሬቲ፥ ዎልቃማቲ፥ ኣሽካራቲኔ ጎዳቲ ዉሪካ ጎንጎሎ ጊዶ፥ ዙማታ ጋርሳኒኔ ዛላታ ጋርሳን ቆቴቲዳ። ኢሳ 2፡19፥21 16 ዙማታኔ ዛላታካ፥ «ኑና ካሚቴ! ኣልጋ ቦላ ኡቲዳይሳ ሲንꬃፌ፥ ሄ ዶርሳዛ ሃንቆፌ ኑና ቆቲቴ። ሆሴ 10፡8፤ ሉቃ 23፡30 17 ዎልቃማ ሃንቆ ጋላሳይ ጋኪዴስ፤ ኢዛ ኦኔ ዳንዳያናይ?» ጊዳ። ኢዩ 2፡11፤ ሚል 3፡2