1 ሄሳፌ ጉዬ ላፑን ኪታንቻታ፥ «ኢንቴ ቢዲ ጾሳ ሃንቆ ኦይኪዳ ላፑን ጹኣታ ዱጌ ቢታ ቦላ ጉሲቴ!» ጊዛ ጊታ ቃላይ ጾሳ ኬꬃፌ ኬዚሺን ታ ሲያዲስ።

2 ኮይሮ ኪታንቻዚ ቢዲ ጹኣዛ ቢታ ቦላ ጉሲዴስ፤ ዶኣዛ ማላታይ ኢስታ ቦላኔ ሄ ዶኣዛ ሚስሌስ ጎይኒዛይታ ቦላ ኢታ ዋዪሲዛ ማዱንꬂ ኬዚዴስ። ኬሳ 9፡10

3 ናምኣንꬆ ኪታንቻዚ ጹኣዛ ኣባ ቦላ ጉሲዴስ፤ ኣባይካ ሃይቂዳ ኣሳ ሱꬃ ማላ ጊዲዴስ፤ ኣባ ጊዶን ሼምፖራ ዲዛይቲ ዉሪካ ሃይቂዳ።

4 ሄꬓንꬆ ኪታንቻይ ባ ጹኣዛ ሻፋታ ቦላኔ ፑልቶ ሃꬃታ ቦላ ጉሲዴስ፤ ኢስቲካ ሱꬅ ጊዲዳ። 5 ሃꬃ ቦላ ኢዛስ ጎዳቴꬂ ዲዛ ኪታንቻዚ፥ «ካሴካ ሃኢካ ዲዛ ጌሻ ጎዶ! ኔኒ ሄሳꬆ ፒርዲዳ ጊሻስ ኔኒ ቱማንቻ። 6 ኣሳይ ካሴ ኣማኒዛይታ ሱꬂኔ ናቤታ ሱꬅ ጉሲዳ ጊሻስ ኔ ኢስታ ሱꬅ ኡሻዳሳ፤ ሄሲካ ኢስታስ ቤሴስ» 7 ያርሾ ያርሺዛሶዛፔ፥ «ኤ ዉርሳ ዳንዳይዛ ጎዳ ጾሶ! ኔ ፒርዳቲ ዉሪካ ቱማኔ ሊኬ» ጊዛ ቃላ ሲያዲስ።

8 ኦይዳንꬆ ኪታንቻዚ ባ ጹኣዛ ኣርሼ ቦላ ጉሲዴስ፤ ኣርሼይካ ኣሳ ባ ሴላን ጹጋና ማላ ኣርሼስ ዎልቃይ ኢሜቲዴስ። 9 ኣሳይካ ዎልቃማ ሴላን ጹጌቲዴስ፤ ሄ ቦሻታ ቦላ ሼኔይ ኢዛስ ዲዛ ጾሳ ሱንꬅ ኣሳይ ጫዪዴስ ኣቲን ማሮቴꬃን ጌሊቤናኔ ኢዛካ ቦንቺቤና።

10 ኢቻሻንꬃ ኪታንቻይ ባ ጹኣ ዶኣዛ ኣልጋ ቦላ ጉሲዴስ፤ ሄ ዶኣዛ ካዎቴꬂ ꬉሚዴስ፤ ኣሳይ ዋዬዛፔ ዴንዲዳይሳን ባርካ ባ ኢንጻርስ ጋርጪዴስ። 11 ኢስቲ ጊዲኮ ሄ ማዱንꬃ ሳኮዛፔ ዴንዲዳይሳን ሳሎ ጾሳ ቃንጊዳ ኣቲን ማሮቴꬃን ጌሊቤቴና።

12 ኡሱፑንꬃ ኪታንቻይ ቃሴ ባ ጹኣዛ ዎጋ ኤፊራጺሴ ሻፋን ጉሲዴስ፤ ኣርሼይ ሞኪዛ ባጋፌ ያና ካዎታስ ኦጌ ጊጊሳና ማላ ሻፋዚ ሜሊዴስ። 13 ሄ ዳዌዛ ዶናፔኔ ሄ ዶኣዛ ዶናፔ፥ ዎርዶ ናቤዛ ዶናፔ ኦቃርስ ሚሳቲዛ ሄꬑ ቱና ኣያናቲ ኬዚሺን ታ ቤያዲስ። 14 ሄይቲ ማላታታ ኦꬂዛ ዳይዳንꬃ ኣያናታ። ሄይቲ ኣያናቲ ኡባ ዳንዳይዛ ጎዳ ጊታ ጋላስ ሃናና ኦላስ ኣሳ ሺሻናስ ኣላሜ ካዎቲ ዲዛሶ ኡባ ባና።

15 «ሄኮ ታኒ ካይሶ ማላ ቆፖንታ ጋካ ዎꬋና፤ ኢዚ ካሎቲን ኣሳይ ኢዛ ካሎቴꬅ ቤኦንታ ማላ ቤጊዲ ባ ማይኦ ናጊዛ ኣሲ ጋላቴቲዳዴ!»ማቶ 24፡43-44፤ ሉቃ 12፡39-40፤ ኣጁ 3፡3

16 ኣያናቲካ ካዎታ ኢብራዌ ኣሳ ቃላራ፥ «ኣርማጌዶኔ» ጌቴቲዛሶ ሺሺዳ። 2ካዎ 23፡29፤ ዛካ 12፡11 17 ላፑንꬆ ኪታንቻዚ ባ ጹኣዛ ጫርኮ ቦላ ጉሲዴስ፤ ጾሳ ኬꬃ ጊዶን ዲዛ ኣልጋዛፔ፥ «ፖሌቲዴስ» ጊዛ ዎልቃማ ቃላይ ኬዚዴስ። 18 ዎልቃንꬂ፥ ዳዳ ጊሪሲኔ ጉጉንꬂ፥ ጊታ ቢታ ቃꬂ ሃኒዴስ። ኣሲ ቢታ ቦላ ሜꬌቶሶፔ ሃኖ ጋካናስ ሄሳ ማላይ ቢታ ቦላ ሃኒ ኤሬና። ኣጁ 8፡5፤ 11፡13፥19 19 ዎጋ ካታማያ ሄꬑ ኬዛ ሻኬታ ዎꬋዱስ፤ ኣይዛቤታ ካታማቲ ላሌቲዳ ጾሲ ዎጋ ካታማዮ ባቢሎኔ ዛሪ ቆፒዴስ፤ ሚኖ ሃንቆ ጹኣን ኩሚ ኣቲዳ ዎይኔ ጫጄ ኡሹ ኡያና ማላ ኦꬂዴስ።ኢሳ 51፡17 20 ኣባ ጊዶን ዲዛ ዴሬቲ ዉሪካ ባቃቲዳ፤ ዙማቲካ ቤቲቤቴና። ኣጁ 6፡14 21 ኢሲ ኢሲ ሻቺ ኦይዱ ታማኔ ኢቻሹ ኪሎ ጊዲዛ ሻቺ ሳሎፔ ዱጌ ኣሳ ቦላ ዎꬊዴስ፤ ቦሻዚ ዳሮ ኢታ ጊዲዳ ጊሻስ ኣሳይ ሄ ሻቻ ቦሻ ጋሶን ጾሳ ጫዪዴስ። ኬሳ 9፡23-24፤ ኣጁ 11፡19