10
1 ታ ኢሻቶ! ኢስራኤሌ ናይታ ጊሻስ ታ ኣሞይኔ ታ ጾስ ዎሲዛይ ኢስቲ ꬋዮንታ ኣታናሳ። 2 ኢስቲ ጾሳ ዮኦስ ሚሼቲዛይታ ጊዲዳይሳ ታ ኢስታ ጊሻስ ማርካታና ዳንዳያይስ፤ ኢስታ ሚሼቴꬂ ጊዲኮ ኤራቴꬃን ጊዴና። 3 ጾሲ ኣስ ጺሊሲዛ ኦጌ ኤሮንታ ኣጊዲ ባ ጺሎቴꬃ ኦጌ ካሊዳ ኣቲን ጾሳ ጺሎቴꬃ ኦጌ ካሊቤቴና። 4 ኣማኒዛ ኣሳ ኡባ ጺሊሳናስ ኪርስቶሲ ዎጋ ኡባ ፖሊዴስ።
5 ሙሴይ ዎጋ ባጋራ ቤቲዛ ጺሎቴꬃ ጊሻስ ኤሪሲሼ፥ «ሃይታ ዎጋታ ፖሊ ኦꬂዛዴይ ሃ ዎጋታን ዳና» ጊዛይሳ። ሌዌ 18፡5 6 ኣማኖን ቤቲዛ ጺሎቴꬂ ቃሴ፥ «ኔ ዎዚናራ ፑዴ ሳሎ ኦኔ ኬዛናይ? ጎፓ፤» ሄሳꬆ ጉሲ ኪርስቶሳ ሳሎፔ ዱጌ ሃ ዎꬃና ጉሳ። 7 ዎይኮ፥ « ‹ዱጌ ጪማን ኦኔ ዎꬋናይ?› ጎፓ!» ሄሲካ ኪርስቶሳ ሃይቆፔ ቡሮ ዴንꬃና ጉሳ።
8 ጊዶ ኣቲን ቃላይ ኣይ ጊዜ? «ቃላይ ኔ ኣቻን ዴስ።» ኔ ዶናኒኔ ኔ ዎዚናን ዴስ፥ ኑኒ ኣማኖ ጊሻስ ሳባኪዛ ቃላይ ሃይሳ።
9 ኔኒ ኔ ዶናራ፥ «ዬሱሲ ጎዳ» ጋዳ ማርካቲኮ ጾሲ ኢዛ ሃይቆፔ ዴንꬂዳይሳ ኔ ዎዚናን ኔ ኣማኒኮ ኣታና። 10 ኔኒ ጺላናይ ዎዚናን ኣማኒኮ፤ ኔ ኣታናይ ኔ ዶናራ ማርካቲና። 11 ጌሻ ማጻፋይ ጊዛ ማላ፥ «ኢዛን ኣማኒዛይ ዉሪካ ዬላቴና።»ኢሳ 28፡16 12 ኣይሁዳታ ጊዶኒኔ ኣይዛቤታ ጊዶን ዱማቴꬂ ዴና፤ ኢሲ ጎዳይ ኡባሲካ ጎዳ፤ ኢዛ ዎሲዛይታ ጉጂ ኣንጄስ። 13 «ጎዳ ሱንꬅ ጼይጊዛይቲ ዉሪካ ኣታና» ጌቴቲ ጌሻ ማጻፋን ጻፌቲዴስ።
14 ሂስቲን ኢዛ ኣማኖንታይቲ ኢዛ ዎዝጊ ጼይጋኔ? ቃሴ ኢዛ ጊሻስ ሲዮንታ ዲሼ ዎስቲ ኣማናኔ? ሳባኬይ ባይንዳ ዲሺን ዎስቲ ሲያኔ? 15 ኪቴቶንታ ዎስቲ ሳባካንዴቶ? ሄሲካ፥ «ሚሺራቾ ቃላ ኤኪ ዪዛይታ ዩሲ ኣይ ማላ ሎኦ!» ጌቴቲ ጌሻ ማጻፋን ጻፌቲዳ ማላ ሃኒዴስ። ኢሳ 52፡7 16 ጊዶ ኣቲን ሲዪዳይቲ ዉሪካ ሚሺራቾ ቃላ ኤኪቤቴና፤ ኢሳያሲ፥ «ጎዶ! ኑ ዮቲዳይሳ ኦኒ ኣማኒዴ?» ጊዳ ማላ ሃኒዴስ። ኢሳ 53፡1
17 ሄሳ ጊሻስ ኣማኖይ ቤቲዛይ ዮቲዛ ቃላ ሲዬꬃና፤ ዮቴቲዛ ቃላይካ ኪርስቶሳ ጊሻስ ዮቲዛ ቃላፔ።
18 ጊዶ ኣቲን ኣሳይ ሲዪቤኔሻ? ጋዳ ታ ኦይቻይስ፤ ቱማፔ ኣሳይ ሲዪዴስ፤ ጌሻ ማጻፋን ጻፌቲዳ ማላ፥
«ኢስታ ቃላይ ቢታ ኡባኒኔ
ኣላሜ ጋጻ ጋካናስ ሲዬቲዴስ።»ማዛ 19፡4
19 ታ ቃሴካ ኦይቻይስ፤ ኢስራኤሌ ናይቲ ቃላ ኤሪቤቴኔሻ? ኮይሮ ሙሴይ ኢስታስ፥
«ታ ዴሬ ጊዶንታይታን
ታ ኢስታ ኣሞሳና፤
ዩሺ ቆፖንታ ዴሬታን
ታ ኢስታ ዪሎቻና» ጊዴስ። ዛሬ 32፡21
20 ኢሳያሲካ ጻላቴꬃን፥
«ታና ኮዮንታይታስ ታ ቤታዲስ፤
ታና ኦይቾንታይታስ
ታና ቆንጪሳዲስ» ጊዴስ። ኢሳ 65፡1
21 ኢስራኤሌ ጊሻስ ቃሴ፥
«ታስ ኣዛዜቶንታ ዴሬኮኔ
ታስ ኤኖ ጎንታ ዴሬኮ
ኩሜꬃ ጋላስ
ታ ኩሼ ሚጫዲስ» ጌስ። ኢሳ 65፡2