1 ታ ዛራዳ ጼሊሺን ሄን ታ ሲንꬃን ኢሲ ፒራꬊዛ ጻꬃ ማጻፋ ቤኣዲስ። 2 ኢዚካ ታና፥ «ኣይ ጼላይ?» ጊ ኦይቺዴስ። ታኒካ ኢዛስ፥ «ኣዱሳቴꬃይ ናምኡ ታሙ ዋꬋ፥ ጎምፓይ ታሙ ዋꬋ ጊዲዳ ኢሲ ፒራꬊዛ ጻꬃ ማጻፋ ቤኣዲስ» ጋዲስ።

3 ኢዚካ ታስ፥ «ሃ ጻꬃ ማጻፋ ጊዶን ቢታ ኡባ ቦላ ያና ቃንጌꬂ ጻፌቲ ኡቲዴስ፤ ሄ ማጻፋን ኢሲ ባጋራ፥ ‹ካይሶ ኡባይ ቢታ ቦላፌ ꬋያና› ጌቴቲ ጻፌቲዴስ፤ ቃሴካ ሃንኮ ባጋራ፥ ‹ዎርዶ ጫቂዛ ኡባይ ꬋያና› ጌቴቲ ጻፌቲዴስ። 4 ኡባፌ ዎልቃማ ጎዳይ፥ ‹ታኒ ቃንጌꬅ ኤሃና፤ ኢዚካ ካይሶታ ኬꬂኔ ታ ሱንꬃን ዎርዶ ጫቂዛይታ ኬꬅ ጌላና፤ ኢስታስ ሄን ዲዛ ኬꬃ፥ ሚꬃኔ ሹቻ ኡባ ꬋይሳና› ጌስ» ጊዴስ።

5 ሄሳፌ ካሊዲ ታናራ ሃሳዬቲዛ ኪታንቻይ ታኮ ዪዲ፥ «ሃይሲ ዪዛይ ኣዛኮ ꬎቁ ሂስታ ጼላ» ጊዴስ።

6 ታኒካ ኢዛ፥ «ሃይሲ ኣዜ?» ጋ ኦይቻዲስ። ኢዚካ «ሃይሲ ማካ ዳቾ» ጊዴስ፤ ቃሴካ ጉጂዲ፥ «ሃይሲ ቢታ ቦላ ዲዛ ኣሳይ ኦꬂዳ ቆሆዛ ቤሲዛ ማላታ» ጊዴስ።

7 ሄሳፌ ጉዬ ኢርሳሴ ጌቴቲዛ ቢራታፔ ኦሴቲዳ ካማይ ቃሬቲዛ ዎዴ ዳቾዛ ጊዶን ኡቲዳ ኢሲ ማጫሳዮ ቤኣዲስ። 8 ኪታንቻዚካ ታስ፥ «ሃና ቱና» ጊ ዮቲዲ ኢዞ ጉዬ ዛሪ ዳቾዛ ጊዶ ናቂ ጌልꬂዴስ፤ ሄ ዳቾ ካማዛካ ዛሪ ካሚዴስ።

9 ሄሳፌ ጉዬ ታኒ ፑዴ ꬎቁ ጋ ጼሊሺን ኢስታስ ቄፌታን ጫርኮይ ዲዛ ናምኡ ማጫሳታ ቤኣዲስ፤ ኢስታስ ቄፌይካ ካፎ ዎሌ ቄፌ ማላ፤ ኢስቲ ሄ ዳቾዛ ዴንꬂ ኤኪዲ ፑዴ ሳሎ ፒራꬊዳ።

10 ታኒካ ታናራ ሃሳይዛ ኪታንቻዛ፥ «ሃይቲ ዳቻ ኣዋ ኤፊዞ?» ጋ ኦይቻዲስ። 11 ኢዚካ፥ «ኢዛስ ኬꬅ ኬጻናስ ሳናኦሬ ዴሬ ኤፌቴስ፤ ኬጼቲ ጊጊዛ ዎዴ ዳቾዛ ሄን ዎꬃና» ጊዴስ።