1 ዳሪዮሲ ካዎቲዳ ኦይዳንꬆ ላይꬃን ካሴሎ ጌቴቲዛ ኡዱፉንꬃ ኣጊናን ኦይዳንꬆ ጋላስ ጎዳ ቃላይ ዛካራሳኮ ዪዴስ። 2 ቤቴሌ ኣሳይ ጎዳይ ዎሳናስ ሳርሳሬኔ ኤርጌሜ-ሜሌኬ ኢስታራ ዲዛይታራ ኢሲፌ ኪቲዳ። 3 ኢስቲካ ኡባፌ ዎልቃማ ጎዳ ኬꬃ ቄሴታኔ ናቤታ፥ «ኑ ካሴ ዳሮ ዎዴ ኦꬂዳይሳ ማላ ኢቻሻንꬃ ኣጊናን ጬጫናሲኔ ጾማናስ ኑስ ቤሲዜ?» ጊዲ ኦይቺዳ።

4 ቃሴካ ጎዳ ቃላይ ታኮ ዪዴስ፤ 5 «ሃ ዴሬ ኣሳኔ ቄሴታ፥ ‹ካሴ ኣꬊዳ ላፑን ታሙ ላይꬃታን ኢቻሻንꬃ ኣጊናኒኔ ላፑንꬃ ኣጊናን ኢንቴ ጾሚዳ ጾማይኔ ኢንቴ ጬጪዳ ጬጬይ ታ ቦንቾሴ? 6 ካሴ ኢንቴ ሚዳይሲኔ ኡዪዳይሲ ኢንቴስ ጻላ ጊዴኔ? 7 ዬሩሳላሜይኔ ኢዚ ኣቻን ዩዪ ኣꬊ ዲዛ ካታማቲ ሳሮቴꬃኒኔ ዱሬቴꬃን ዲዛ ዎዴ ዱጌሃ ባጋ ዙማታ ጋርሳኒኔ ኣርሼይ ጌሊዛ ባጋን ዲዛ ዙማታ ጋርሳን ካሴ ኣሲ ሄን ዲዛ ዎዴ ጎዳይ ባ ናቤታ ባጋራ ዮቲዳ ቃላይ ሃይሳ ጊዴኔ?› ጋ ኦይቻ።»

8 ጎዳ ቃላይ ቃሴካ ዛካራሳኮ ዪዴስ፤ 9 «ኡባፌ ዎልቃማ ጎዳይ፥ ‹ቱሙ ፒርዳ ፒርዲቴ፤ ኢንቴ ጋርሳን ኢሶይ ኢሳራ ማሬቲቴኔ ኢሶይ ኢሳስ ቃꬌቲቴ። 10 ኣምኤታ፥ ዪኦታ፥ ቤቴ ኣሳታኔ ማንቆታ ሜቶꬆፍቴ፤ ኢሶይ ኢሳስ ኢንቴ ዎዚናን ኢታ ቆፖፍቴ› ጌስ።

11 «ኢስቲ ቃሴ ሲያና ኮዪቤቴና፤ ዞኮ ዛሪዲ ባ ሃይꬅ ቱጪዳ። 12 ባ ዎዚና ዛላ ሹቻ ማላ ሚንꬂዳ፤ ኡባፌ ዎልቃማ ጎዳይ ካሴ ናቤታ ባጋራ ባ ኣያናን ኪቲዳ ቃላ ዎይኮ ዎጋ ሲዮንታ ኢጺዳ፤ ሄሳ ጊሻስ ኡባፌ ዎልቃማ ጎዳይ ኢስታ ቦላ ኬሂ ሃንቄቲዴስ። 13 ‹ታ ኢስታ ጼይጊሺን ኢስታ ሲዪቤቴና፤ ሄሳ ጊሻስ ኢስቲ ታና ጼይጊሺን ታኒካ ሲዪኬ› ጌስ ኡባፌ ዎልቃማ ጎዳይ። 14 ኢስቲ ኤሮንታ ኣላጋ ዴሬ ጊዶ ጎቴ ጫርኮን ኢስታ ላላዲስ፤ ኢስታፌ ጉዬራ ሃራይ ኦኒካ ሄ ቦንታ ማላኔ ሃ ዮንታ ማላ ቢታያ ኣሲ ባይንዳ ቡላ ቢታ ጊዳዱስ፤ ኢስቲ ሎኦ ቢታዮ ቡላ ኦꬂዳይ ሄሳ ማላና።»