ኢማና ማላ ዎሲቴ።

ኢራ ሻራ ኪቲዛይ ጎዳ፤

ኢዚ ኡባ ኣሳስ

ጊዲዛ ኢራ ኢሜስ፤

ኢሳስ ኢሳስ ቶካናስ

ዶዛ ኢሜስ።

ባሌꬆ ዮኦ ዮቴቴስ፤

ማሮቲ ዎርዶ ኣጁታ ቤዬቴስ፤

ካዪዛይቲ ዎርዶ

ኣጉሞ ኣጉሜቴቴስ፤

ኣሳካ ጮ ሃዳ ዮኦን

ሚንꬄꬄቴስ፤

ሄሳ ጊሻስ ዴሬይ

ሄሚዛዴይ ባይንዳ ዶርሳ ማላ

ጮ ሜላ ቶይላቲሼ ቆሄቲዴስ።

ሄንꬃንቻታ ቦላ

ታማ ማላ ኤጺ ኬዚዴስ።

ዴራ ካሌꬂዛይታ

ታ ቃጻያና።

ታኒ ኡባፌ ዎልቃማ ጎዳይ

ባ ዉዴ ጊዲዳ ዩሁዳ ኣሳ

ኦላስ ጊጊዳ ፓራ ማላ ኦꬃና።

ሹቺ፥

ዱንካኔ ቶሊዛ ꬊሽኬይ፥

ኦላ ቶራይኔ

ዴሬ ኡባ ሃሪዛይ ኬዛና።

ኦጌን ዲዛ ኡርቃ ዬꬊዛ

ሚኖ ኦላንቻታ ማላ ጊዳና፤

ጎዳይ ኢስታራ ዲዛ ጊሻስ

ፓራን ኦሌቲዛይታ ኢስቲ ጾናና።

ታ ኢስታስ ቃꬌቲዛ ጊሻስ

ኢስቲ ካሴ ዲዛሶታ ኢስታ ዛራና፤

ታኒ ጎዳ ኢስታ ጾሳ ጊዲዳ ጊሻስ

ታ ኢስታ ዎሳ ሲያና፤

ኢስቲካ ሃይሳፌ ካሴ

ታ ዬጋ ኤሮንታ

ኣሳ ማላ ጊዳና።

ዎልቃማ ኣሳ ማላ ጊዳና፤

ኢስታ ዎዚናይ

ዎይኔ ኡሹ ኡዪዳ

ኣሳ ማላ ኡፋዬታና፤

ኢስታ ናይቲ ኢስታ

ቤያናኔ ኡፋዬታና፤

ኢስቲካ ጎዳን ኡፋዬታና።

ኢሲ ቦላ ሺሻና፤

ቱማፔ ታ ኢስታ ዎዛና፤

ካሴ ማላ ታ ኢስታ ዳርሳና።

ኢስቲ ሄን ሃሆ ዴሬን ዲሼ

ታና ቆፓና፤

ኢስታኔ ኢስታ ናይቲ

ሼምፖራ ፓጻ ኣቲዲ

ጉዬ ሲማና።

ኣሶሬፔካ ሺሻና፤

ኢስታስ ኡቲዛሶይ

ኡንኣናሼ ጋካናስ

ታኒ ኢስታ ጋላኣዴኒኔ

ሊባኖሴን ሺሻና።

ዋዬቲ ኣꬋና፤

ኣባ ዳምባላይ ጮኡ ጋና፤

ጪማ ኣባይካ ዉሪ ሚጫና፤

ኦቶራንቻ ኣሶሬ ዴሬ

ኣሳይ ካዉያና፤

ጊብጼ ካዎቴꬃ

ጻምኣይ ሜቃና።

ኢስቲካ ኢዛ ሱንꬃን

ሲሜሬታና» ጌስ።