9
Isra7eele Bolla Yaana Pirda
1 GODAY yarsho yarshizasoza millen eqqi dishin ta beyadis;
izikka tana,
«Xoossa Keeththaa yochchay
qaaxxana gakkanaas
keeththa qustte
shoca laalladanne
asaa bolla kundana mala ooththa;
hessafekka attidayta
tani istta mashshara
wodha dhayssana;
isttafe oonikka baqatenna;
baqatikkoka taappe
kessi ekki attenna.
2 Istti duufo bookki gelidaakkoka
ta kushey
istta heeppe shoddi haa kessana;
istti pude salo kezidaakkoka
tani istta heeppe
haa duge goochcha woththana.
3 Istti pude Qarmeloose zumaa bolla
kezi qotettidaakkoka
ta kaaletta baada
istta heeppe woththana;
istti duge ciimma abba giddo
gelidi taappe qotettizaakkoka
heen istta shooshshi dukkana mala
ta azazana.
4 Istti ba morkketa kushen
di7etti biikkoka
heen istti mashshan
hayqqana mala
ta azazana;
tani istta bolla
ta ayfe lo7os gidontta
iitas zaarana» gi azazides.
5 Ubbaa Haariza GODAY
izi biittayo bochchees;
izakka seerawus;
izin diza ubbay yeekkees;
Nayle shaafay
kixxi guummiza mala
biitta ubbay qaaxxees;
qasse zaaridi kixa haaththi
wodhdhiza mala wodhdhana.
6 Ba duussaso salo ooththiday,
salokka sa7appe bollan
minththiday,
abba haath azazidi
biitta bolla gogissizay
izas sunththay GODAA.
7 GODAY, «Isra7eele asawu!
Intte taas
Tophphiya asa mala gidekketii?
Tani inttena
Gibxeppe kessoyssaththo
Filisxeeme asaa Qarxeeseppe
qasse Sooriya as
Qiireppe kessabeekkinaa?
8 Tani Ubbaa Haariza GODAY
gede nagaranchcha
Isra7eele asaa
kawoteththaako xeellays;
ta iza biittafe mulera dhayssana;
gido attiin Yaaqoobe zereth
ubbaa dhayssike» gees.
9 «Be7ite kath
zayzaren zayzariza mala
Isra7eele asaa
Ayzaabe kawoteththa
giddon zayzarana mala
ta azazana;
gido attiin isttafe issaadeyka
wora wodhdhi dhayenna.
10 ‹Nu bolla aykko iitaykka gakkenna
woykko nuna bochchenna› giza
ta dere asaa garsan diza
nagaranchchati ubbay
olan hayqqana» gees GODAY.
Isra7eele Asaa Simo Hidota
11 «Coo kundi laalettida keeththa mala gidida
Dawite zereththata kawoteththas
tani zaara essana wodey yaana;
tani gimbeza zaara gimbana;
laalettidayssaka ooraxissana;
kaseyssaththo zaara ooththana.
12 Hessaththoka Eedoome deren
attidaytanne
ta sunththan xeygettida dereta
ubbaa istti laattana»
gees GODAY.Hawa 15:16-18
13 «Kath maxizayti maxi wursontta
dishin goshsha wodey gakkees;
woyne ayfe gum7izaadey
gum7i giigontta dishin
woyne puute
tokkiza wodey gakkees;
he wode mal7iza lo7o woyne
ushshi zumaappe pulttana;
zumbullatappeka goggana.
14 Di7etti bida Isra7eele asaa
haa istta dere zaara ehana;
laalettida katamata zaari
keexxidi izan de7ana;
istti woyne tokkidi
izappe agettida ushshu uyana;
dumma dumma ayfiza mith
tokkidi iza ayfe maana.
15 Ta dere Isra7eele asaa
tani kase istta biittan
zaarada tokkana;
tani isttas immida biittafe
istti nam7anththo dhoqalletti
dhayettenna»
gees GODAY salo Xoossay.