Eranchchata Maxaafa
Giddo Qofa
Eranchchata maxaafan xaafettiday biitta bolla asa duussi qaanth gidoyssafekka bollara daro metoy, qaxa pirdaynne daaburay kumidayssa erida gishshas «Asa de7oy coo hada» giidi qachchida issi era asa qofata. He eranchchazas asa de7o hanota kaalettiza Xoossa ooso xuuray erettontta ixxides. Gido attiin asi ba diza layth ubbaan, baas dandayettida keena minni ooththana malanne Xoossi asaas immida imotatan asi ufayettana mala bessizayssa zorees. Eranchchaza qofatappe dariza baggay misaton qofaninne hidota qanxxon kumidayta; gido attiin*Misenna giza qaalaza issi issi baggan xuse gishin hara baggan xussa woykko palqqe geetettees. hayssi ha maxaafay Geeshsha Maxaafa garsan beetoy geeshsha maxaafan xaphida ammano haray attoshin hayssa hara dumma qofaynne sidhey izan kumida maxaafaakka gaththi issi bolla oykkana gakkanaas izi aaho gididayssa erisees. Ha maxaafazi asa de7o herega mala bessiza gishshas daro asay hayssa ha maxaafazappe bana minththeththiza miish demmides. Hessaththoka hayta ha qofata bessizay, ha issi geeshsha maxaafay de7os gita birsheth immiza Xoossaan ufays ooththana mala zorizayssa asay erides.
Ha Maxaafay Oykkida Kumeththa Qofa
Duussa birsheth 1:1—2:26
Ubbaas wodey dees 3:1-8
De7oy ubba wode lo7o gidontta gishshas akeekan duus 3:9—6:12
De7oso kaaleththiza oge 7:1—8:17
Sinththafe aazi hananaakko erizay deenna 9:1—11:6
Xoos bonchchonne izas azazeteth 11:7—12:14
1
Ubbayka Hada
1 Hayssi Dawite naa
Yerusalaamen kawotida
eranchchaza qaala.
2 He eranchchay,
«Ubbaa miishshi hada;
hadappeka aadhdhida hada;
ubbaa miishshika hada» gees.
3 Alame bolla asa nay
daaburza daabura ubbaas
ay wodhey dizee?
4 Yeletay aadhdhi bishin
hara yeletay yees;
gido attiin biittaya mernaaskka
minna de7awus.
5 Arshey mokkeessinne wullees;
qasseka ba mokkizaso baanaas eesotees.
6 Carkoy dugeha bagga carkees;
hara wode pudeha bagga
simmees;
qasse yuuyi yuuyi aadhdhidi
ba losida ogen gelees.
7 Shaafa haath ubbay
biidi abban gelees;
gido attiin abbay mulekka
kumi erenna;
shaafa haaththati kase ba yidaso
simmi beettes.
8 Asi haasayanaas
dandayzaazappe bollara
yo7oti ubbay saleththizaaza;
ayfey xeellidi kalli erenna;
hayththika siyidi,
«Taas gidides» gi erenna.
9 Kase haniday simmi izi hanana;
qasse ha7i hanishe dizaykka
kase hanidayssa.
Hessa gishshas salo gufanththon
aykkoyka ooraththa
miishshi deenna.
10 Oonikka, «Be7ite!
Hayssi ooraththa miishsha» giikko
hessi ooraththa miish gidenna;
hessi nuni yelettanaappe
kasekka diza miishsha.
11 Beni wode hanida hanota
zaaridi hassa7issiza
miishshi deenna;
sinththafe yaanaytikka
isttafe kaalli yaanaytan
qofettettenna.
Eranchchazi De7o Loseppe Demmida Timirte
12 Tani eranchchazi Yerusalaamen
Isra7eeles kawo gidada de7adis.
13 Tani salo gufanththon diza ubbaa
shaakka eranaassinne
aadho erateththan
pilgga xeellanaas
ta qofaa qachchadis;
Xoossi asa nayta toossida toohoy
ay mala deexoo!
14 Salo gufanththon hanida hanota
ubbaa ta be7adis;
gido attiin ubbayka hada;
carko oykkana yedeththiza mala.
15 Geellattida miishshi
sitti gaanawu dandayenna;
qasse baynda miishshi
qoodettana dandayenna.
16 Tanikka ta wozinan, «Taappe kase Yerusalaame haarida ubbatappe tani gitanne aadho eranchcha gidadis; tani aadho erateththaninne eran keeha loohadis» ga qoppadis.1Kawo 4:29-31 17 Qasse tani aadho erateth, gooshshateththinne eeyateth shaakka eranaas keeha baaxetadis; gido attiin wurseththan hessika carko oykkanaas yedeththiza mala hada gididayssa eradis.
18 Aadho erateththi darshin
ceecey darees;
eray dariza wodekka
metoy darees.