Medheteththa Maxaafa
Giddo Qofa
Medheteththa Maxaafa geetettiza ha maxaafay salotinne sa7ay medhettida medheta gishshas, asa zereththi yida yuussa gishshas, nagaraynne waaye de7oy doomettida doomeththa gishshas, Xoossaranne asa zereththara diza gaytoteththa gishshas yootees. Medheteththa gishshas nam7u waanna waanna sohotan shaakettidi xeelettanaas dandayees.
1. Shempo issinippe biidi tammanne issino gakkanaas diza sohoy salotinne sa7ay medhettida medheteththa gishshassinne asa zereththas koyro taarike yootees. Addaamenne Hewaani taarikey, Qayeelenne Aabeele taarikey, Nohenne dhayssa haaththa taarikey, hessaththoka Baabiloone Gimbe taarikey de7izayssi hayssana.
2. Shempo tammanne nam7afe biidi ichchash tammu gakkanaas diza sohoy Isra7eele asaas beni aawata taarikeza yootees; istta giddon koyroy ba ammanoninne Xoossas azazettiza hanotan erettida Abrahaame; hessafe qasse iza naa Yisaaqa, iza naaza naa Yaaqoobenne Yaaqoobe nayta tammanne nam7ata taarikey kaallees; hayti Yaaqoobe nayti tammanne nam7ati, tammanne nam7u Isra7eele zaretas ano gididayta; heyta he tammanne nam7u Isra7eele nayta giddonkka Yooseefe dummasidi, hessaththoka qasse Yaaqoobenne iza nayta hankko attida istta keeththa asaara Gibxe biitta efida hanotaa minththi xeellees.
Ha maxaafay asa taarike yootizayssa gidikkoka, ubbaafe aaththidi izi yootizayssi Xoossi ooththida ooso gishshassa. Xoossi salotanne sa7a medhdhida taarikeza yo7o doommidi, Xoossi ba asaas qoppizayssa aggonttayssa hidotan qonccisishe polees; ha Maxaafaa giddon ha gaxappe he gaxa gakkanaas yootettiza taarikeza goday, nagaranchchata pirdizaynne qaxxayizay, ba asaa kaaleththizaynne maaddizay, istta taarikeza hanotaakka giigsizay ba hu7en Xoossa. Hayssi beni maxaafay xaafettidayssi asa ammano taarikeza mazgabidi oykkanaassinne he ammanoykka minni de7ana mala ooththanaassa.
Ha Maxaafay Oykkida Kumeththa Qofa
Medheteth 1:1—2:25
Nagaranne meto doometh 3:1-24
Addaameppe biidi Nohe gakkanaas diza hanota 4:1—5:32
Nohenne bashsha haath 6:1—10:32
Baabiloone gimbe 11:1-9
Seemeppe biidi Abrahaame gakkanaas diza hanota 11:10-32
Beni aawata Abrahaame, Yisaaqanne Yaaqoobe wode 12:1—35:29
Eesawe yeleta 36:1-43
Yooseefenne iza ishata 37:1—45:28
Isra7eele asay Gibxen 46:1—50:26
1
Medheteththa Gishshas
1 Xoossi koyro salonne sa7a medhdhides. 2 He wode sa7ay lo7i giigibeennanne aykkoyka baynda mela dees; ciimmasohota dhumay goozi oykkides; Xoossa Ayanay haaththafe bollara may7i uttides.
3 Hessafe guye Xoossi, «Poo7o gido» giin poo7o gidides.2Qoro 4:6 4 Poo7oy lo7o gididayssa Xoossi be7idi poo7o dhumappe shaakkides. 5 Xoossi poo7oza, «Gallas», dhumaza, «Omars» gi sunththides. Gadey qammidessinne wontides; hessika koyro gallassa.
6-7 Hessafe guye Xoossi, «Bollara diza haaththaa garsara diza haaththaafe shaakkiza salo gufanththoy hano» giin hanides. Xoossi salo gufanththo giigsidi, salo gufanththofe bollara diza haaththaa garsara diza haaththaafe shaakkides. 8 Xoossi he gufanththoza, «Salo» gi sunththides. Gadey qammidessinne wontides; hessika nam7anththo gallassa.2Phex 3:5
9 Hessafe guye Xoossi, «Saloppe garsara diza haaththi issison shiiqi eelliko mela biittay qoncco» giin hanides. 10 Xoossi he mela sohoza, «Biitta» gi sunththides; qasse issison eellida haaththaa, «Abba» gi sunththides; histtidi Xoossi hessi lo7o gididayssa be7ides. 11 Hessafe simmiin Xoossi, «Biittay miththinne maata mokiso; zereththa ayfera diza miththinne zereththa ayfera diza teeriza mith dumma dumma qommo mokiso» giin hanides. 12 Hessa gishshas biittay miththinne maata dumma dumma qommon mokisiin Xoossi hessi lo7o gididayssa be7ides. 13 Gadey qammidessinne wontides; hessika heedzdzanththo gallassa.
14 Hessafe guye Xoossi, «Gallas qammafe shaakkanaas poo7oti salo gufanththon gidetto; istti gallas, wodenne layth erisetto; 15 biitta bollan poo7isana mala istti salo gufanththon poo7etto» giin hanides. 16 Xoossi nam7u gita poo7ota, gitatizayssi gallas poo7ana malanne guuxxizayssi omars poo7ana mala medhdhides; xoolinttetakka medhdhides. 17-18 Xoossi istta ha biitta bollan poo7isana mala, gallassinne qamma haarana malanne poo7oza dhumappe shaakkana mala, salo gufanththon istta woththides. Histtidi Xoossi hessi lo7o gididayssa be7ides. 19 Gadey qammidessinne wontides; hessika oydanththo gallassa.
20 Hessafe guye Xoossi, «Shemppora diza dumma dumma medheteththati haaththa giddon daretto; kafotikka biittafe bollaranne salo gufanththofe garsara piradhdhetto» gides. 21 Histtidi Xoossi abban diza gita do7ata, haaththa giddon woxxi qaaxxiza medheteththata ubbaa, kafo ubbaa dumma dumma qommon medhdhides. Hessika lo7o gididayssa Xoossi be7ides. 22 Xoossi isttas, «Yelettite; darite; abba haaththaa kumite; kafoykka biitta bollan coratto» gi anjjides. 23 Gadey qammidessinne wontides; hessika ichchashanththo gallassa.
24 Hessafe guye Xoossi, «Shemppora diza medheteththati ba qommon qommon meheti, biittara gooshettiza medheteththatinne do7ati ba qommon qommon biitta bolla kezetto» giin hanides. 25 Xoossi do7ata istta qommon qommon, mehetakka istta qommon qommoninne biittara gooshettiza medheteththatakka ubbaa istta qommon qommon medhdhides; hessika lo7o gididayssa Xoossi be7ides.
26 Hessafe simmiin Xoossi, «Ane as nu leemison nuna misatissidi medhdhoos; istti abba moleta, salo kafota, meheta, biitta bolla woxxi qaaxxiza medheteththata ubbaa haaretto» gides.1Qoro 11:7 27 Hessaththo Xoossi as ba leemison bana misatissidi medhdhides; izi istta addenne macca ooththi medhdhides.Mato 19:4; Mar 10:6
28 Xoossi isttas, «Yelettite; corattite; hayssa biittaa kumitenne haarite; abba mole, salo kafotanne biitta bolla woxxi qaaxxiza, shemppora diza medheteththata ubbaa haarite» gi anjjides.Medhe 5:1-2
29 Hessafe simmiin Xoossi, «Be7ite! Tani ha biitta ubbaa bollan zereththa ayfera diza miththinne zereththa ayfera diza teeriza mith ubbaa inttes immadis; isttika inttes miza quma gidetto. 30 Qasseka ha biittaa bolla diza mehenne do7a ubbaas, salo kafotas ubbaas, biittara gooshettiza medheteththata ubbaassinne shemppora paxa diza medheteththata ubbaas miza miish gidana mala, cilila miththinne maata kumeth immadis» giin hanides. 31 Xoossi ba medhdhidayssa ubbaaka xeellidi daro lo7o gididayssa be7ides. Gadey qammidessinne wontides; hessika usuppunththa gallassa.