2
1 Hessa gishshas intte intte ishata Isra7eele nayta, «Aami»*Aami guussi ta dere guussa. intte michchetakka «Uruhaama» gi sunththite.
Ammanettontta Ixxida Isra7eele Asaa Qaxxayeteth
2 «Ta naytoo! Intte aayo zorite;
hayssafe guye iza taas
machcho gidukku;
tanikka izis azina gidikke;
ba sinththafe layma suuke hano,
ba wodira giddofe
laymateth diggu.
3 Iza simmontta ixxiko
iza ba aayey uloppe
kallo yelettida mala
ta izo xiire kallo ashshana.
Bazzo malanne mela biitta mala
ta izo ooththana.
Ta izo haaththa
saamon wodhana.
4 Layma maccassafe
yelettida gishshas
izi naytas ta mishettike.
5 Istta aaya layma;
kawushsha hanon shaaradus.
Iza ba doonara,
‹Tani ta laggeththotaakko bays;
istti taas kaththinne haaththe,
suufeppenne lee7e haareppe
dadettida may7o,
wogara zaytenne
woyne ushshu immana› gadus.
6 Hessa gishshas tani izi oge
agunththara gordana;
iza kezana penge
demmontta mala
tani gimbe yuushsha
aaththa gordana.
7 Iza ba laggeththota
demmanaas woxxana shin
isttako gakkanaas dandayukku.
Iza istta
daro koyana shin demmuku;
hayssafe guye,
‹Hayssa ha duussafe
taas kase duussay lo7o;
hessa gishshas beni ta azinaakko
ta simma baana› gaana.
8 Tani izis kase kath,
woyne ushshinne
wogara zayte immidayssanne
qasseka iza ba7aale geetettiza
eeqa xoossas yarsho biranne
worqqa izis darssiday
tana gididayssa
iza shaakka erabeekku.
9 Hessa gishshas
kaththi kaxxiza wode
ha kaxxiza kaththaa,
woyne ayfey teeriza wode
woyne ushshaa,
tani izippe woththa ekkana.
Hessaththoka iza ba kalloteththa
kammontta mala suufeppenne
lee7e haareppe
dadettida may7oza
ta izippe qaara ekkana.
10 Izi laggeththota sinththan
ta izo kallo ashshana;
izo ta kusheppe
ashshanay deenna.
11 Iza ba ufayssa ba7aaleta ubbaa,
layththan layththan
bonchchiza ba7aaleta,
agina xeeron xeeron
bonchchiza ba7aaleta,
Sambatatanne hara iza
dumma dumma doora
bonchchiza ba7aaleta
nam7anththo ooththontta mala
ta diggana.
12 Iza ba laggeththotappe
baas waaga gaada
ekkida woyne miththatanne
balase miththata ta dhoqallana.
Isttaka wora do7ati maana.
13 Ba7aale geetettiza eeqa xoossas
exaane cuwasanaassinne
lo7o geexe woththada
iza ba laggeththota kaallada
tana aggida gishshas
ta izo qaxxayana.
Xoossi Ba Deraa Siiqiza Siiqo
14 «Hessa gishshas ta izo
maqqada bazzo efana;
heen ta izira siiqo qaalan
haasayssana.
15 Kase izi woyne atakilteza
ta izis zaarana;
meto shoobba ta izis
hidota penge histtana;
heen iza Gibxeppe kezida gallas
naateththan dashe yexxida mala
yexxana.Iya 7:24-26
16 Iza he gallassi tana,
‹Ta azinazoo› ga xeygana attiin
hayssafe guye,
‹Ba7aale› geetettiza
eeqa xoossa sunththan
tana xeygukku.
17 Ba7aale geetettiza
eeqa xoossata sunththaa
ta izi doonappe diggana;
hayssafe guye
istta sunththi dendenna.
18 He wode do7atara,
kafotaranne biitta bolla
gooshettiza medheteth ubbatara
ta intte gishshas caaqettana.
Ubbayka saron daana mala
ola, tooranne, Mashsha
biitta bollafe ta diggana.
19 Hanne Isra7eele!
Ta nena mernaas taas giigsana;
Ta nees xilloteththaninne
suureteththan pirdana;
aggontta siiqoninne qadhetan
ta nena taas oychcha giigsana.
20 Tani ammanettada nena
taas machcho giigsana.
Nenikka tani
GODA gididayssa erana.
21 «He gallas tani zaaro immana;
tani salo azazana;
saloykka sa7as zaaro immana.
22 Biittay kath, woyne ushshunne
zayte immana;
isttika Izra7eeles zaaro gidana.
23 Tani ta dereyo biitta bolla tokkana.
‹Maaroteththi bayndaaro› geetettidaaro
ta zaarada maarana;
‹Ta maarikke› gidayssaka
zaara maarana;
‹Intte ta dere deekketa›
geetettideta.
‹Ta dereta› gaada
ta xeygana gaana;
isttika tana,
‹Neni nu Xoossa› gaana» gees.Oro 9:25; 1Phex 2:10