7
1 «Tani ta dere Isra7eele
asa paththanaassinne
zaarada duresanaas koyza wode;
Efreeme nagaraynne
Samaariya asa iitateththi
keehi dari beettides.
Istti issoy issaas wordoteettes,
kaysoti keeththe bookki gelidi
kaysoteettes,
pangati oge bolla
aadhdhooson aadhdhooson
bonqqeettes.
2 Gido attiin tani hayssa
istta iitateththaa wursa erizayssa
istti akeekibeettenna.
Hessa gishshas istta
istta nagaray giddoththi
woththides;
istta iita oosoy
taappe geemmibeenna» gees.
Kawo Keeththan Dendida Iita Maqqo
3 GODAY,
«Istti kawoza ba iitateththan
halaqatakka bantta wordon
baleththeettes.
4 Istti wurikka laymatizayta,
bukeesoy dendana gakkanaas
daabbo uukkizaadey
tama eeththanaas
koshshontta seelisida cooce mala.
5 Nu kawoza ba7aale gallas
halaqati woyne ushshan
maththo leelaa gida.
Izikka qidhizaytara zuppetides.
6 Istta wozinay
cooce tama mala seellides;
genen izakko shiiqeettes.
Istti omarsi kumeththi
hanqo cuwattishe aqeettes
wonteththa gallas eexxiza
tama mala
popol7u geettes.
7 Wurikka tama cooce mala
seellidayta;
banttana ayssizayta
dippi histti wursida.
Istta kawotikka kundida;
isttafe oonikka
taakko shiiqibeenna.
Isra7eele Asay Hara Kawoteththatara Walakettides
8 «Efreemey hara kawoteththatara
walakettides;
izi shirettontta attida
ukeththa mala.
9 Allagati istta wolqqa mida;
gido attiin istti hessa
eribeettenna.
Iza hu7ey puulunth caddides;
gido attiin izi hessa eribeenna.
10 Isra7eele asaa otoreteththi
istta bolla markkattees;
hessi wuri haniinkka
istti GODAA bantta Xoossako
simmibeettenna;
izakka koyibeettenna.
11 «Isra7eele asay
elle balettizanne
qofay baynda
haraphphe kafo mala.
Issito Gibxe xeygees;
hara wode
qasse Asoorekko simmees;
12 Istti piradhdhishin ta gite
istta bolla yeggana;
salo kafota mala
duge goochcha woththana;
istti ooththida iita ooso gishshas
ta istta dere sinththan
qaxxayana.
13 Istti taappe haakki bida gishshas
isttas aayye ana!
Ta bolla istti makkallida gishshas
istta bolla dhayssizaazi yo;
Tani istta wozzana koyadis;
istti gidikko ta bolla
wordo haasayeettes.
14 Istti ba hiixa bolla
ichchidi yeekkeettes;
gido attiin wozinappe
taakko woosettenna;
kaththassinne
ushshas shiiqeettes;
gido attiin taappe sher7i gida.
15 Tani istta tamaarsadissinne
istta minththadis;
istti gidikko ta bolla dendida.
16 Taappe haakkidi
hada miishshako simmida;
Istti caddana xongiin
wora biza toora mala.
Istta kaaleththizaytikka
bantti haasayza iita
qaala gaason
mashshan wurana;
hessafe dendoyssan istti Gibxe
biittan qidhes attana.