10
1 Geella woganne
as un7eththiza awajja
kessizaytas aayye ana!
2 Manqota pirda geellasizaytas,
un7ettida ta dereza
pirda bokkasizaytas,
am7eta aqota bonqqizaytas,
yi7ota aqota dhechchi mizaytas
aayye ana!
3 Inttena xomosiza wode
intte awa gelandetii?
Haakoppe bashshi yiza wode
ay hanandetii?
Maado demmanaas
oonakko baqatandetii?
Intte aqota awan qottandetii?
4 Qashettida asaara
issife qasheteththafe
shukettiza asaara issife
shuketeththafe attiin
haray inttes attanaasoy deenna.
Hessi ubbay haniinkka
GODAA hanqoy dochchibeenna;
qaxxayanaas izi ba kushe
denththi woththides.
Asoore Bolla Yaana Xoossa Pirda
5 GODAY, «Ta hanqos guufe,
ta ehiza bashshas
xam7a gidida Asoore biitta
asaas aayye ana!Isa 14:24-27; Naho 1:1—3:19; Sofo 2:13-15
6 Istta aqota bonqqana mala,
banttas di7o
buuri shiishshana mala,
istti oge urqqaththo
yedhettana mala,
Xoos erontta
kawoteththa bolla kiittana.
Tana hanqeththida asaa bolla
tani Asooreta yeddana.
7 Gido attiin Asoore kawoy
hayssa halchchibeenna;
iza wozinan hayssa mala
qofay deenna;
iza halchchoy daro kawoteththata
bashshanaassinne
mulera dhayssanaassa.
8 Izi, ‹Ta ola gadawati ubbati
kawo gidettennee?› gi ceeqettees.
9 ‹Kalnnoy Karkamishe mala,
Hamaatey Arfaade mala,
Samaariyaykka
Damasqo mala gidettennee?
10 Yerusalaameninne
Samaariyan de7iza
eeqa misletappe
dariza misleta goynniza
kawoteththata seeranaas
tani ta kushe yeddadis.
11 Samaariya bollaninne
izi misleta bolla
ta ooththoyssaththo
Yerusalaame bollanne
izi misleta bolla
ta ooththikinaa?› gees» gides.
12 GODAY Xiyoone zuma bollanne Yerusalaame bolla ba ooththana ooso ubbaa polidaappe guye, «Asoore kawo iza wozina otoreteththaa gishshassinne izi kadhe ayfen xeelliza gishshas ta iza qaxxayana» gees.
13 Asoore kawoy,
«Hayssa ubbaa
tani mino qesen ooththadis;
qasseka tani aadho eranchchanne
akeekanchcha;
tani kawoteththata
zawa laalladis;
tani istta aqota bonqqa ekkadis;
ta qarateththan
istta kawota kawushshadis.
14 Asi ba kushe
kafo keeththan yeddiza mala
tanikka ta kushe
kawoteththata aqotan yeddadis.
Qasse asi dogetti attida
phuuphphulleta shiishshiza mala
tanikka dere ubbaa shiishshadis.
Paallanaas ba qefe
micciday deenna;
waassanaas ba doona
doyday deenna» gides.
15 Kalttay banan
qanxxizaade bolla ceeqettizee?
Magaazey bana
goochchizaade bolla otorettizee?
Xam7ay bana oykkida asa bolla
ba hu7e qaaththana dandayzee?
guufey asi baynda barkka
hemetti erizee?
16 Hessa gishshas GODAY,
Ubbaafe Wolqqama GODAY,
modhdhida iza olanchchata bolla
gilqisiza harge yeddana;
iza bonchchozappe garsara
laciza tama yeddana.
17 Isra7eele Poo7oy tama gidana;
Geeshshazikka tama laco gidana;
issi gallassan iza agunththaanne
kindichchoza tamay maana.
18 Harganchchay gilqidi
hayqqiza mala
ba woraa bonchchonne
aradda biitta,
ashonne shemppo
mulera dhayssana.
19 Iza woran guuththa miththati
casha attana;
heytakka qeeri nay
qoodi wursana dadayees.
Casha Attida Isra7eele Zareta
20 He wode Isra7eele zareppe
casha attidayti,
Yaaqoobe keeththafe attidayti
hayssafe guye banttana
shocidayta bolla zemppettenna;
gido attiin GODAAN
Isra7eele Geeshshan
tumappe ammanettana.
21 Casha attidayti simmana;
Yaaqoobe keeththafe
casha attidayti
Ubbaafe Wolqqama
Xoossaako simmana.
22 Nenoo Isra7eele! Ne asay
abba shaamintta mala gidikkoka
casha attidayti xalla simmana.
Xilloteththan kumida
gita bashshi awajettides.
23 GODAY, Ubbaafe Wolqqama
GODAY sa7a ubbaa bollan
ehana qachchida
bash ehana.Oro 9:27
Asoore Bolla Yaana Xoossa Pirda
24 Hessa gishshas GODAY, Ubbaafe Wolqqama GODAY,
«Xiyoonen diza ta derezoo!
Gibxeti ne bolla
ooththidayssaththo
guufe ne bolla denththidayta
durqqan nena qoxxida
Asoore asaas babbofa.
25 Ta ne bolla ehida qixaateza
guuththa wode garsan ta essana;
ta istta bollaka
bosha ehana» gees.
26 Ubbaafe Wolqqama GODAY,
«Midiyaame asaa
Hereebe zaalla achchan
shocoyssaththo
izi istta xurqafera wadhdhana;
izi Gibxeta bolla
ooththidayssaththo
ba guufeza
abba bolla denththana.
27 He gallas istta toohoy
ne hasheppe,
istta qambaray
ne morgefe kichchana;
ne ordeteththafe dendidayssan
iza qambaray meqqana» gees.
Worajjizayti Yeggida Ola
28 Istti Ayaatera biidi
Migeroone kanththi beettes;
baas diza miishshaa
Makimaasen shiishsheettes.
29 Istti pinnizasora aadhdhi biidi,
nuni Geeban dunkaani aqana;
Eraamay dagammadus;
Sa7oole katama
Gibi7ay baqatadus.
30 Gaalime nayee ne waassa!
Laysha ezga siya!
Manqo gidida Anatoote,
ne izis zaaro imma.
31 Madimeenaha baqata bolla dawus;
Geeba derey qotettana
woththan dees.
32 Istti hach Noobe gakkana;
istti bantta kushe
Yerusalaame zumbulla bolla,
Xiyoone macca nay zuma bolla
ceeqeteththan mandana.
33 Be7ite GODAY,
Ubbaafe Wolqqama GODAY
ba gita wolqqan
haggata qanxxereththana;
adussa miththatikka
shiretti wodhdhana;
dhoqqu dhoqqu
gidaytikka kundana.
34 Girdi gida woraakka
kalttara qeexana;
Libaanoose zigatikka
Wolqqamaza sinththan kundana.