29
Dawite Katamaas Aayye Ana
1 Hanne Dawiti nenan de7ida
Ar7eele*Ibraaweta qaalara Ar7eele guussi Xoossa yarshosoho guussa. katamayee!
Nena aayye ana!
Layththa bolla layth gujja;
ba7aaletakka zaara
zaarada bonchcha.
2 Gido attiin tani
Ar7eele katamayo giddoththana;
iza yeekkananne waassana;
iza taas yarsho
yarshizaso gidana.
3 Tani ne yuushon dunkaanana;
ta ne yuushon gimbe
yuushsha aaththana;
ne yuushon shakko ooththada
ta nena un7eththana.
4 Neni duge wodhdhana;
biitta garsafe pude haasayana;
ne haasayay gudullaa
giddofe kezana;
ne cenggurssi
moytille cenggurssa mala
biitta garsafe pude kezana;
ne haasayaykka
gudulla giddofe saasukettana.
5 Gido attiin daro ne morkketi
gudulla suulla mala,
menxe iitati carkon biza
happa mala gidana;
qofay baynda dishin,
6 Ubbaafe Wolqqama
GODAY dadan,
biittaa qaaththan,
gita cenggurssan,
gote carkoninne wolqqama
abba dambalan
ubbaa miza tama lacon yaana.
7 Ar7eele oliza kawoteththata
ubbaa wudey
izi bollanne izi shakko bolla
daafa yeggizaytinne dooddizayti,
agumo malanne omars beettiza
ajjuuta mala gidana.
8 Gafida asi agumora mishe aqees;
gido attiin izi
dhiskofe dendishin
gafay aggonttayssa mala,
saamettida asi
agumora uyishe aqees;
gido attiin beeggishin
daaburaynne saamoy
iza aggonttayssa mala
Xiyoone zuma oliza
kawoteththata ubbaa wudey
hessaththo hanana.
Xoossa Azazo Ixoy Ehiza Qixaate
9 Dammattidi malalettite;
inttena intterkka qooqisidi
qooqe gidite.
Gido attiin woyne ushshu
uyontta coo maththottite;
maththosiza ushshu uyontta
dishe gandigarite.
10 GODAY intte bolla wolqqama
dhisko yeggides;
intte nabeta ayfe goozides;
ajjuuta be7izayta
hu7e gullunttissides.Oro 11:8
11 Ha ajjuutay isttas xaaththa maxaafa giddon gordetti diza qaala mala gidides. Ha xaaththa maxaafa nababanaas dandayza asi, «Shoobbe nuus nababa» giidi intte immiko, izi inttes, «Gordettida gishshas tani nababanaas dandaykke» gaana. 12 Qasse xaaththa maxaafaa nababo dandayontta asas, «Shoobbe nuus nababa» giidi intte izas immiko izi inttes, «Ta nababo dandaykke» gaana.
13 GODAY,
«Hayssi derey doonan xalla
taakko shiiqees;
ba metershan xalla
tana bonchchees;
gido attiin iza wozinay
taappe haakon dees.
Istti asi tamaarsidanne
asi woththida wogan
taas goynneettes.Mato 15:8-9; Mar 7:6-7
14 Hessa gishshas tani ha asaa bolla
malalisiza miishsha bolla
malalisiza miish ooththashe
zaara zaara istta malalissana;
aadho eranchchata
erateththi dhayana;
akeekanchchata akeekaykka
pentti baana» gides.1Qoro 1:19
Sinththafe Yaana Hidota
15 Bantta halchcho
GODAAPPE genththanaas
duge ciimma ollan
wodhdhizaytas
bantta ooso dhuman
ooththizaytas
«Nuna ooni be7anee?
Nuna ooni eranee?»
gizaytas aayye ana!
16 Intte yo7ota laammi yeggeeta;
manata urqqa mala xeelleeta!
Medhettidayssi
medhdhidayssa,
«Izi tana medhdhibeenna» gizee?
Mana miishshi bana medhdhidayssa,
«Izi aykkoka erenna» gizee?Isa 45:9
17 Libaanoosey laamettidi
aradda gade gidanaas,
aradda biittay laamettidi
wora gidanaas
guuththa wodey
attides gidennee?
18 He gallas tulley
xaaththa maxaafa qaala siyana;
qooqe ayfetikka shaarumappenne
dhumappe shaakettidi xeellana.
19 Ashketi GODAAN,
hiyeesati Isra7eele Geeshshan
zaari zaari ufayettana.
20 Menxe iitati ubbay wurana;
qilccizayti tim7i gaana;
Iita ooththanaas
zamadi uttidayti dhayana.
21 As yo7on mooranchcha kessizayti,
shilotan mootettizayssa bolla
woximade waaxizayti,
wordo markkan tumateththa
xillotappe bonqqizayti dhayana.
22 Hessa gishshas Abrahaame wozzida
GODAY Yaaqoobesos,
«Yaaqoobey hayssafe
guye yeellatenna;
iza sinththika laamettenna.
23 Bantta giddon ta kushe ooso gidida
bantta nayta be7ishe
ta sunththaa
geeshshateththan naagana;
istti Yaaqoobe Geeshshaza
geeshshateth erana;
Isra7eele Xoossaa sinththan
yashshateththan eqqana.
24 Ayanan balidayti
simmidi akeekana;
zuuzumizaytikka
timirte ekkana» gees.