Yaaqoobey
Xaafida Kiita
Giddo Qofa
Hayssi Yaaqoobe kiitazi asi hach hach daana duussa gishshas yootizaaz gidishin izi xaafettiday dumma dumma deren laaletti diza tammanne nam7u Isra7eele zarkketassa; hessa xaafidaadey nuni nu erateth ooson peyshshana oge gishshas ammaniza asa moko gishshassinne amale lo7eththana oge bessiza yo7ota qonccisiza haasayata leemisora bessees. Manqoteththa gishshas, paace gishshas, lo7o amale gishshas, qanggeteththa gishshas, ammano gishshassinne lo7o ooso gishshas inxarsa iitateththaa gishshassinne lo7eteththa gishshas, aadho erateththa gishshas issoy issaara ooshsha gishshas, otoreteththa gishshassinne ashketeththa gishshas, hara asa bolla pirda gishshas, ceeqeteththa gishshas, dandaya gishshassinne woosa gishshas, ammanizayti ooththanaas bessiza miishshata hu7en hu7en xaafides.
Ha kiitazi ammanoy ammano duussan oosettana bessiza ogeta lo7eththi qonccisees.
Ha Maxaafay Oykkida Kumeththa Qofa
Geloso 1:1
Ammanonne aadho erateth 1:2-8
Manqoteththinne dureteth 1:9-11
Paace 1:12-18
Xoossa qaala siyidi ooson peysho 1:19-27
Ogey baynda maado maaddontta mala imettida qofso 2:1-13
Ammanonne ooso 2:14-26
Ammanizaadenne iza haasaya 3:1-18
Ammanizaadenne hayssa ha alameza 4:1—5:6
Dumma dumma hanota gishshas imettida zore 5:7-20
1
1 Xoossa oosanchchanne Yesus Kirstoosa oosanchcha gidida Yaaqoobeppe biitta bolla laalettida tammanne nam7u kochchatas saroteththi inttes gido.Mato 13:55; Mar 6:3; Hawa 15:13; Gala 1:19
Metonne Paace
2 Ta ishatoo! Intte bolla dumma dumma waayey gakkiko hessa wursi ufayssan qoodite. 3 Gaasoykka intte ammano paaceteththi inttes dandaya immizayssa intte ereeta. 4 Intte dandayan minni eqqanayssi inttes issi miishshika paccontta kumeththa asinne wosoy bayndayta gidana mala ooththo. 5 Intte giddofe oonaska erateththi pacciko oonakka leqqontta ba kiyateththaara ubbaas immiza Xoossaa woosso; izaadeska imettana. 6 Gido attiin sidhey baynda ammanon woosso; gaasoykka sidhizaadey abba qaaththiza dambala carko mala. 7 Hessaadey Godaappe aykkoka demmana giidi qoppofo. 8 Hessaadey nam7u qofan oykettidi ba biza oge bolla yaanne haa giza asa mala.
9 Kase ziqqa duussan dizaade Xoossi dhoqqu histtana gishshas ufayetto. 10 Asa dureteththi maata ciishsha mala qokkana gishshas duussan dhoqqu gidaadey Xoossi iza ziqqi histtiko ufayetto. 11 Arshey xuuggidi maata shullisees; maata ciishshayka shullees; iza lo7eteththika dhayees; hessaththoka durey hach hach daabursan dishin iza dureteththi dhayees.
12 Paacen minni eqqidaadey izi anjjettidaade; gaasoykka izi paacera eqettishin Xoossi bana dosizaytas immida hidota de7o akilile izi ekkana. 13 Oonikka paacettizaa gidikko tana Xoossi paaccees gooppo; gaasoykka Xoossi ase iitan paaccenna; izi oonakka paacci erenna. 14 Gido attiin issi issi asi paacettizay barkka ba iita amo kaallishenne balettishe paacettees. 15 Amoy qanththatidi nagara yelees; nagaraykka diccidaappe guye hayqo yelees.
16 Ta siiqo ishatoo! Intte balettofte. 17 Lo7o imoteththinne kumeththa anjjoy wuri bolla salo poo7ota Aawappe wodhdheettes; iza achchan yaanne haa yuuyiza eeshoykka deenna. 18 Nu iza medheteththaas koyro bayrata gidana mala ba sheneninne ba tuma qaalaan nuna yelides.
Siyidayssa Ooso
19 Dosettida ta ishatoo! Hayssa yuushshi qopite; asi wurikka siyanaas eesoto; haasayassinne hanqos eesotoppo. 20 Asa hanqoy Xoossa xilloteth ooththenna. 21 Hessa gishshas tunateththinne dalgida iitateththi inttefe kessi yeggidi intte shemppo ashshanaas dandayza intte giddon tokettida qaalaa ashketeththara ekkite.
22 Qaalay gizayssa ooththite attiin mela sis xalla siyizaadentta gididi intterkka inttena baleththofte. 23 Qaalaa siyishe siyida qaalay gizayssa ooththonttaadey ba ayfeso mastootera xeelliza asa mala. 24 Bana xeelli be7idi bees; izi ay misatizaakko heerakka balettichchees. 25 Gido attiin bana geeshshiza lo7o wogaa xeelli be7idi izan minnizaadey ba siyidayssa ooththizaadeynne balonttaadey izi ba ooson anjjettidaade gidana.
26 Ba doona naagontta barkka ba wozina baleththishe ta ammanays gizaadey barkka bana baleththees; iza ammanoykka hada ammano. 27 Xoossaa Aawaa sinththan iitateththi baynda lo7o ammanoy aayanne aaway hayqqida nayta, istta azinati hayqqida maccassata metotettishin maadonne hayssa alameza tunateththaafe bana naago.