18
Belidaade Haasaya
1 Shuha dere as Belidaadi
hizgi zaarides;
2 Iyoobee! Ne ays
hayssa mala haasaya darsay?
Ane ezga; nunikka haasayoos.
3 Neni nuna ays meheta mala qooday;
neni ays nuna tulleta mala
akeekontta as ooththa xeellay?
4 Neni hanqettiko nena qohaasa attiin
ne hanqozan biittay
mela attenna.
Zaallatikka ba dizasoppe
qaaxxettenna.
5 Nagaranchcha xomppey to7ana;
tama lacoykka nam7anththo beettenna;
6 Iza dunkaane giddon diza
poo7oy to7ana;
poo7ozikka dhumana.Iyo 21:17
7 Izas mino tanggoy
qaammi qaammi baana;
gene qoppizaade qofay
iza zaari kundisana.
8 Izi barkka biidi woximaden gelana;
iza tohoykka giten qaxettana.
9 Woximadey iza qirphe oykkana;
heenkka waaxi ashshana.
10 Sa7a bolla yarde wodoroy
micettides;
iza ogenkka woximadey
giigettides.
11 «Yashshi iza giddoththides;
guyera kaalli kaalli
goodereththees.
12 Iza wolqqay koshan wurides;
boshaykka iza dhayssanaas
giigettides.
13 Hargey iza asateththa gilqisana;
hayqoykka mulera ekki baana.
14 Hirgay baynda ammanetti diza
keeththafe izi goodettana;
as ubbaa haariza hayqoy
iza ekkana.
15 Iza keeththan
ay miishshika attenna;
izi aqizasozankka
diine tamay laalettana.
16 Xaphoppe meliza miththa malanne
haggatikka meqerettiza
miththa mala gidana.
17 Biitta bolla iza qoppiza asi deenna;
iza goobateththika
biittafe dhayana.
18 Izi Poo7osoppe
gede dhuman goodettana;
biitta bollafe izi kichchana.
19 Iza dabbota giddofe
iza laattana yeletay beettenna;
iza baachchanka
zarey izas attenna.
20 Ushachcha baggaranne
hadirsa baggara diza asay;
iza bolla gakkida metoza gishshas
keehi babbidi kokkorana.
21 Ay wodekka iita asata wurseththay
hessa mala;
Xoossas yayyontta
asa qaaday hayssa.»