26
Iyoobe Haasaya
1 Iyoobi hizgi zaarides;
2 «Hayssa ne haasayoyssan
daaburanchchata maaddida
nees misatizee?
Qesey argacidaade minththida
nees misatizee?
3 Aadho erateththi paccidaades
ne ay zore immadii!
Ay erateththika
izaades qonccisadi!
4 Histtiin hayssa ne haasayana mala
nena maaddiday oonee?
Ne haasayana mala
nena denththeththiday
oona ayanaa!»
5 «Wolqqama wogga gita abbaafe
garsan diza hayqqidayta shemppoti
wolqqama kokkorsan deettes.
6 Si7ooleykka Xoossa sinththan
qonccen dees;
Abadoone geetettizasoza
ay miishshika
kammanawu dandayenna.
7 Xoossi pudeha baggara diza saloza
carko bolla miccides;
biittaaka aykkoy bayndason
kuulloti daana mala ooththides.
8 Xoossi shaarati
haath xunxi oykkana mala ooththees;
haaththafe dendoyssan
shaarati daaketettenna.
9 Izi uttiza
kawoteththa araata genththana;
shaararakka kammana.
10 Poo7onne dhuma shaakkanaas;
wolqqama wogga gita abbaa sinththan
saloza zawa ooththidi miccides.
11 Izi hanqiza wode
salo tuussati dagaman kokkoreettes.
12 Izi ba wolqqan abbaa co7u ooththees;
iza aadho erateththayka
Era7aabe geetettizayssa dhayssana.
13 Ba peenozan saloza geeshshana;
xongettiza shooshshaa
ba kushen caddana.
14 Haytanti ubbay
Xoossi ooththiza oosotappe
guuththata;
nu siyizayssi izas saasuketh xalla;
wolqqama giirissa izayssa
ooni akeekanawu dandayzee?»