31
Iyoobi Ba Wurseththa Haasaya Polides
1 «Lo7o maccassako xeellada
amottontta mala;
tani ta ayfetara caaqo geladis.
2 Bollan de7iza Xoossay
asas ay qaada immandeesha?
Salon diza Ubbaa
Dandayza Xoossafe
asas imettida gishay aazeeshaa?
3 Iita asa bolla qohoy,
nagaranchcha asa bollaka dhayoy
gakkanayssi erettidaaz gidennee?
4 Xoossay ta ooththizayssa
ubbaa beyennee?
Ta hemetakka shaakki erennee?
5 Tani wordo haasaydaa gidikko,
asakka baleththidaa gidikko;
6 Xoossi tana suure
geeddaran geeddaro.
Tani xillo gididayssa shaakki ero.
7 Ta suure ogeppe ke7idaa gidikko,
Ta ayfey be7ida ubbaa
ta wozinay amottidaa gidikko,
qasseka ta kushey
nagaran tunidaa gidikko,
8 tani zeridayssa hara asi mo.
Ta caarechchazikka kumeththi
shodetti oletto.
9 «Ta wozinay
hara macca amottidaa gidikko,
ta shooroza machcho
laymatanaas iza pengen
ta zuggidaa gidikko,
10 ta machcha hara asas gaaccu;
qasseka hara addey izira zin7o.
11 Hayssika keehi tuna;
Wogankka qaxxayssiza nagara.
12 Ha nagaray tama mala
xuuggiza gishshas
ta hayssa ooththidaakko
ta aqota xuuggi
dhayssanakkoshin.
13 «Maccanne attuma gidida
ta aylleti tana mootiin
istta mootoza
ta kadhada aggidaa gidikko,
14 Xoossi tana pirdiza wode
tani waananee?
Qasse izi tana oychchiza wode
tani ay zaaro immanee?
15 Ta aayey ulon tana medhdhidayssi
ta aylletakka medhdhiday
iza gidennee?
Nuna ubbatakka
aayi ulon medhdhiday
iza deennee?
16 «Manqoti tana woossiin
ta digga erikke;
Qasseka am7e maccassata
minththeththontta
agga erikke.
17 Yi7onne yitto nayta aggada
ta kath tarkka mabeekke.
18 Tani ta yelagateththafe doommada
tani istta aawa mala dichchadis,
ta de7o layth ubbaan
am7e maccassata maaddadis.
19 May7oy dhayiin
meegoy wodhizaade;
woykko metoppe dendidayssan
kallo dizaade beyada,
20 ta dorsata iskefe
oosettida may7o ta mayziin,
izaade ho7iin tana zaari galatontta
aggida wodey deenna.
21 Tani mooton istta
laththanayssa erada
aaway baynda nayta
naaqqidaa gidikko,
22 ta kushey hasheppe ke7o.
Ta qeseykka kurezappe koldo.
23 Tani Xoossa hanqos
yayyiza gishshassinne
iza teemateththaas yayyiza gishshas
Hayssa mala yo7ota ooththanawu
ta dandaykke.
24 «Tani taas diza
aqotan ammanettabeekke.
Woykko payya worqqaka
taas ammanettiza
miish ooththabeekke.
25 ‹Taas diza aqoy darides;
Tani dureteththafe dendidayssan
daro miish demmadis› gaada
ufayetta erikke.
26 Arshe poo7oza beyada,
agina lo7eteththa beyada,
27 ta wozinan istta
geemara bonchchabeeke;
qasseka ta kushe micca yeerada
isttas goynnabeekke.
28 Tani hayssa mala ooththidaakko
salon diza xoossa
kaddo gidida gishshas
hayti ha oosoti
ta bolla pirda ehiza nagarata.
29 «Ta morkketa kundeththaan
tani ufayettabeekke;
iita miishshi istta bolla
gakkishinkka miiccabeekke.
30 ‹Ta morkketi dhayetto› ga qanggada
nagara ooththabeekke.
31 Tani ubba wode
imaththa mokkizayssa
taso aylleti
ta gishshas markkatteettes.
32 Tani ta keeththa kare
ogera aadhdhi biza mandaras
doya woththadis.
Hessa gishshas gadey qammiin
yida imaththi
karen ayssa erikke.
33 Tani ta mooro genththabeekke;
hara asata mala
ta nagaraakka qottabeekke.
34 Tana asa daroy yashissininne
soo asata kadhoy daganththiin
tani tason co7u gaada
qotettida wodey deenna.
35 «Ta gizayssa siyizaadey
beettereneshin!
Tanikka teqe qaala
shiishshanakkoshin!
Ubbaa Dandayza Xoossay
ta gizayssa zaaro izi immo!
Tana mootiza mootanchchay
tana mootizayssa
xaafi shiishshiin
ta beyarkinaashin!
36 Woyto mala tani
ta hashen tookkanakkoshin;
kallachcha malakka
ta hu7e bolla goxxana.
37 Daannateththi diza asa mala
Xoossa sinththan
yayyontta eqqada
ta ooththida ubbaa
qonccisa yootanakkoshin.
38 «Asa gade wogay baynda
bonqqa ekkada
tani goyidaa gidikko,
39 he gadaa godata
ta mishisidaa gidikko,
aykkoka isttas immontta dashe
mokkida kaththa
tani midaa gidikko,
40 he ta goyiza goshshason diza
gistte gishshas agunththi,
bangga gishshas
sharafay mokko» gides.
Iyoobi ba haasaya
hayssan polides.