33
1 «Iyoobee! Ta nees
yootizayssa siya;
ta nees gizayssaka akeekan ezga;
2 ta nees zaaro immanaas
giigetta uttadis;
ta doonaykka haasayanaas
giigetti uttides.
3 Ta haasayza qaalati
ta wozina suureteththa
qoncciseettes;
ta inxarsay
ta eriza tuma haasayees.
4 Tana medhdhiday Xoossa Ayana;
taas de7o immiday
Ubbaa Dandayza Xoossa Ayana.
5 Neni dandayzaa gidikko
ta goyssas zaaro imma;
ne gaanayssa giigsada
tanara haasayeeta.
6 Hekko! Tani Xoossa sinththan
nenara gina;
tanikka medhettiday urqqafe.
7 Neni taas yayyanaas bessenna;
tanikka nena
naaqqanawu koshshenna.
8 Neni haasayda ubbaa ezgashe
ta gam7adis;
ne inxarsafe ke7ida qaalata
ta siyadis.
9 Neni haasayashe, ‹Tani qohoynne
borey baynda asa;
tani nagara ooththonttaadenne
xillo asa.
10 Gido attiin Xoossi tana qaxxayanaas
gaaso koyees;
tanakka baas morkke mala
qoodees.
11 Ta tohota izi
duruman duxxi qachchides.
Ta bizaso ubbaan
tana xeellees› gadasa.Iyo 13:27
12 «Iyoobee! Hayssi ne haasayay
bala gidides;
tanikka nees
qonccisanaas koyays;
Xoossi asa ubbaafe aadhdhees.
13 Histtiin, ‹Neni Xoossi
asi maganiza magana
siyenna› gaada
ays Xoossa bolla zuuzumay?
14 Asi akeekennafe attiin
Xoossi dumma dumma
ogera haasayees.
15 Omars asi hiixan ichchi diza wode
asi koyro dhisko
seeraagida wode;
agumoninne ajjuutankka
Xoossi haasayees.Iyo 4:13
16 He wode asi iza qaala siyana mala
hayththa doyees;
izi ba immiza seerankka
daganththees.
17 Hessa mala ooson asi
nagara ooththontta mala diggees;
otoreteththaaka isttafe denththees.
18 Xoossi asa shemppo
dhayoppe ashshees;
bashsha hayqoppeka wozzees.
19 Woykko asi meqeththan gelida
sakon dishin
asi ba balappe simmana mala
harge hiixan Xoossi zorees.
20 Hayssa malan harganchcha kath
lanqanaas iza iitees;
lo7o kaththika harassees.
21 Gilqateththappe dendoyssan
izas ashozikka wurides;
meqeththi xalla attides.
22 Iza shemppoy kezanaassinne
moogettanaas matides.
23 «Asi suure oge bessanaas
shiyan qoodettiza
Xoossa kiitanchchatappe,
issoy iza maaddanaas yidaakko,
24 kiitanchchay izas qadhettidi,
‹Iza wozzizaade
ta demmida gishshas
izi duge duufon
wodhdhontta mala
aggaaga!› giidi
hayqo oykkidaakko,
25 hessa gishshas iza asateththay,
qeeri naa asho mala
zaari ooraxana;
izas yelagateththa wode mala
qasseka hanana.
26 He wode Xoossako izi woossana.
Iza woosaakka Xoossi siyana;
Xoossa sinth
izi be7idi ufayettana;
Xoossika iza woosaas
zaaro immana.
27 Izi asa sinththan,
‹Tani nagara ooththadis;
suure gididayssaka geellasadis.
Xoossay gidikko ta moora mala
taas ooththibeenna.
28 Tani duufon gelontta mala
tana ashshides;
hekko ha7i paxa daada
tani poo7o beyays› gi yexxides.
29 «Hekko! Xoossi hayssa
ubbaa miishsha
asas zaari zaari ooththees.
30 De7on diidi poo7o beyana mala
iza shemppo hayqoppe ashshees.
31 «Iyoobee! Ta nees yootizayssa
lo7eththa siya;
tani nees yootays
ane neni co7u ga.
32 Neni haasayanaas
koyza miishshi diikko
taas yoota,
ta neni xillo gididayssa
nena bessana koyays.
33 Akkay giikko!
Tani haasayzayssa
co7u gaada siya;
tani nena
erateth tamaarsana» gides.