Ermaasa Zilas
Giddo Qofa
Ermaasa zilasi Kirstoosi yelettanaappe kase 586 layththan Yerusalaamey laalettida gishshassinne derey goodettida gishshas ichchashu zilassa ginxota shiishshi oykkides; ha maxaafan dariza baggay yeeho gishshassinne kayoteththa gishshas yootizaa gidikkoka asi Xoossan ammanettana gishshassinne hidota qanxxontta daana mala tamaarsiza ginxo kifileykka izan dees; hayti zilasati ayhuda asay Kirstoosi yelettanaappe kase 586 layththan deraa bolla gakkida bashshaa yuushshi qoppana mala layththan layththan xoomaninne kayoteththan Xoossa goyno wogata istti poliza gallassatan go7etteettes.
Ha Maxaafay Oykkida Kumeththa Qofa
Koyro zilas: Yerusalaame waayenne kayoteth 1:1-22
Nam7anththo zilas: Xoossi Yerusalaame bolla yeggida qixaate 2:1-12
Heedzdzanththo zilas: Sinththafe yaana hidota 3:1-66
Oydanththo zilas: Yerusalaame dhayo 4:1-22
Ichchashanththo zilas: Maaroteth demmanaas woosa 5:1-22
1
Yerusalaame Waayenne Kayo
1 Kase izin daro kawoteththay
diza katamaya
waanada oletta attadee!
Dereta giddon kase gita gididaara
waanada am7i mala gidadee!
Awuraajjata garsan
godatto gididaara
ha7i waanada aylle gidadee!
2 Iza giddoththi
camo yeeho yeekkawus;
izis afunththayka
shagalara goggees;
izi laggetappe izo
minththeththizay
oonikka deenna;
ubbatikka izo kaddida;
zaaridikka izis morkke gidida.
3 Yuhuday daro waayettidaappenne
tooshettidaappe guye di7ettadus;
iza kawoteththata
giddon uttadus;
izis shempizasoykka dhaydes;
iza meto garsan dishin
gooddizayti ubbay izo demmida.
4 Oonikka izi ba7aaleta
bonchchanaas
yontta gishshas
Xiyoone ogeti yeekkeettes;
izi pengetara gelizaynne
kezizay deenna;
izi qeeseti ceeceettes;
geela7otikka muuzotteettes;
izakka gita meto
garsan tuggatawus.
5 Izi nagaray daro gidida gaason
GODAY izi bolla meto yeggides;
izi morkketi izo haarida;
izi naytikka morkketan di7ettida;
izi morkketas duussi lo7ides.
6 Xiyoone macca nayppe
izi puulateththinne teemay
shaaketti kichchides;
izi daannati maata
mizasoy dhayda
genessa mala gidida;
istti bana gooddizaytappe
wolqqay wuriin baqatida.
7 Yerusalaamey metotida wodeninne
waayettida gallassatan
kase izis diza aqota
yuushsha qoppawus;
iza morkke kushen
kundida wode
izo maaddizay
oonikka baynda wode,
izi morkketi izi kundeththaa
be7idi izi bolla miiccida.
8 Yerusalaamey daro deexo
nagara ooththadus;
kadheska attadus;
iza kallo dishin be7ida gishshas
kase izo bonchchidayti ubbay
izo kadhida;
izakka ba baggara yeellatada
biitta xeellashe guye simmadus.
9 Izi tunateththi
izi may7o bolla beettides;
sinththafe izi bolla hananayssa
iza qoppabeekku;
izi kundeththi
daganththizaaz gidides;
iza, «Ta Godaa Xoossoo!
Ta metotiza metoza be7a;
ta morkketi tana xoonida»
ga woossiinkka
izo minththeththizay
oonikka beettibeenna.
10 Izi aqota ubbaa bolla
morkkey ba kushe yeddides;
Xoossa asaa shiiqon
gelontta mala neni diggidayti
eeqa xoossatas
goynniza ayzaabeti
gede izi Xoossa Keeththan
gelishin be7adus.
11 Izi asay miza kath demmanaas
koshshan daaburees;
shemppora paxa daanaas
baas diza
aqota maana kaththara
laammeettes;
Yerusalaame asay, «Abeet GODAWU!
Nuni kawuyidos;
nuna xeellada nuus qoppa.
12 «Godaa Xoossi
ba wolqqama hanqoza
nu bolla yeddida wode
nu bolla gakkida meto mala
metoy gakkida asi dizaa gidikko
intteno ogera aadhdhi biza
ubbato ane be7ite!
Ha metoy inttes
kawushsha misatizee?
13 «Izi bolla dhoqqasohoppe
tama yeddides;
he tamazikka nuus
meqeththan gelides;
nu tohota qachchanaas
gite yeggides;
histtidi nuna
guye zaari kundisides;
kumeththa gallas
nuna daaburssides;
coo melakka toylasides.
14 «Ta nagara shiishshi qachchidi
ta morgen woththides;
ta wolqqaka wursides;
tani eqettanaas
dandayontta morkketas
GODAY tana aaththi immides.
15 «Nu garsan diza olanchchata
ubbatara Xoossi eqettides;
nu giddofe yelagata dhayssanaas
olanchchata nu bolla yeddides.
Woyne miththa ayfe
ushshu kessanaas
yedhdhiza mala
GODAY boshettontta
geela7o misatiza
Yuhuda asaa yedhides.
16 «Morkkey nu bolla goobides;
nu naytikka barkka attida;
nuna zori minththeththizayti
nuuppe haakkida;
hessa gishshas ta yeekkayssinne
afunththa gussays.
17 Xiyoona ba kushe miccadus;
izo minththeththizaadey deenna;
Yaaqoobe zaretas shooroti
izas morkke gidana mala
Xoossi azazo kessides;
Yerusalaameykka istta giddon
tuna miishsha mala qoodettadus.
18 «Xoossi xillo;
tani gidikko
iza azazo bolla makkalladis;
intte wurikka siyite;
ta metozakka xeellite;
macca naytinne
naateththa attuma nayti
taappe di7etti bida.
19 Tani ta dosizayta xeygadis;
istti gidikko tana kaddida;
ta qeesetinne cimati
ba shemppo ashshanaas
kath koyishe
katamay giddon wurida.
20 «Abeet GODAWU!
Ta waayeza be7a!
ta giddo asateththay metotides;
ta keeha makkalladis;
ta wozinaykka meqqides;
Karen gidiin soon
deraa hayqoy wursees.
21 «Derey ta zilalizayssa siyides;
gido attiin oonikka tana
minththeththizaadey
beettibeenna;
ta morkketi ubbayka
ta metotoyssa siyida;
neni ooththoyssaka eridi
istti ufayettida;
ne istta bolla ehana ga
qachchida gallassaya yu;
isttika ta mala zilaletto.
22 «Istta iitateththi
ne sinththan beetto;
ta nagara gaason
ne ta bolla ooththoyssaththo
istta bollaka ooththa;
ta ceecada zilaliza
zilasay darides;
ta wozinaykka daaburdes»
gishe waasseettes.