2
Aadho Erateththafe Beettiza Anjjo
1 Ta naazoo! Neni ta qaala siyikko,
ta azazokka
neni ne wozinan woththiko,
2 ne hayth aadho erateththaako
zaarikko,
ne wozina akeekakko
ne zaarikko,
3 shaakki erisiza erateth
ne koykko,
ne qaala dhoqqu histtada
akeeka xeygikko,
4 izokka bira koyza mala
ne koykko,
qotan diza aqota mala
ne izo minththa koykko,
5 he wode neni
GODAAS yashshateth akeekana;
Xoossaaka lo7eththada erana.
6 GODAY aadho erateth
immiza gishshas
izappe erateththinne
akeekay beettes.
7 Izi suuretas xoono minjjees;
istta bolla wosoy bayndaytas
gondalle gidees.
8 Suure pirda oge naagees;
baas ammanettizayta
hemeth minththees.
9 He wode neni xilloteth,
suure pirda,
geellay baynda pirdanne
lo7o oge ubbaa shaakka erana.
10 Gaasoykka aadho erateththi
ne wozinan gelana;
erateththayka
ne shemppo ufayssana.
11 Shaakki eroy nees gondalle gidana;
akeekaykka nena naagana.
12 Aadho erateththi nena
iita asata ogeppe ashshana;
geella haasayzaytappeka
nena naagana.
13 Istti dhuma ogen baanaas
suure oge aggizayta;
14 Istti iita ooson ufayettizayta;
geella ogen hombocizayta.
15 Istta ogey geella;
istta hemetay mirqqeththa.
16 Aadho erateththi
layma maccassafe naagana;
ba inxarsan cimmizaarippe
nena ashshana.
17 Iza ba yelagateththa
azina aggidaaro;
Xoossa sinththan gelida
caaqo qaala kadhidaaro.
18 Izi soo beeththi hayqos gaththees;
izi ogetikka
moytilleta duulatan gaththeettes.
19 Izikko gelida
oonikka guye simmenna;
de7o ogekka demmenna.
20 Hessa gishshas neni
lo7o asata leemiso kaalla;
xillota ogen hemetta.
21 Suure asati biitta bolla gam7ana;
wosoy baynda asatikka
izi bolla minni daana.
22 Gido attiin iitati biittafe dhayana;
ammanettonttaytikka dhoqallettana.