14
1 Aadho erateththi diza maccassaya
ba keeth keexxawus;
eeyaya gidikko ba keeth
ba kushen laallawus.
2 Suure hemettiza asi
GODAAS yayyees;
geella oge hemettizay gidikko
iza kadhees.
3 Eeya haasayay iza zokkos
gatuma ehees;
aadho eranchchata
inxarsay gidikko
istta naagees.
4 Booray bayndason
gootaray mela dees;
gido attiin nees boorata wolqqan
daro kaththi beettees.
5 Ammanettiza markkay ubbato
tuma markkattees;
wordo markkay gidikko
wordo markkattees.
6 Qilccizay aadho erateth
koykkoka demmenna;
akeekay diza asi waayettontta
erateth demmees.
7 Eeya asappe haakka;
ays giikko neni iza haasayappe
erateth demmaka.
8 Akeekanchcha asas
aadho erateththi
ba oge naago;
eeyata eeyateththi gidikko
istta cimmees.
9 Eeyati nagara ooththidi
modhettanayssa aggidi
qilcceettes;
suure asatappe gidikko
lo7o qofay beettees.
10 Issoy issoy ba wozinan diza
ceece erees;
iza ufayssaa
oonikka izara koxxenna.
11 Iitata keeththay laalettana;
suureta keeththay gidikko
minni de7ana.
12 Asas likke misatiza ogey dees;
wurseththan gidikko
hayqos gaththees.Leemi 16:25
13 Miichchankka wozinay
meqqi erees;
muuzoteththan ufayssi
polettana dandayees.
14 Ba wozina xilloteththafe haassizayti
ba ooso waaga ekkana;
lo7o asikka ba lo7o ooso
waaga ekkana.
15 Eeya asi ubbaa miish ammanees;
cinccay gidikko
akeekidi tanggees.
16 Aadho eranchchay
GODAAS yayyeessinne
saatti tanggees;
iitappeka haakkees;
eeyay gidikko
wuday baynda bichcharees.
17 Elle hanqettiza asi
eeya ooso ooththees;
yo7o qachchiza asi dosettenna.
18 Wozina paceti eeyateth laattana;
akeekanchchati gidikko
erateth kallachcha mala goxxana.
19 Iitati lo7ota sinththan gulbatana;
nagaranchchati
xillota pengen hokkana.
20 Manqota istta laggetikka ixxeettes;
duretas gidikko
daro laggeti deettes.
21 Ba shooro kadhiza asi
nagara ooththees;
gido attiin manqo maaddizay
anjjettidayssa.
22 Iita halchchizayti
suure ogeppe
kare kezeettes dettenee?
Lo7o qoppizayti gidikko
siiqonne ammaneteth eheettes.
23 Minni ooson ubbaan wodhey dees;
hada yo7oy gidikko manqisees.
24 Aadho eranchchatas
istta dureteththi
isttas kallachcha;
eeyata eeyateththi gidikko
coo hada.
25 Tumu markkay shemppo ashshees;
wordo markkay gidikko baleththees.
26 GODAAS yayyiza asas
mino miixay dees;
iza naytaska
baqati attiza sohoy dees.
27 GODAAS yashshi de7o pultto;
hayqo woximadeppe as ashshees.
28 Dere corateththay kawos bonchcho;
dere guuththateththi
kawos bash gidees.
29 Dandayanchcha asas
gita akeekay dees;
elle hanqettiza asi gidikko
ba eeyateth qonccisees.
30 Woppu gida wozinay
bollas payyateth immees;
qanaatey gidikko
meqeththa giddon gelida
woyzazire mala.
31 Manqota naaqqiza asi
istta medhdhidayssa cayees;
metotanchchatas
qadhettizaa gidikko
Xoossa bonchchees.
32 Iitati bantta iita ooson kundana;
gido attiin xilloti
hayqo wodekka
baqati attizasoy dees.
33 Akeekanchcha asaa wozinan
aadho erateththi kumides;
gido attiin eeyati
aadho erateththa gishshas
aykkoka erettenna.
34 Xilloteththi kawoteththaa
dhoqqu dhoqqu ooththees;
gido attiin nagaray
ay asikka kawushshees.
35 Aadho erateththi diza aylley
kawo ufayssees;
gido attiin yeellachchiza aylley
ba bolla hanqo ehees.