24
1 Ta naazoo! Iita asata mala
gidarkina gooppa;
Isttara laggeteththika
nena lo7oppo.
2 Istti ubbato makkalla
miish maqetteettes;
bantta inxarsankka
gene haasayeettes.
3 Keeththi aadho erateththan
keexettees;
akeekankka minnees.
4 Eray de7ikko,
keeththi al7oninne
lo7o miishshan kumees.
5 Wozinama asas gita wolqqay dees;
eranchcha asikka
minoteth gujjees.
6 Ola olettanaas nees lo7o zore
xoono demmanaaskka
daro zoranchchata koshshees.
7 Eeya asi aadho erateththafe
keehi haahon dees;
duulata sinththan eqqidi
haasayana dandayenna.
8 Iita ooththanaas halchchiza asi
«Genanchcha» geetettees.
9 Eeyateththa qofay nagara;
qilccizaade asi ixxees.
10 Neni meto gallas laafikko,
ne wolqqay ay mala guuththee?
11 Hayqos laagetti bizayta ashsha;
shukettanaas gooshetti
bizayta ashsha.
12 Neni, «Ta hayssa erikke» giikko,
wozina pilggi erizayssi
izi akeekennee?
Ne shemppo naagizayssi erennee?
As ubbaas iza
ooso ooso mala immennee?
13 Ta naazoo!
Lo7o gidida gishshas eessa ma;
ililo eessi doonan mal7ees.
14 Aadho erateththika hessa mala;
izi ne shemppos
mal7o gididayssa era.
Neni izo demmizaa gidikko
wonto nees zemppo gidana;
ne hidotaykka hada gidenna.
15 Xillo asa keeth bonqqanaas
panga mala zamadoppa;
iza keeththa bolla meto gaththofa.
16 Xillo asi
laappunto kundikokka dendees;
gido attiin iitati
meton dhayeettes.
17 Ne morkkey
kundiza wode ufayettofa;
izi dhuphettiza wodekka
ne wozinan, «Hashshu!» gooppa.
18 Ne histtontta aggiko
GODAY hessa be7idi ufayettenna;
izi ba hanqoza
ne morkkeza bollafe zaarana.
19 Iita asata ooson ceecoppa;
istta mala gidarkina gooppa.
20 Iita asas hidotay baawa;
iitata xomppey tippi giidi to7ana.
21 Ta naazoo! GODAASSINNE
kawaas yayya;
makkallizaytarakka zuppetoppa.
22 Ays giikko hessa mala asata
qoppontta metoy gakkees;
kawoppenne GODAAPPE yaana
meto oonee erizay?
Aadho Eranchchay Gujji Yootida Hara Leemisota
23 Aadho eranchchati
gujjidikka hayssaththo gida;
Pirdishe maado pirday
lo7o gidenna.
24 Mooranchcha, «Neni xillo» gizaade
derey qanggees;
kawoteththatikka iza hileettes.
25 Gido attiin Mooranchcha,
«Neni mooradasa» gizayta
isttara lo7o miishshi gayttana;
isttas keehi daro anjjoy yaana.
26 Suure zaaro imoy
doona yeereteththa mala.
27 Kasetada ne karen diza
ooso ooththa;
ne goshsha giigsa;
hessafe guye ne keeth keexxa.
28 Ne shooroza bolla
gaasoy baynda markkattofa;
ne doonanka cimmofa.
29 Izi taas ooththida mala
tani izas ooththana;
«Tani izas iza ooso
kushe zaarana» gooppa.
30 Tani azalla asa gadera aadhdhadis;
akeekay paccida asa
woyne tura giddora kanththadis.
31 Ubbason agunththi mokkides;
gadaa sharafay goozides;
gimbeyka laalettides.
32 Tani be7idayssa yuushsha qoppadis;
tani beyooysafe
timirte demmadis.
33 Neni, «Guuththara liphiphi gays;
guuththara dhiska ekkays;
ne kushezakka shiishshada
guuththara shempa
ekkays» giikko,
34 manqoteththi ne bolla
panga mala yaana;
paceykka ola miishsha
oykkida asa mala puttu gaana.Leemi 6:10-11