10
1 Abeet GODAWU!
Ne ays haakkada eqqay?
Meto wodenkka ays geemmay?
2 Iita asati otoretteettes;
hiyeesatakka yedeththeettes;
istti haras woththida woximaden
zaari oykettetto.
3 Iita asi ba wozina
amon ceeqettees;
Yoray GODAA cayeessinne
kaddees.
4 Iita asi otoreteththan
Xoossa koyenna;
iza qofa ubbaan Xoossi deenna.
5 Ubbaa miishshi izas kumees;
ne wogay izas gelenna;
otoranchchay
ne wogappe haakkees;
hessa gishshas
ba morkketa bollan
izi qilccees.
6 Ba wozinan izi,
«Tana aykkoyka qaaththenna;
tana mulekka metoy gakkenna»
giidi qoppees.
7 Iza doonan qanggeththi,
wordoynne mandey kumides;
iza inxarsan geneynne
baleththoy dees.Oro 3:14
8 Dere giddon geemason zuggi uttees;
maadoy bayndayta
dhayssanaas naagettees;
xillo asata geeman wodhees.
9 Ba qotettizason geemmidi,
hiyeesa oykkanawu
gaammo mala zuggees;
maadoy bayndayta ba woximaden
oykkidi goochchi efees.
10 Maadoy bayndaynne
hiyeesay iza kushen kundees;
izikka istta
nippi histti menththereththees.
11 Iita asi ba wozinan,
«Xoossi tana dogides;
ba sinththaa taappe genththides;
mulekka izi tana be7enna» gees.
12 Abeet GODAWU! Denda.
Xoossoo! Ne kusheza
dhoqqu histta denththa;
maadoy baynda
metotanchchata dogoppa.
13 Iita asi Xoossa ays kadhizee?
Ba wozinankka,
«Xoossi tana qaxxayenna»
ays gizee?
14 Gido attiin Xoossoo!
Neni metozanne
waayezakka beyaasa;
neni ubba wode
maaddanaas giiga uttadasa;
neni yi7ota maaddaasa;
maadoy bayndaytikka
bana nees sheedhdheettes.
15 Gene asata wolqqa menththa;
iita asata wolqqaka liiqisa;
istti nam7anththo
iita ooththontta mala
istta ooso mala istta qaxxaya.
16 GODAY merippe mernaas
kawotidi dees;
hara kawoteththati
iza biittafe dhayana.
17 Abeet GODAWU!
Neni hiyeesata amo eraasa;
istta woosaakka siyada
minththeththaasa.
18 Oonikka istta yashisontta mala
maadoy bayndaytassinne
yi7otas ne pirda.