35
Dawite Mazamure
1 Abeet GODAWU!
Tanara eqettizaytara
neni eqetta;
tanara olettizaytara neni oletta.
2 Gondallenne xurure*Xurure: Xurure geetettizay ola wode asay olettishe tira kammiza gamballe mala ola may7o. oykkada,
tana maaddanaas denda.
3 Tana yedeththizayta bollan
ne tooranne mashsha denththa.
Tana, «Ta nena ashshizaade» ga.
4 Ta shemppoyo wodhanawu koyzayti
yeellatettonne kawuyetto;
ta bolla iita ooththana
maqettizayti
kawuyidi guye simmetto.
5 GODAA kiitanchchay
istta yedeththo;
isttika carko sinththan diza
suulla mala gidetto.
6 GODAA kiitanchchay istta gooddo;
istta ogeykka dhumanne
hallith gido.
7 Coo tana oykkanawu
bantta narxa woththida;
qasseka coo tana kundisanaas
olla bookkida.
8 Istti qoppontta dishin
bashshi istta bolla puttu go;
istti woththida woximadey
istta oykko;
istti ollan kundi dhayetto.
9 He wode tani GODAAN ufayettana;
izi ashshida gishshas
tani ufayettana.
10 Ta kumeththa asateththay nena,
«Abeet GODAWU!
Qohettidayta qohizayta
kusheppe ashshizay,
hiyeesatanne metotanchchata
bonqqizayta kusheppe naagizay
hara ne malay oonee?» gaana.
11 Iita asati ta ooththontta miishshan
tana mootida;
ta erontta miishshan ta bolla
wordo markka markkasida.
12 Tana bizzasida;
ta lo7o ooththoyssa kushe
iita zaarida.
13 Gido attiin tani
istti hargida wode
maaqa may7adis;
ta asateththa xooman
daabursadis;
ta woosaas zaaroy dhaydes.
14 Ta ishaas woykko ta dabbos
ta muuzottiza mala muuzottadis;
aaya hayqqiin kayottiza asa mala
keeha yeekkadis.
15 Gido attiin tani dhuphettiin
istti ufayssan issi bolla shiiqida;
he gene asati ta erontta gaason
tana wadhdhidi aggontta ixxida.
16 Istti iita asati qidhiza mala
tana qidhida;
yiillos ba ach garccida.
17 Abeet Godawu!
Neni awude gakkanaas
tana co7u gaada xeellanee?
Istta iita oosaappe tana ashsha;
ha gaammo mala asatappe
ta al7o shemppoyo woththa ekka.
18 He wode gita shiiqon
ta nena galatana;
cora asa shiiqon ta nena sabbana.
19 Wordora tana morkkizayti
ufayettofetto;
tana coo ixxizayti
ta bolla qim7otoppetto.Maza 69:4; Yoha 15:25
20 Istta doonappe
saro haasayay kezenna;
biittan co7u giidi diza asata bolla
yo7o qaxeththeettes.
21 Istti ba doona ta bolla doydi,
«Hekko be7a!
Ne ooththoyssa nuni
nu ayfen be7idos» geettes.
22 Abeet GODAWU!
Neni hayssa beyaasa;
hessa gishshas neni co7u gooppa;
taappeka haakkofa.
23 Abeet Godawu, ta Xoossawu!
Ta gishshas oletta;
denda; beegga;
ta doona gidada mootetta.
24 Abeet GODAWU ta Xoossawu!
ne xilloteththa mala taas pirda;
ta morkketakka ufayssofa.
25 Istti banttas, «Hashshu, hashshu,
nuni nu wozinan
amottidayssi polettides;
nuni iza mittidos»
gaana mala ooththofa.
26 Ta waayen ufayettizayti
ubbay yeellatettonne kawuyetto;
ta bollan otorettizayti
yeellanne kawushshateth
may7etto.
27 Tani shatumizayssa dosizayti
ufayettidi «Hashshu!» getto;
istti ubba wode,
«Ba aylleza
saroteththan ufayettiza
GODAY dhoqqu dhoqqu
go» getto.
28 Gallas kumeth ta inxarsay
ne xilloteththinne ne galata yootana.