95
1 Haa yiite!
Ane GODAAS ufayssan yexxoos;
nuna ashshiza zaallas ililoos.
2 Ane iza sinth galatara shiiqoos;
galata mazamure ufayssan yexxoos.
3 Gaasoykka GODAY
wolqqama Xoossa,
xoossata ubbaa bollaka
wolqqama kawo.
4 Biitta ciimmati iza kushen deettes;
zuma xeeratikka izassa.
5 Abba haaththi izassa;
hessa iza kusheti medhdhida;
biittaaka medhdhiday iza.
6 Haa yiite!
Hokkidi ane izas goynnoos;
nuna medhdhida GODAA
sinththan gulbatoos.
7 Izi nu Xoossa;
Nuni iza qooron heemettizayta;
nuni izas dorsa wudeta.
GODAY inttena gizayssa hach siyite!
8 «Kase intte aawati
Maasaninne Mariiban
ooththoyssaththo
intte wozina muumisopite.Ib 3:15; 4:7
9 Istti ta ooso be7idikka
tanara eqettidanne tana paaccida.Kessa 17:1-7; Tay 20:2-13
10 He yeletaa bolla tani
oyddu tammu layth hanqettadis;
tanikka, ‹Istti ubba wode
bantta wozinan baliza asa;
istti ta oge eribeettenna› gadis.
11 Hessa gishshas tani,
‹Istti ta shemposo
mulekka gelettenna›
gaada hanqetta caaqqadis.»Ib 3:7-11Tay 14:20-23; Zaare 1:34-36; 12:9-10; Ib 4:3-5