99
1 GODAY kawotides!
Hessa gishshas asay kokkoro!
kirubeta giddon
kawoteththa araatan uttides;
hessas biittayka qaaxxo.Kessa 25:22
2 GODAY Xiyoonen gita;
kawoteththa ubbaafe
izi dhoqqu dhoqqu gides.
3 Gitanne keehippe yashissiza
ne sunththa
istti ubbay sabbetto!
izi dumma!
4 Tuma pirda dosiza wolqqama kawo!
neni suureteththas
yoch yeggadasa;
neni Yaaqoobes tumu pirdanne
xilloteth essadasa.
5 Izi dumma gidida gishshas
GODAA nu Xoossaa
dhoqqu dhoqqu histtite;
iza toho garsankka gufannidi
izas goynnite.
6 Iza qeeseta giddofe Museynne
Aarooney deettes;
Sameelikka iza sunththan
woossidaytappe issaa;
istti GODAAS waassida;
izikka istta waaso allides.
7 Izi shaara tuussa giddora
isttas haasaydes;
istti izi immida maaraanne
woga naagida.Kessa 33:9
8 Abeet GODAWU, nu Xoossawu!
neni istta woosa siyadasa;
neni istta iitateththaa gishshas
qaxxaydaa gidikkoka
isttas atto gida Xoossa.
9 GODAA nu Xoossaa
dhoqqu dhoqqu histtite;
iza geeshsha zuma bollan
izas goynnite;
ays giikko GODAA
nu Xoossay geeshsha Xoossa.